00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri baturiye Pariki ya Nyungwe bari gutozwa kubungabunga urusobe rw’ibinyabuzima

Yanditswe na Prudence Kwizera
Kuya 31 Kanama 2021 saa 12:12
Yasuwe :
0 0

Nyuma yo kubona ko mu myaka yashize hari abana bataga amashuri bakajyana n’ababyeyi babo guhiga inyamaswa muri Pariki y’Igihugu ya Nyungwe, kuri ubu abanyeshuri bari mu biruhuko bari kwigishwa kubungabunga urusobe rw’ibinyabuzima no kwirinda ibikorwa by’ubuhigi n’ubushimusi.

Ni igikorwa cyateguwe n’Umuryango Biodiversity Conservation Organisation (BIOCOOR) wita ku rusobe rw’ibinyabuzima n’iterambere ry’abaturage, hagamijwe gutoza abakiri bato kwita ku rusobe rw’ibinyabuzima kugira ngo bakurane uwo muco.

Umuyobozi Nshingwabikorwa wa BIOCOOR, Dr Ange Imanishimwe, yabwiye IGIHE ko iyo gahunda yatangiye muri 2018 hahugurwa bana bagera kuri 70 bari kumwe n’ababyeyi babo, muri 2019 harebwamo 16 barushije abandi bongera guhugurwa ngo barusheho gusobanukirwa byinshi ku rusobe rw’ibinyabuzima.

Ati “Icyo twemera muri BIOCOOR ni uko ahazaza h’igihugu n’ahazaza ha Afurika n’Isi ari uko tugomba gushora imbaraga nyinshi mu bakiri bato kugira ngo bazabashe guhangana n’ibibazo bizaza mu minsi iri imbere. Niyo mpamvu twiyemeje kujya duhugura abana bato bari mu mashuri kugira ngo bagere ku rwego rwo kumenya kubungabunga ibinyabuzima, cyane ko bamwe muri bo ababyeyi babo bahoze ari abahigi muri Nyungwe.”

Yavuze ko bifuza ko abo bana baba umusemburo w’impinduka, ibikorwa byo kwangiza Nyungwe bigacika burundu.

Bamwe mu bana biga mu mashuri abanza n’ayisumbuye mu Karere ka Nyamagabe bo mu miryango ituye mu nkengero za Pariki y’Igihugu ya Nyungwe, bavuze ko hari byinshi basobanukiwe.

Iratabara Crispin w’imyaka 13 yiga mu mwaka wa Gatandatu w’amashuri abanza. Yavuze ko yajyaga atera amabuye inyoni cyangwa akurira ibiti agiye kwarura amagi yazo ariko nyuma yo kwigishwa yasobanukiwe ko ibyo bikorwa ari bibi.

Ati “Ubu ntabwo nshobora kwica inyoni kandi mbonye n’undi ushaka kuyica namubuza. Inyoni zidufitiye akamaro kuko zibangurira ibihingwa bikera neza tukanona ibyo kurya kandi hari inyoni ziba muri Nyungwe ba mukerarugendo baza gusura bakishyura amafaranga igihugu gikoresha mu kutwubakira amashuri.”

Isingizwe Umutoni Blandine w’imyaka 12 y’amavuko, yavuze ko yamenye amako y’ibiti atandukanye kandi bivamo n’imiti ivura abantu indwara.

Ati “Namenye ibiti bitandukanye n’ibyatsi bivamo imiti ivura indwara. Batubwiye ko igiti cyitwa umwirongi kivura uburozi naho umutagara ukavura imvune. Ikindi batwigishije ni uko ibiti bigira indabo inzuki zihovaho zigakora ubuki.”

Bamwe mu babyeyi babo nabo bavuga ko hari byinshi abana babo bungutse bijyanye no kwita ku rusobe rw’ibinyabuzima, ku buryo bemeza ko bazakura ari abantu bafitiye Igihugu akamaro n’Isi muri rusange.

Akimana Eugenie ati “Kuba umwana wanjye yaraje kwigishwa kwita ku bidukikije no kurengera ibinyabuzima ndabyishimiye kuko hari byinshi aza atubwira bamwigishije nko kwirinda gutema ibiti bitarakura, kwirinda guhiga muri pariki n’ibindi. Iyo murebye mbona azavamo umuntu ukomeye kubera izo nyigisho ahabwa.”

Mugendashyamba Emmanuel yavuze ko yamaze imyaka 14 ahiga inyamaswa muri Nyungwe, bitewe n’uko yari yarabitojwe n’umubyeyi we.

Yishimira ko yabiretse kubera inyigisho kandi agashima ko abana babo bari kwigishwa kubungabunga urusobe rw’ibinyabuzima.

Ati “Nabyirutse ndi umwana ufite imyaka irindwi njya mu ishyamba guhiga njyana na Papa akanyereka ko inyamaswa mbonye yose ngomba kuyica. Abana bacu rero bari kurerwa neza kuko babwirwa ko kwangiza ibidukikije ari bibi no kwica inyamaswa ari bibi. Bafite ejo hazaza heza.”

Dr Imanishimwe avuga ko bafite intego yo gutoza abana bato kugira ngo bakurane umuco wo kwita ku rusobe rw’ibinyabuzma ku buryo nibaba abayobozi mu nzego zifata ibyemezo bazabikomeza kurushaho.

Ababyeyi b abo bana babaherekeje kugira ngo barebe amasomo bigishwa ajyanye no kwita ku rusobe rw ibinyabuzima
Abana bari mu biruhuko bishimiye ko hari byinshi bungutse bijyanye no kubungabunga urusobe rw ibinyabuzima
Abana b’abanyeshuri baturiye Pariki ya Nyungwe bari gutozwa kubungabunga urusobe rw’ibinyabuzima
Dr Imanishimwe avuga ko bafite intego yo gutoza abana bato kugira ngo bakurane umuco wo kwita ku rusobe rw’ibinyabuzma ku buryo nibaba abayobozi mu nzego zifata ibyemezo bazabikomeza kurushaho
Mu byo basobanuriwe harimo amoko y'ibimera bitandukanye n'akamaro kabyo
Mu nkengero za Pariki y igihugu ya Nyungwe hakorerwa ibikorwa bigamije kuyibungabunga
Umuyobozi Nshingwabikorwa wa BIOCOOR, Dr Ange Imanishimwe, yavuze ko iyo gahunda yatangiye muri 2018 hahugurwa bana bagera kuri 70 bari kumwe n’ababyeyi babo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .