00:00:00 IGIHE NETWORK KN KINYARWANDA EN ENGLISH FR FRANCAIS

Moshions yateguye imurika izagaragarizamo imyambaro yayo mishya

Yanditswe na Uwiduhaye Theos
Kuya 6 Ugushyingo 2021 saa 09:33
Yasuwe :
0 0

Inzu y’imideli ya Moshions yateguye imurika ry’iminsi itatu rigamije kwagura uruganda rw’imideli mu Rwanda, rizanamurikirwamo imyambaro mishya iyi nzu yakoze yise ‘Imandwa Collection SS 22’.

Iri murikabikorwa biteganyijwe ko rizarangira ku Cyumweru ku wa 7 Ugushyingo nyuma yo gutangira kuri uyu wa Gatanu, rizabera kuri Atelier Design Academy. Rizitabirwa n’abahanga mu bijyanye n’imideli no guhanga udushya baturutse hirya no hino ku Isi.

Muri iyi minsi itatu hazakorwa ibikorwa bitandakanye birimo ibiganiro bizagaruka ku bumenyi bw’imideli n’uburyo bwo gutegura amafoto adasanzwe bizayoborwa n’abahanga basanzwe babikora.

Hazagaragazwa kandi imyambaro iyi nzu izashyira hanze ku nshuro ya gatandatu kuko buri mwaka isohora imyambaro mishya.

Izamurikwa kuri iyi nshuro yitwa Imandwa ikozwe mu buryo bwa kinyafurika buvanze n’imyambaro igezweho.

Turahirwa Moses washinze Moshions akaba ari na we wahanze iyi myambaro, yavuze ko yayikoze mu kwishimira ubuhanzi bwa kera ndetse no gukora imyambaro yibonwamo na buri wese yaba abagore cyangwa abagabo.

Yagize ati “Nshimishijwe no kwerakana iyi myambaro, igaragaza uburyo abasekuruza bacu babayeho nta kibatangira. Buri mwambaro wakozwe harebwe ku bidukikije kandi yose ikozwe mu buryo bw’umwimerere bigaragaza ubushobozi bwacu mu gukora ibihangano byatekerejweho.”

Iyi myambaro Turahirwa agiye kuyisohora nyuma yo kurangiza icyiciro cya gatatu cya kaminuza mu bijyanye no guhanga imideli ‘Masters in collection design’, yakuye mu Butaliyani.

Moshions yashinzwe mu 2015 imaze kuba ubukombe mu guhanga imyambaro itandukanye ikunzwe n’abatari bake. Imyambaro yaherukaga ni iyo bise ‘Ishuri Collection’ yasohotse mu 2020.

Iri murikabikorwa rizitabirwa n’ibyamamare bitandukanye bizwi mu mideli nka David Tlale, Umunyafurika y’Epfo uhanga imideli, umunyamakuru Georgie Ndirangu wakoze kuri CNBC, ubu ukora kuri BBC.

Abandi barimo inzobere akaba n’umwarimu mu mideli, Frederica Brooksworth; Thebe Ikalafeng washinze Brand Africa, umunyamideli ubarizwa muri Ugand, Judith Heard.

Hari n’abanyamakuru bakora ibijyanye n’imideli nka Jordan Anderson ukora muri NSS Magazine, Chidozie Obasi ukorera Vogue Italia n’umwe mu bafata amashusho bazwi mu mideli Stuurman Trevor.

Turahirwa Moses yavuze ko yakoze 'Imandwa' mu buryo buha agaciro ibihangano by'abakera
Moshions yateguye imurika ry'iminsi itatu izanamurikiramo imyambaro yise 'Imandwa'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .