Imyambarire igezweho mu banyamujyi b’abanyabirori (Amafoto)

Yanditswe na Uwiduhaye Theos
Kuya 14 Nyakanga 2019 saa 06:26
Yasuwe :
0 0

Uko iminsi ihita niko haduka imyambarire itandukanye bitewe n’iba igezweho mu banyamujyi n’abandi bantu b’abasirimu bakunda kurimba no kwambara bakaberwa.

Akenshi usanga ibijyanye n’imyambarire ari ibihe byisubiramo, bisa nk’aho nta kintu gishya kigihangwa ahubwo imyambaro yakanyujijeho mu bihe bya kera ariyo yongera kwadukanwa n’ikindi gisekuru.

Ingero ni nyinshi zihari ariko dufatiye ku nkweto ya DH yamamaye mu bihe byo hambere, abakurikirana bazi neza ko iyi mu minsi ya vuba yagarutse mu yindi sura ya ‘All Star Converse’ yongera guhararwa na benshi mu rubyiruko ndetse na n’ubu yambarwa n’abatari bake barimo n’ibyamamare.

Nta gishya mu myambarire ahubwo biba ari nko kongera kwiyibutsa ibyo abakurambere bakunze kurimba bikagenda bihererekanywa uko imyaka yahise.

IGIHE yakusanyije imwe mu myambarire igezweho muri iki gihe cyane cyane mu banyamujyi ariko igenda ituruka ku mico y’ahandi bitewe n’ibiba bigezweho mu myambarire y’ibyamamare.

-  Gutebeza ishati igice kimwe (Half Tuck)

The Guardian itangaza ko iyi myambarire yamamaye cyane kuva mu 2013 ikaza gusa nk’aho icogora kugeza aho muri uyu mwaka yongeye kwigarurira imitima ya benshi.

Ni imyambarire igezweho muri iki gihe mu banyamujyi, iyi usanga benshi mu rubyiruko bayikunda cyane.

Kuva mu muhanda usanga abenshi bambaye muri ubwo buryo, aho ishati itebezwa igice kimwe ikindi kigasigara kirereta. Biragoye kugenda metero zirenze 300 utarahura n’uwarimbye muri ubwo buryo cyane mu duce duhuriramo abantu benshi.

Biba akarusho rero iyo ugiye mu bitaramo kuko kuva ku bahanzi kugera mu bafana babo usanga baserutse muri uwo mwambaro. Ibi bigaragaza ko iyi myambarire ikunzwe bidasubirwaho.

Gutebeza uruhande rumwe bigezweho muri iki gihe. Aha abagize itsinda ry'abacuranzi bize umuziki ku ishuri rya Nyundo, Symphony Band, biteguraga kuririmba muri Iwacu Muzika ku wa 29 Kamena 2019

-  Kwambara agakapu ko mu rukenyerero (Waist Bag)

Kwambara ukarenzaho agakapu nabyo biri mu bigezweho cyane muri iki gihe. Wikipedia igaragaraza ko udukapu twambarwa mu rukenyerero Abanyamerika batwita Fanny Pack, Belt bag cyangwa Belly bag mu gihe Abongereza bo batwita Bum Bag.

Mu mateka, utu dukapu abantu batwambaraga bashaka kwirinda ibisambo. Utu dukapu twafatanywaga n’imikandara mu mico itandukanye guhera mu bihe byo hambere.

Mu myaka yo mu 1980 nibwo utu dukapu twongeye gukorerwa ivugurura ndetse dushyirwa mu kinyamakuru cya Vogue kizwiho kwandika ku byerekeye imideli.

Mu 2012 abahanga imideli batandukanye bongeye kutwadukana batwise ‘Belted Satchels’ cyangwa se ‘Hands-Free Bags’ bashaka kuzana imyambaro ihenze y’abakunda kurimba.

Mu Bufaransa utu dukapu batwita Banana Bags, muri Espagne bakatwita Kidney Bags naho mu Butaliyani ho batwita Marsupio.

Mu 2018, The Boston Globe yatangaje ko udukapu tunitwa ‘Fanny Packs’ twagarutse muri Vogue dufite indi myihariko tuzanywe n’abahanga imideli bakomeye barimo Gucci, Prada na Louis Vuitton.

Twambawe n’ibyamamare bitandukanye birimo Kim Kardashian, Rihanna, Jaden Smith na Russell Westbrook. Uretse kutwambara mu rukenyerero utu dukapu hari n’abatwambara batunyujije mu gatuza tukamanuka tukanyura mu kwaha no mu mugongo.

Ubwoko bw’udukapu dukunzwe kwambarwa turimo utwa Supreme, Adidas na Fila n’utundi.

Kwambara udukapu tuzwi nka Waist Bag nabyo biraharawe cyane. Umuraperi Bac-T (wambaye umuhondo) aha yari yitabiriye igitaramo cya Iwacu Muzika Festival cyabereye i Rubavu ku wa 29 Kamena 2019 yambaye agakapu

-  Kwambara Jean Jacket (Denim Jacket/Trucker Jacket) na Hoodie

Mu myambarire igezweho mu Rwanda muri iki gihe harimo no kwambarira Jean Jacket (ikoti rimeze nk’ikoboyi) inyuma y’umupira w’imbeho, urubyiruko rwinshi cyane cyane i Kigali n’abandi basirimu bari mu bakunda kurimba muri ubu buryo.

Kwambara gutya mu Rwanda byatangiye kwamamara cyane mu ntangiriro za 2019 nyuma y’uko mu mwaka ushize habanje kugerwaho kwambara Jean Jacket nabyo bigaca ibintu.

Hari n’amakoti yitwa ‘Hooded Denim Jacket’ yo afite ishusho y’umupira w’ingofero ufatanye na Denim cyangwa se Jean Jacket.

Jean Jacket yatangiye kwambarwa muri Leta Zunze Ubumwe za Amerika mu kinyejana cya 19, yakunzwe n’ab’ingeri zose ukajya wambarwa n’abagabo n’abagore.

Uyu mwambaro wahanzwe n’uruganda rw’imyenda rwa Levi Strauss & Co. ruri mu zikomeye muri Amerika.

Kwambara umupira w'ingofero ukarenzaho Jean Jacket ni imwe mu myambarire igezweho

-  Imikandara ya Cinture Donna

Ni imikandara miremire yambarwa hagamijwe kurimba, uwambaye arawuzengurutsa yawugeza imbere akawureka ukarereta igice kinini ukenda kugera ku mavi.

Mu Karere ka Afurika y’Iburasirazuba iyi mikandara yamamaye cyane guhera mu 2018 biturutse ku ndirimbo yakoreshejwemo mu mashusho ya Sauti Sol na Nyashinski bise ‘Short N Sweet’ yagiye hanze muri Gicurasi umwaka ushize.

Iyi ndirimbo imaze kurebwa n’abasaga miliyoni 13 mu mwaka n’amezi asaga abiri imaze hanze.

Uyu na wo ni umwe mu myambaro abanyamujyi benshi usanga baserukana mu minsi ya none.

Imikandara ya Cinture Donna mu Karere ka Afurika y'Iburasirazuba yaheshejwe ikuzo n'itsinda rya Sauti Sol

-  Guheka udukapu duto

Ubundi wasangaga mu minsi ishize umukobwa akenshi agenda yitwaje igikapu kinini mu ntoki; iyo yabaga yasohokanye n’abandi wasangaga bibangamye, ariko muri iki gihe siko bimeze ahubwo benshi bitwaza udukapu duto duhekwa.

Utu dukapu tuba turimo ibintu nkenerwa birimo ibyo bakwifashisha mu kwiyitaho ku isuku, telefoni, indahuzo (chargeur) n’utundi dukoresho twa ngombwa umuntu ashobora gukenera mu rugendo.

Kuri benshi usanga utu dukapu baradusimbuje amasakoshi yari asanzwe amenyerewe cyane.

-  Do-rags (Durags)

Ni udutambaro twambarwa mu mutwe duharawe na benshi muri iki gihe. Durags zatangiye kwambarwa mu kinyejana cya 19 n’abakozi b’Abanyamerika bakomoka muri Afurika b’abakene ndetse n’abakoreshwaga uburetwa bashaka kurinda imisatsi yabo ngo itandura.

Mu 1930 Durags zatangiye kwambarwa nk’uturinda musatsi, nyuma y’icyiswe Black Power Movement mu 1960 ihinduka kimwe mu mirimbo mu Banyamerika bakomoka muri Afurika.

Zanambarwaga n’abaraperi n’abakinnyi b’imikino itandukanye cyane ab’igitsinagabo bo mu myaka itandukanye.

Mu 2000, kwambara Durags mu ruhame byabaye nk’ibitakigezweho mu bice bimwe ariko zigumana ubwamamare bwazo ahandi.

Umuraperi A$AP Ferg yongeye guhesha agaciro Durags mu myaka yashize bikubitanye no kugaruka kw’inyogosho benshi bazi nka ‘Waves’, Durags zongera kugira agaciro gakomeye mu muryango w’Abanyamerika bafite inkomoko muri Afurika.

Kwambara Durags muri Amerika byagiye biteza impagarara cyane, hari nk’ubwo mu 2001 abakinnyi ba Shampiyona y’Umupira w’Amaguru yo muri Amerika bigeze kubuzwa kuzambara zo na bandana.

No mu mashuri yisumbuye bigeze kubuzwa kuzambara; nko mu Ishuri ryisumbuye rya John Muir riherereye i Pasadena muri California ryarabikoze mu ntangiriro za 2019 abanyeshuri barigaragambya mu mutuzo.

Iyi myigaragambyo yakozwe n’Ihuriro ry’abanyeshuri b’abirabura. Aba banyeshuri bakoze imyigaragambyo bashinja ubuyobozi bw’ishuri kuvuga ko ‘Kwambara Durags bizatuma abanyeshuri bacengerwa n’imico y’amabandi’ gusa umuyobozi w’ishuri we yireguye avuga ko ataribyo ahubwo babikoze kubera ‘Indangagaciro z’ishuri z’uko bagomba kwitwara ku ishuri’.

Do-rags (Durags) ifite amateka yihariye ku Banyafurika igezweho

-  Athleisure

Athleisure ni uburyo bw’imyambarire aho imyenda isanzwe ikoreshwa muri siporo, abantu bayambara bagiye mu kazi, ku ishuri cyangwa ibindi birori.

Niba ukurikirana umuziki, indirimbo Safi Madiba yahuriyemo na Meddy bise ‘Got it It’ igaragaza neza uko uyu mugabo wahoze muri Urban Boyz aseruka yambaye amatiriningi atukura.

Iyi myambarire nayo igezweho cyane muri iki gihe by’umwihariko cyane ko ari mu gihe cy’impeshyi, kwambara gutya ni uburyo bwo gusubira mu bihe byo hambere ukajyanisha n’inkweto za siporo.

Abamaze gusobanukirwa n’ibijyanye n’imyambarire usanga aribo bambara muri ubu buryo cyane cyane.

Athleisure, imyambarire nayo igezweho cyane muri iki gihe by’umwihariko cyane ko ari mu mpeshyi

-  Ipantalo zicikaguritse (Déchiré Jeans)

Iyi nayo ni imyambaro igezweho muri iki gihe, ni amapantalo asa nk’acikaguritse ariko akaba asohoka mu ruganda ariko akozwe. Ashobora kuba acitse ku ivi, ku kibero cyangwa ahandi.

Urubuga rwa Apparelsearch rugaragaza ko uyu mwambaro watangiye gukoreshwa ukanamamara cyane kuva mu kinyejana cya 20, mu myaka ya 1980 kugeza mu 2000.

Mu ntangiriro za 2010 nibwo yongeye kwambarwa cyane ku migabane itandukanye.

Guhera mu 2017 uyu mwambaro benshi biganjemo urubyiruko batangiye kuwambara cyane bitandukanye n’indi myaka kugeza na n’uyu munsi n’umwe mu y’abanyabirori.

Déchiré ni umwe mu myambaro ikunzwe cyane

-  Ipantalo za High Waist

Iyi myambaro y’abakobwa nayo iri mu igezweho mu banyamujyi. Ni ipantalo z’abakobwa ziba zizamutse ugasanga zambariwe zikagera mu mayunguyungu.

Ni umwe mu myambaro igezweho mu bakobwa muri Kigali ntiwatera metero 100 utarahura n’umukobwa uyambaye.

Ipantaro nk’izi z’abahungu zirahari ariko mu Rwanda ho ntabwo zamamaye cyane nk’iz’abakobwa.

-  Off White

Iyi myenda yoroheye cyane ikorwa na ‘Off White’ ya Virgil Abloh ufite ababyeyi bo muri Ghana ariko wavukiye muri Leta Zunze Ubumwe za Amerika akaba ari naho akorera ibikorwa bye bitandukanye bijyanye no guhanga imyenda.

Iyi myenda nayo ni myiza ku muntu ukeneye kwambara bijyanye n’igihe cy’impeshyi kuko yoroheye kandi ikaba igufasha iyo hari izuba ryinshi.

Ni yo umuhanzikazi Queen Cha aheruka guserukana ku rubyiniro ubwo yari mu gitaramo cya ‘Iwacu Muzika Festival’ cyabereye mu Karere ka Rubavu ku wa 29 Kamena.

Iyi myenda yoroheye cyane ikorwa na ‘Off White’ ya Virgile Abloh nayo igezweho. Queen Cha yayiserukanye muri Iwacu Muzika Festival yabereye ku Kibuga cya Nengo i Rubavu ku wa 29 Kamena 2019

-  Amadarubindi ya Tiny Sunglasses

Ni amadarubindi asa nk’aho aribwo ari gukundwa na benshi cya mu Rwanda, nyamara yatangiye kwamamara cyane mu 2018 cyane muri Leta Zunze Ubumwe za Amerika biturutse kuri Kanye West.

Ibyamamare byayambaye birimo Kendall na Kylie Jenner, Bella na Gigi Hadid, Kim Kardashian, Kanye West n’abana b’ibyamamare barimo Zoe Kravitz, Kaia Gerber na Hailey Baldwin.

Aya madarubindi yamamaye ubwo Kim Kardashian yayambaraga mu gace k’ikiganiro cyo muri Mutarama 2018 cya ‘Keeping Up With the Kardashians’ gikorwa n’uyu mugore.

Icyo gihe yavuze ko umugabo yamwoherereje ubutumwa amubuza kwambara amadarubindi manini ahubwo amwoherereza amafoto yaya ya ‘Tinny’ amubwira ko ariyo agomba kwambara.

Icyo gihe mu binyamakuru bitandukanye birimo E! Channel, Independent na HuffPost mu nkuru nyamukuru zabo habanzaga izivuga kuri aya madarubindi, ahita yamamara atyo.

Kanye West ntabwo ariwe wahimbye aya madarubindi ahubwo icyo yakoze ni ukuyamenyekanisha kuko yakozwe na Adam Selman uhanga imideli wanahanze iyambawe n’abarimo Rihanna, Beyoncé na Lady Gaga.

Amadarubindi ya Tiny Sunglasses agezweho ku Isi yose. Umuhanzikazi Rihanna ari mu batumye azamurirwa igikundiro

-  High Heels za Batzuzhi

High Heels ni zimwe mu nkweto abanyamujyi benshi bakunze kwambara, zambarwa ku makanzu cyangwa se ku mapantalo. Ni inkweto zihora imbere mu bijyanye n’imyambarire y’abagore kuko akenshi nizo bambara iyo bagiye mu birori bikomeye.

Iza Batzuzhi zikorwa n’inzu y’imideli ya Batzuzhi yo mu Butaliyani ni zo zigezweho muri iki gihe.

Ni inkweto ndende usanga zifite talon ndende ndetse uzirebeye kure ubona ko zifite ubugenge mu kuzigenderamo.

Izi nkweto zifite imiterere itandukanye ndetse ziza mu mabara anyuranye. Uzambaye aba muremure bitewe n’uko ziba zitereye mu kirere.

Inkweto ndende za Batzuzhi ziri mu zigezweho muri iki gihe

-  Inkweto z’abagabo za Balenciaga

Inkweto za Balenciaga ziri mu zikunzwe cyane mu bazi kurimba, abashaka gukora siporo cyangwa se kwambara inkweto zinepa ariko zifite talon nini.

Benshi mu bakora siporo mu nzu zikomeye muri Kigali, usanga bazambaye. Ni inkweto zikorwa n’uruganda rwa Balenciaga S.A. rwashinzwe n’Umunya-Espagne, Cristóbal Balenciaga.

Inkweto z’abagabo za Balenciaga zigezweho ndetse zambarwa n'abatari bake
Inkweto zoroshye zo mu bwoko bwa Balenciaga zigezweho cyane
Balenciaga ziri mu nkweto zikunzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza