00:00:00
IGIHE NETWORK

Mukandayisenga, umukobwa wacuruje ibisheke akaba ageze ku ruganda ruto rubibyazamo vino n’imitobe

Imyaka ibiri irashize Mukandayisenga Clementine asubitse ibyo gushaka akazi nyuma yo kurangiza icyiciro cya kabiri cya Kaminuza, akayoboka inzira yo kubyaza umusaruro ibisheke.
Uyu mukobwa wize ibijyanye n’ibaruramari, igisheke cyabaye inshuti ye kuva mu bwana ku mihanda ya Nyakabanda mu karere ka Nyarugenge, aho yajyaga abirangura ari ingeri akajya kubicuruza.
Mu gihe yabaga abicuruza ari ingeri, ntiyari azi ko umunsi umwe azagera aho akavumburamo ko hejuru y’umutobe wabyo uryoshye, (...)

Imyaka ibiri irashize Mukandayisenga Clementine asubitse ibyo gushaka akazi nyuma yo kurangiza icyiciro cya kabiri cya Kaminuza, akayoboka inzira yo kubyaza umusaruro ibisheke.

Uyu mukobwa wize ibijyanye n’ibaruramari, igisheke cyabaye inshuti ye kuva mu bwana ku mihanda ya Nyakabanda mu karere ka Nyarugenge, aho yajyaga abirangura ari ingeri akajya kubicuruza.

Mu gihe yabaga abicuruza ari ingeri, ntiyari azi ko umunsi umwe azagera aho akavumburamo ko hejuru y’umutobe wabyo uryoshye, bishobora no kuvamo inzoga.

Mu 2017 ubwo Mukandayisenga yari asoje amasomo muri Kaminuza Yigenga ya Kigali (ULK), yaje kugira igitekerezo cyo gusubira ku gisheke cyamutunze akiri umwana, ashaka uburyo akibyazamo umusaruro.

Nyuma yo kwihugura byinshi ku gisheke, yaje kumenya ko hejuru y’umutobe wacyo uboneka hakoreshejwe amenyo, hashobora kuvamo undi mwiza kurushaho hifashishijwe imashini, hakavamo vino na whisky by’akataraboneka.

Mu kiganiro yahaye IGIHE, yavuze ko yegereye umwe mu bagize umuryango we amusaba ubufasha, nyuma yo kumusobanurira uburyo igisheke cyabyazwamo umusaruro.

Yaguriwe imashini ibyaza umutobe mu bisheke, ayihabwa nk’inguzanyo azishyura uwo muntu wo mu muryango mu gihe cy’imyaka ibiri.

Yahise atangiza sosiyete Exalto Engineering and supply solutions, ashinga uruganda ruciriritse ku Ruyenzi mu Karere ka Kamonyi atangira gukora vino, imitobe na whisky mu bisheke.

Yagize ati “Natangiye nkora vino gusa nyuma mbona ko vino na whisky bishobora kuboneka mu gihe kirekire nibwo nafashe umwanzuro ndavuga nti ese mu gihe zitaze nta kindi nakora ? mpita ntangira no gukora imitobe”.

Nubwo munsi yo ku Ruyenzi hahinze ibisheke mu gishanga cya Nyabarongo, ubwoko bw’ibyo Mukandayisenga akoresha buva cyane cyane muri Rubavu, Nyamasheke na Musanze.

Umwaka ushize, Mukandayisenga ni we wabaye uwa mbere mu marushanwa ya Youth Connect agamije guteza imbere ba rwiyemezamirimo bato yabaye umwaka ushize.

Mu bihembo yahawe, yaguzemo imashini nshyashya ku buryo kuri ubu yemeza ko uruganda rwe rufite ibikoresho by’agaciro ka miliyoni 20 Frw.

Wa mwenda yagurijwe agitangira, nyuma y’amezi icyenda yahise awishyura kuko nubwo byamugoye abantu bageze aho bakunda ibyo akora.

Ati “Mbere ntabwo wabibwiraga umuntu ibya vino ivuye mu bisheke ngo ahite abyumva. Noneho kuba uri umukobwa bakavuga bati vino yakozwe yo mu bisheke noneho yakozwe n’umukobwa imeze ite? Byamfashe igihe mbanza gutanga iz’ubuntu kugira ngo babanze bazumve”.

Uruganda Exalto Engineering and supply solutions, rwatangiranye abakozi batatu ariko ubu bageze kuri 20 barimo abakora buri munsi, n’abakora iyo hari igikorwa cyo kwenga.

Umuhoza Joyeuse, ni umwe mu bakozi bahoraho bakora na Exalto Engineering and supply solutions.

Kuva yasoza amashuri yisumbuye, yahise aza muri uru ruganda aho akora nk’ushinzwe imari ariko avuga ko byamufashije cyane.

Yagize ati “Nta handi nakoze ngo mbe nagira amafaranga, ariko kuba buri kwezi mbasha kubona amafaranga hari byinshi amfasha. Nk’ubu sinabwira iwacu ngo bangurire urukweto ndarwigurira kuko ndahembwa.”

Mutuyeyezu Martin ukoresha imashini zikanjakanja igisheke zikakibyaza umutobe, na we yabwiye IGIHE ko atagitega amaboko iwabo mu rugo kuko umushahara ahembwa buri kwezi umutunga.

Ati “Hashize umwaka ndi gukora hano. Mbere nabanaga n’ababyeyi ariko aho mboneye akazi nibeshejeho , menya kuba nakwizigama nkabona n’ayo kwishyura inzu”.

Icyifuzo cya Mukandayisenga ni ukugira inyubako ze bwite z’uruganda kuko guhora yimuka ajya gukodesha bituma adatuza.

Yavuze ko no kubona amacupa basukamo vino n’imitobe igiye gucuruzwa ari ikibazo kuko bituruka kure kandi bikaza bihenze.

Ubushakashatsi bw’Ikigo cy’Igihugu cy’Ibarurishamibare, NISR, bwakozwe mu 2017 bwagaragaje ko ubushomeri mu rubyiruko buri 21 %.

Mukandayisenga avuga ko urubyiruko rubigizemo uruhare, iyo mibare yagabanyuka binyuze mu kwihangira umurimo.

Ati “Icya mbere ni ukwizigamira kuko usanga urubyiruko rufite amafaranga menshi rupfusha ubusa , wabona igihumbi cyangwa bibiri ukumva ni make ariko ayabitse, wazatangirira kuri make kandi byakunda”.

Kuri ubu, Mukandayisenga afite amaduka abiri mu mujyi wa Kigali acuruza ibikorwa by’uruganda rwe. Hari n’abandi bantu hirya no hino mu gihugu bakorana na we bakaza kurangura.

Umwaka ushize, Mukandayisenga ni we wabaye uwa mbere mu marushanwa ya Youth Connect agamije guteza imbere ba rwiyemezamirimo bato
Mukandayisenga avuga ko uruganda Exalto Engineering and supply solutions, rwatangiranye abakozi batatu ariko ubu bageze kuri 20
Mu bisheke Mukandayisenga abasha gukoramo vino, imitobe na whisky

Ibitekerezo

  • Ni byiza kwihangira umurimo ukava muguhorana ubwoba bw’ejo hazaza no gukorera abandi urubyiruko twese twigireho

  • Uyu mukobwa niwe wakagombye kugira aba followers benshi kuri za facebook na instagram, because she an inspiration, ureke babandi birirwa bereka

  • Inama nakugira w’irinde abagabo b’ikigali. Ubundi uzagerayo!!


Tanga igitekerezo


BIGEJEJEYO