00:00:00
IGIHE NETWORK

Manirafasha yahanze ikoranabuhanga ryo kuhira akarima k’igikoni hifashishijwe amazi y’imvura

Manirafasha Jean Claude, umusore wo mu Karere ka Rwamagana yatangije umushinga yise Smart Irrigated Akarima wifashisha ikoranabuhanga mu kuhira akarima k’igikoni hifashishijwe amazi y’imvura ava ku nzu.

Ni umushinga wagutse yatangiye mu 2015 ubwo yigaga mu Ishami rya Kaminuza y’u Rwanda ryigisha Ikoranabuhanga ariko atangirana umushinga mugari wo kwifashisha ikoranabuhanga mu kuhira ahantu hanini nko mu gishanga.

Manirafasha washinze sosiyete Bright Future Contracting irimo agace gashinzwe guteza imbere ikoranabuhanga mu kuhira akarima k’igikoni, yabwiye IGIHE ko baje gusanga umushinga wo kuhira ibishanga usaba amikoro ahambaye, baba batangije undi wo kuhira akarima k’igikoni.

Smart Irrigated Akarima ni umushinga wo kuhira akarima k’igikoni hifashishijwe imirasire y’izuba cyangwa se izindi ngufu z’amashanyarazi.

Uku kuhirwa bikorwa mu buryo bw’ikoranabuhanga (Automatisme), aho mu butaka bashyiramo akamashini gapima ubukonje buri mu butaka, kagatanga amakuru niba ubutaka bukeneye amazi hanyuma ikigega kikayohereza bitabaye ngombwa ko hagira uza kuhira.

Manirafasha yavuze ko babikoze mu rwego rwo gukemura ikibazo cy’imirire mibi n’igwingira ry’abana, ikibazo cy’ibiza biterwa no kudafata amazi y’imvura ku mazu n’ibindi.

Uyu musore avuga ko nubwo hashyizwe imbaraga nyinshi mu gukangurira abaturage kubaka uturima tw’igikoni, nta musaruro uhagije dutanga kubera ko mu gihe cy’izuba natwo twuma kubera kubura amazi.

Yagize ati “Mu 2015 niho nakoze umushinga wo kuhira imisozi ibiri iri hagati y’igishanga muri Rwamagana. Maze kubona ko uyu mushinga ari mugari, nibwo natangiye kushaka umushinga umuntu wese ashobora gutunga mu rugo iwe, nibwo nafatiye kuri politiki y’akarima k’igikoni kugira ngo ube umushinga uramba kandi ufite imbaraga mu baturage.”

Manirafasha n’abakozi akoresha nibo bikorera utumashini twumva ko mu butaka harimo ubukonje cyangwa nta burimo. Mu kubaka ikoranabuhanga ryabo kandi bifashisha imirasire y’izuba ku badafite umuriro w’amashanyarazi, ikigega gifata amazi n’amatiyo yohereza amazi.

Kugeza ubu uyu mushinga watangijwe mu 2018, umaze gukorerwa abantu batatu ariko Manirafasha avuga ko intego ari ukuwumenyekanisha kugeza ubwo abantu benshi bawugannye.

Ati “Ngiye kubaka uturima tw’igikoni hirya no hino mu gihugu, hanyuma nzubake uruganda rubika imboga ngurishe mu masoko hirya no hino. Ndateganya ko igihe kimwe nzaba mfite uruganda rw’imboga.”

Manirafasha avuga ko nibura kubaka iri koranabuhanga ku karima k’igikoni kamwe, bisaba ibihumbi 200 Frw.

Umwe mu bakozi batatu bahoraho ba Bright Future Contracting, Hakizimana Dieudonne, avuga ko amaze amezi atatu akora mu bijyanye no kubaka ikoranabuhanga mu turima tw’igikoni.

Uyu musore avuga ko nubwo bakiyubaka, yabonye ko ari umwuga uzamutunga nakomeza gushyiramo imbaraga.

Ati “Amafaranga yariyongereye kurusha ayo nabonaga i Kigali kandi nungutse n’ubumenyi. Mbere Sinari kwigurira nk’inkweto ihenze ariko ubu ndayigurira. Ikindi ngura nk’ihene cyangwa inkoko mu rugo bakandagirira.”

Manirafasha avuga ko imbogamizi agifite ari uko abaturage bavuga ko ikoranabuhanga rye rihenze bigatuma ababyitabira baba bake.

Yemeza ko ikoranabuhanga rye ryihariye kandi rifite akamaro, icyakora agasaba ubufasha kugira ngo rigere kuri benshi kandi rihendutse.

Intego ni ugukorana n’ibigo binini nk’ibigo by’amashuri, hakubakwa uturima tw’igikoni tugezweho tuzajya dufasha amashuri kugaburira abanyeshuri imboga bitabahenze.

Manirafasha avuga ko Smart Irrigated Akarima igamije gukemura ikibazo cy’imirire mibi n’igwingira ry’abana, ikibazo cy’ibiza biterwa no kudafata amazi y’imvura ku mazu n’ibindi.
Umwe mu bakozi batatu bahoraho ba Bright Future Contracting, Hakizimana Dieudonne, avuga ko amaze amezi atatu akora mu bijyanye no kubaka ikoranabuhanga mu turima tw’igikoni
Akarima k'igikoni kabanza gutunganywa mbere yo gushyiramo ikoranabuhanga rituma kiyuhira
Smart irrigated Akarima ngo izatuma abanyarwanda babasha guhinga imboga igihe cyose bashakiye
Manirafasha yahanze ikoranabuhanga ryo kuhira akarima k’igikoni hifashishijwe amazi y’imvura

Amafoto: Laura Mulkerne


Ibitekerezo

  • Their phone number plz

  • uyu mushinga ni mwiza ariko ntacyo mudufashije ’nibura muduhe niméro ya telefone ye kugirango umukeneye Abe yamubona.


Tanga igitekerezo


BIGEJEJEYO