00:00:00
IGIHE NETWORK

Ibanga rya Mwizerwa uhanga imideli y’abagore yifashishije Youtube (Amafoto)

Imbuga nkoranyambaga zimaze kwamamara cyane mu Rwanda ndetse benshi birirwa bareba amashusho atandukanye yiganjemo ay’indirimbo z’abahanzi n’ibiganiro bitandukanye ku rubuga rwa Youtube.

Mwizerwa Aline we si ko bimeze kuko amasaha menshi ayamara atekereza ku cyateza imbere imideli yifashishije uru rubuga avomaho ubumenyi asangiza umukorera imyenda ikorwa n’inzu ye y’imideli yitwa Maison Aline.

Uko byatangiye

Mwizerwa w’imyaka 35 yabwiye IGIHE ko yabyirukanye amashagaga yo guhanga imideli ariko ntibize kumukundira akabanza kwiga ibijyanye n’icungamutungo.

Ati “Mu buto bwanjye nakundaga ibijyanye no guhanga imideli ariko sinabasha kubikora ahubwo mbazwa kwiga ibijyanye n’icungamutungo ari nabyo naminujemo.”

Yavuze ko igitangaje kuri we ari uko nta hantu na hamwe yize ibijyanye no guhanga imideli ahubwo kubera urukundo abifitiye yifashisha umukozi we akamubwira uko agomba gukora yifashishije Youtube.

Ati “Abahanga imideli bose ntabwo ari ngombwa ko bakoresha intoki, nkanjye nkoresha umutwe gusa akenshi nkabwira umudozi wanjye ibyo akora nifashishije ubumenyi nkuye kuri Youtube.”

By’umwihariko imboni y’ijisho rye iri cyane ku bijyanye na gahunda ya Made in Rwanda.

Mwizerwa kuva mu 1994 yabaga mu Bubiligi agera mu Rwanda mu 2017 ahita ashinga inzu ikora imideli yanamwitiriwe ‘Maison Aline’ ikorera ku Kacyiru hafi ya Ambasade ya Amerika.

Ati “Maison Aline ifite gahunda yo gufasha urubyiruko ndetse n’abakobwa babyariye iwabo kumenya guhanga imyambaro ya Made in Rwanda no gukomeza guhangana n’ubushomeri.”

“Ntabwo turamenya neza igihe iki gikorwa kizatangirira ariko byanga bikunze mu 2019, nituba twabonye amafaranga yo gushora mu gikorwa tuzahita dutangira.”

Akomeza avuga ko iyi gahunda ye niramuka igezweho nta gushidikanya yizera ko mu minsi iri imbere imyambaro ya Made in Rwanda izageze ku rwego ruhambaye ku ruhando mpuzamahanga benshi barwanira kuyambara.

Mwizerwa yifuza ko u Rwanda rwamenyekana mu ruhando rw’imideli ku rwego rwa Afurika yose nk’uko ibihugu birimo Ghana, Nigeria na Afurika y’Epfo byubashywe cyane muri iki gihe.

Imyambaro ya ‘Made in Rwanda’ yakozwe na Mwizerwa yamaze kubengukwa n’abantu batandukanye ndetse hari izakoreshwa hafungurwa igikorwa cya ‘Dior exhibit’ muri Leta Zunze Ubumwe za Amerika.

Imyenda yakozwe na Mwizerwa iba ifite ikirango cyo mu izina ry’inzu ikora imideli ye gikubiyemo guhuza amazina ya Maison Aline.

Amwe mu mafoto y’imyambaro yakorewe mu nzu y’imideli ya Mwizerwa Aline


Tanga igitekerezo


BIGEJEJEYO