00:00:00
IGIHE NETWORK

Bayizere, rwiyemezamirimo uri gukabya inzozi mu buboshyi n’ubudozi bushingiye ku muco

Umwaka urashize Bayizere Solange atangije sosiyete Ishema ry’Umuco Ltd rikora ibikoresho bitandukanye birimo ibijyanye n’ububoshyi, ubudozi, ubugeni bwo gusiga amarangi n’ibindi bishingiye ku muco nyarwanda.

Ni umwuga yinjiyemo nyuma yo kurangiza amashuri yisumbuye, akabura icyo akora.

Uyu mukobwa wo mu Murenge wa Shyira mu Karere ka Nyabihu, akora ububoshyi burimo ubw’amasakoshi y’abagore ariho amasaro, ibikapu byo mu bitenge, ingofero, uducuma dutatse amasaro, imitako n’ibindi.

Ni n’umunyabugeni, umubaji wabaje indege ya RwandAir atarayigera iruhande, bikarangira ayigiyemo mu rugendo shuri ba rwiyemezamirimo bato baherutse kugirira muri Kenya.

Bayizere yabwiye IGIHE ko yinjiye mu byo kwihangira imirimo atangije ibihumbi bitatu, abikora abitewe n’ubushomeri yabonaga bumwugarije.

Yagize ati “Nize segonderi ndarangiza, mbura ubushobozi bwo gukomeza kaminuza. Mbuze ubushobozi ndavuga nti, ese uwakwiga imyuga ko byamfasha? Njya kwiga, niga iby’ubudozi n’ibi by’ubugeni.”

Ibihumbi bitatu yatangije, yabiguzemo amasaro make, ashaka umwana umwe w’umukobwa amubwira ko azajya amwigisha akamwishyura make.

Bayizere yatangiye aboha ibikapu n’ibindi yicaye hanze ku kirago, rimwe abaturanyi bakamukwena bamwita umunebwe wabuze icyo akora.

Ati “Najyaga nirirwa nicaye hanze nk’abakorodoniye, hanyuma Umurenge uza kumbona umpa iki cyumba mubona, mpita mbona n’undi mwana nigisha baba babaye babiri.”

Yakomeje agira ati “Uko iminsi yashiraga nagendaga mbona abanyeshuri, umpaye bitanu, umpaye icumi nkayafata, ngenda nzamuka gutyo, ibyo bakoze nkabigurisha, nkashaka amasoko ngenda mbona igishoro gutyo.”

Uyu mukobwa kuri ubu afite abakozi barindwi bahoraho bafite amasezerano y’akazi. Yamaze kubona amasoko y’ibyo akora nubwo atari menshi kuko akenshi abigurisha mu mujyi wa Musanze na Rubavu.

Mu mwaka umwe amaze ashinze sosiyete ye, Bayizere amaze kwigurira inka ebyiri ndetse yemeza ko icyo akeneye cyose akigurira.

Ati “Mbere nashoboraga kumara n’ibyumweru bibiri nta mukiriya mbonye, ariko ubu niyo ataza, tuba dufite ibiraka, niyo bataza hano tuba dufite abo dukorera tukabashyira hirya no hino.”

Bayizere avuga ko ibyo amaze kuvana mu kwihangira umurimo birenze kure ibyo yatekerezaga. Atanga urugero rw’uburyo yagiye mu ndege ya RwandAir yarabifataga nk’inzozi.

Ati “Akazi kose kagira aho kagukura naho kakugeza. Abantu bo mu cyaro dukunda kwitinya. Nk’iriya ndege nakoze nayikoze ntarayibona ku maso, nyibona kuri televiziyo gusa, ariko byarangiye nyigiyemo kandi ndi umunyacyaro. Ejo bundi twari turi muri Kenya mu rugendo shuri twateguriwe na Minisiteri y’Urubyiruko.”

Nubwo amaze kugira aho yigeza, Bayizere avuga ko hakiri imbogamizi z’uburyo abanyarwanda batitabira kugura ibyakorewe iwabo no kuba atabasha kubona ibikoresho byose akeneye ku buryo bworoshye no kuba byinshi babikoresha intoki kuko nta mashini zigezweho afite.

Yamfashije Olive, ni umunyeshuri w’imyaka 18 IGIHE yasanze yaje kwimenyereza kuboha kwa Bayizere.

Uyu mukobwa avuga ko yaje nta kintu na kimwe azi, nyamara ubu amaze kumenya kuboha amasakoshi, inigi, ibikapu, kudoda imyenda, imitako n’ibindi.

Yamfashije warangije amashuri abanza gusa, yemeza ko ibyo amaze kumenya bizamufasha kwibeshaho mu minsi iri imbere.

Yagize ati “Nimara kwiga wenda bitewe n’ubushobozi nzaba mfite, ndateganya kugura imashini nkaba ndonda, ibivuyemo nkajya ntegura indi mishinga nzakora nkazamukiraho.”

Bayizere avuga ko mu myaka ibiri iri imbere, yifuza kuzaba afite ubushobozi bwo guha akazi abakozi 30.

Ati “Nta munyeshuri nigishije nifuza ko azajya agenda ngo ajye kwandavura yarize. Ndifuza kuzajya mbagumana bakaba abakozi banjye nubwo naba ntaragira ubushobozi bufatika ariko tukajya tuzamukana.”

Minisiteri y’Urubyiruko yiyemeje gufasha ihangwa ry’imirimo mishya y’urubyiruko igera ku bihumbi ijana mu mwaka w’ingengo y’imari wa 2019/2020, ibinyujije mu gushyikira ba rwiyemezamirimo bakiri bato.

Ni muri gahunda ya Leta y’u Rwanda yo kuba hahanzwe imirimo mishya ingana na miliyoni 1.5 idashingiye ku buhinzi bitarenze 2024 ari nako hatezwa imbere ibyakorewe mu gihugu.

Urubyiruko rutandukanye ruza kwihugura mu budozi n'ububoshyi
Uyu mukobwa afite inzozi zo kongera umubare w'abakozi akoresha
Ibyo Bayizere akora byibanda ku muco nyarwanda
Tumwe mu ducuma dutatse amasaro Bayizere akora
Bayizere avuga ko agifite imbogamizi yo kubona ibikoresho yifashisha nk'imashini n'ibindi
Yamfashije warangije amashuri abanza gusa, yemeza ko ibyo amaze kumenya bizamufasha kwibeshaho mu minsi iri imbere
Bayizere yabaje igihangano kigaragaza indege ya RwandAir atarayigera iruhande, birangira ayigiyemo
Abaza kwimenyereza kwa Bayizere bafite icyizere cyo kuhava bihangira umurimo

Amafoto: Laura Mulkerne


Ibitekerezo

  • uyu mukobwa afite igitekerezo cyiza kandi kirihariye(innovative )n’akomereze aho.
    kera nabonaga inkoni z’abageni zitatseho amasaro ariko sinumvaga uko byakorwaga ,hari n’ubundi bugeni bwa tapisserie bwakorwaga mu bigo by’abihayimana nka za Rwaza ariko byagiye bikendera.
    igitekerezo n’uko yashaka seeds(imbuto z’amasaro bita coix lacryma zera kugati kameze nk’amasaka kandi kagira amasaro meza ameze nk’amashapule.
    imbuto ziraboneka muburyo bworoshye kandi ashobora kujya azihingira aho kugura ariya masaro akoze muri plastique n’ukuvuga ko akoresheje amasaro yera kuri ibyo biti byaba ari Environment Friendly kuko amasaro y’ibiti niyo yaba ashaje arabora decomposition.
    ubundi bavuga ko ayo masaro akomoka muri Birmanie ariko ino ndayabona cyane ayakeneye nazamuhuza n’umukobwa witwa marcela wayakoreshaga yazabona rero muburyo bworoshye imbuto akajya anayihingira.

  • mbere ya byose ndagushimira cyane kugitekerezo cyawe Imana iguhe umugisha none mwampaye nomero yanyu ya telephone iyanjye ni 0785237947 ninayo ya watsap

  • Komerezaho solange.ufite igitekezo cyiza.Urubyiruko rukure amaboko mu mifuka.Nibige kugurukisha amababa yabo ago guhora bateze amaboko!

  • Komerezaho solange.ufite igitekezo cyiza.Urubyiruko rukure amaboko mu mifuka.Nibige kugurukisha amababa yabo ago guhora bateze amaboko!


Tanga igitekerezo


BIGEJEJEYO