Zambia:Kwizihiza umuganura byabaye umwanya wo gutera amatsiko abadaheruka mu Rwanda

Yanditswe na Kanamugire Emmanuel
Kuya 25 Nzeri 2016 saa 03:00
43 29

Abanyarwanda n’inshuti zabo batuye muri Zambia bizihije umunsi w’umuganura, abadaheruka mu Rwanda baratirwa ibyo rwagezeho mu gihe gito rwongeye kwiyubaka.

Zambia ituyemo Abanyarwanda bagiyeyo mu bikorwa byo gushora imari n’abahungiyeyo bose bagera ku bihumbi bitandatu. Ku wa Gatanu tariki ya 23 Nzeri 2016, abasaga 250 bahuriye mu birori byo kwizihiza umunsi w’umuganura, utarizihirijwe mbere kuko igihugu cyari mu myiteguro y’amatora ya Perezida wa Repubulika.

Umuyobozi wa Ambasade y’u Rwanda muri Zambia muri iki gihe(Chargé d’Affaires), Abel Buhungu yabanje gusobanurira abitabiriye uwo munsi inkomoko yawo ndetse n’ uko uhuzwa n’amateka y’ubu.

Yabawiye ko wari umunsi umwami yahaga umugisha umusaruro w’abaturage ukomoka ku buhinzi n’ubworozi, wahuzaga abaturage bagasabana basangira umusaruro wabo guhera mu muryango kugera ku rwego rw’igihugu, bishimira ibyo Imana yatumye baronka.

Uwo muco ngo waje kuzamo kidobya, ubwo abakoloni bageraga mu Rwanda ahagana mu 1900 bakawutesha agaciro, ariko ngo kubera agaciro wari ufitiye Abanyarwanda wongeye guhabwa agaciro.

Umusaruro wishimirwaga icyo gihe ngo ntukiri ushingiye ku buhinzi n’ubworozi gusa , ahubwo ngo hari n’ibindi byinshi u Rwanda rwagezeho bikwiye kwishimira.

Muri byo yavuze ibijyanye n’ubuzima, uburezi, ikoranabuhanga, imikino n’umuco, ubucuruzi, ubucukuzi bw’amabuye y’agaciro, ibikorwa remezo, inganda n’ubukorikori, ubukerarugendo, imibanire myiza n’ibihugu n’ibindi u Rwanda rwagezeho ruhereye ku busa nyuma ya Jenoside yakorewe Abatutsi, aho Abanyarwanda ndetse n’Isi batizeraga ko u Rwanda nk’igihugu cyakongera kuzanzamuka.

Ati “ Ubu nyuma y’imyaka 22 u’Rwanda ni intangarugero mu ruhando mpuzamahanga muri byinshi birimo imiyoborere myiza,Umutekano, ndetse tunasagurira n’Isi mu butumwa bwo kubungabunga amahoro, korohereza ishoramari mu bucuruzi n’ibindi.”

U Rwanda na none ntirwasigaye inyuma mu kwiteza imbere mu bukungu, guharanira uburezi bw’abana barwo, ubuzima bwiza n’imibereho myiza y’abaturage bahabwa ubuvuzi n’ ubwishingizi bw’indwara, ndetse no kugerwaho n’ibyiza by’igihugu biciye mu gusaranganya ubukungu.

Ati “U Rwanda ubu ni igihugu cyubashywe mu ruhando mpuzamahanga. Ngira ngo ibi mvuga byinshi byagiye bigerwaho turabizi ko uretse n’Abanyarwanda, bisigaye binabonwa cyane ndetse bikanavugwa n’abanyamahanga. Ibyo tumaze kugeraho tubikesha ubuyobozi bwacu bwiza kandi budasanzwe. Ubuyobozi budahwema kuduhwitura gukora umurimo unoze, kutinuba, gukora cyane, kwiyubaka kandi ari na ko tunihesha agaciro.”

Abadaheruka mu Rwanda bahawe ikaze

Buhungu yakanguriye Abanyarwanda baba muri Zambia no hirya no hino ku Isi bakanguriwe kwisanga iwabo bakirebera ibivugwayo.

Ati “Ku badaheruka mu Rwanda, kandi ibi ntibivuze imyaka myinshi, ndongera kubamenyesha ko igihugu cyacu kimaze gutera intambwe ishimishije pe. [...]ndifuza kubicisha amatsiko kugira ngo muzigireyo mwirebere kandi munishimire ibyo byiza.”

Kirazira kuba abambasaderi babi

Buhungu ati “Tugomba kurinda umuco wacu,tukabana neza n’abatuye Zambia; tukishakira ndetse ari na ko dushakira igihugu cyacu inshuti. Tugomba no kwitwara neza, tukanubahiriza amategeko y’Igihugu turimo. Ibi nidushobora kubyubahiriza kandi ndabizi ko mubikora, tuzaba twihesheje kandi tunahesheje igihugu cyacu agaciro n’ishema.”

Umunsi w’umuganura wijihijwe mu Rwanda tariki ya 5 Kanama 2016, nyuma ahari Abanyarwanda mu mahanga ugenda uhizihirizwa mu birori byateguwe na za ambasade z’u Rwanda.

Abanyarwanda babyinnye karahava
Abanuyarwanda biyerekanye mu mbyino z'iwabo
Abel Buhungu ageza ubutumwa ku bitabiriye uwo muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE