USA: Abanyarwanda bibukijwe icyo basabwa kugira ngo babe intwari u Rwanda rukeneye

Yanditswe na Mukaneza M.Ange
Kuya 29 Mutarama 2018 saa 08:58
Yasuwe :
0 0

Abanyarwanda batuye muri Leta ya Indiana na Michigan, zimwe mu zigize Leta Zunze Ubumwe za Amerika, bahawe ikiganiro ku butwari, ndetse banasobanurirwa icyo basabwa kugira ngo babe intwari u Rwanda rukeneye muri iki gihe.

Ibi biganiro byabereye mu mujyi wa South Bend muri Leta ya Indiana tariki ya 27 Mutarama 2018, mu gihe u Rwanda rwitegura kwizihiza ku nshuro ya 24, umunsi w’intwari z’igihugu.

Inkuru dukesha One Nation Radio ivuga ko Abanyarwanda babyitabiriye bongeye kuganira ku mateka y’ubutwari mu Rwanda rwa mbere y’ubakolini na nyuma y’aho, aho bibanze cyane ku rugamba rwo kubohora igihugu cyari cyarabaswe na politiki mbi yabibaga amacakubiri.

Umujyanama wihariye mu bya Gisirikare (Defence Attaché) muri Ambasade y’u Rwanda muri Amerika, Brig. Gen Vincent Nyakarundi, wagarutse ku biranga ubutwari; yagaragaje ko buri Munyarwanda aho ari hose ku Isi, akwiye kugira uruhare mu guteza imbere igihugu cye, asigasira ibyubatswe na leta y’ubumwe kugira ngo bizabe umurage mwiza ku bazamukomokaho.

Yakomeje agaragaza ko n’ubwo urugamba rwo kubohora igihugu rutari rworoshye, intsinzi bayigejejweho n’indangagaciro nyarwanda zishingiye ku butwari no kudatezuka ku mugambi wa politiki nziza bari bafite.

Yasubiyemo amagambo yavuzwe na Gen. Maj Fred Rwigema ubwo yatangizaga uru rugamba aho yagize ati “Mu mateka y’u Rwanda, ubuyobozi bubi nibwo bwazanye amacakubiri n’ibindi bibazo byayogoje u Rwanda. Nta wundi wabibohora, Abanyarwanda, uretse Abanyarwanda bakunda igihugu.”

Brig.Gen Nyakarundi yabibukije ko n’ubwo urugamba rw’amasasu rwarangiye n’imbaraga zo kurinda umutekano w’Abanyarwanda zikaba ari ntagereranywa, ubu bagombaga gushishikarira kugira uruhare mu iterambere ry’u Rwanda.

Yabasabye gukomeza gushyira hamwe bubaka umuryango utajegajega, kugira ngo batange umusanzu mu iterambere urwababyaye rubategerejeho.

Umuyobozi w’Umuryango w’Abanyarwanda bibumbiye muri Diaspora ya Midwest, Nxumalo Ruhaya, washimiye Abanyarwanda bitabiriye ibi biganiro na Brig.Gen Nyakarundi ku butumwa bwiza yabagegejeho, nawe yasabye ko barushaho kugira ubufatanye anizeza ambasade gukomeza imikoranire myiza.

Abitabiriye ibi biganiro bagarutse ku bizabafasha gukomeza gusigasira ibyagezweho, aho bashimangiye ko uruhare rw’urubyiruko ari ngombwa kuko arirwo maboko y’ejo hazaza.

Umunsi w’Intwari z’u Rwanda wizihizwa tariki ya 1 Gashyantare buri mwaka. Kuri iyi nshuro ya 24 ufite insanganyamatsiko igira iti “Dukomeze ubutwari, Twubake u Rwanda twifuza.”

Brig.Gen Vincent Nyakarundi yibukije Abanyarwanda baba hanze ko bagomba gutanga umusanzu mu rugamba rw'iterambere u Rwanda rwatangiye
Umuyobozi w’Umuryango w’Abanyarwanda bibumbiye muri Diaspora ya Midwest, Nxumalo Ruhaya (Uwa mbere ibumoso) hamwe n'abandi bari bitabiriye ibi biganiro
Bamwe mu bitabiriye ikiganiro ku butwari byabereye muri Leta ya Indiana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza