Umwihariko w’urubyiruko rwo muri Diaspora mu bikorwa by’iterambere ry’u Rwanda

Yanditswe na Ishimwe Israel
Kuya 21 Ukwakira 2016 saa 10:45
Yasuwe :
0 0

Igikorwa ngarukamwaka cya “Rwanda Day”, gihuza Umukuru w’Igihugu n’Abanyarwanda b’ingeri zose ndetse n’inshuti z’u Rwanda baganira ku ngingo zitandukanye n’imishinga migari ishimangira iterambere rirambye ry’igihugu.

Muri Nzeri uyu mwaka, ku nshuro yayo ya munani, Rwanda Day yabereye mu Mujyi wa San Francisco muri Leta ya California ho muri Leta Zunze Ubumwe za Amerika, yibanda ku biganiro bishimangira ibyiza by’umuco nyarwanda, ikaba yari ifite insanganyamatsiko igira iti ‘Agaciro: Umurage wo kwiyubaha’.

Nkuko bisanzwe bikorwa no muri Rwanda Day zatambutse, abitabiriye iy’uyu mwaka banasobanuriwe Politiki ya Leta n’imigambi yayo mu guteza imbere abaturage bayo, baba ab’imbere mu gihugu no hanze yacyo.

Ibi bijyana no kwereka abanyarwanda b’ingeri zose, by’umwihariko urubyiruko icyerekezo cy’igihugu ndetse n’amateka yacyo bifasha mu guhindura imyumvire y’abari bafite ibitekerezo bibi.

Abenshi mu Banyarwanda batuye muri za Diaspora, biganjemo urubyiruko, baba abavukiye hanze n’abavuye mu Rwanda, bakaba na bo ari imbaraga z’igihugu bafite ejo hazaza hacyo mu biganza byabo.

Rwanda Day y’uyu mwaka yari itandukanye n’izayibanjirije bitewe n’umwihariko yahawe wo kwibanda ku muco gakondo " Rwanda Cultural Day”.

Kuri iyi nshuro yaranzwe n’ubwitabire bw’urubyiruko ruba mu mahanga rwari rwabukereye ruje kumva no kureba ku byiza bihishe mu muco gakondo w’Abanyarwanda ndetse n’umwihariko wawo.

Umuyobozi uhagarariye urubyiruko muri Diapora ya Midwest, Rutsobe Nsengiyumva yatangaje ko ubwitabire bw’urubyiruko bwatewe ahanini n’inyito yari yahawe iki gikorwa.

Yagize ati “ Impamvu nyamukuru yatumye urubyiruko rwitabira cyane, ‘Rwanda Cultural Day’ y’uyu mwaka ni inyito yawo yibanze ku muco gakondo. Urubyiruko rwo mu mahanga rwishimiye cyane igihugu cyarwo aho kigeze ndetse n’umurongo Perezida Paul Kagame yagihaye uganisha ku iterambere riramye.”

Rutsobe yasabye abacikanwe na Rwanda Cultural Day yabereye i San Francisco kuya 24 Nzeri 2016 kuzitabira izindi Rwanda Day kurushaho.

Ati “ Urubyiruko rw’Abanyarwanda ruba muri Amerika rugomba gukoresha amahirwe rufite yo kuba mu gihugu gikomeye, bagakoresha ubunararibonye n’ubushobozi bahaha, haba ubwenge n’amafaranga, maze bakarushaho kugira umutima ukunda igihugu cyabo.”

Urubyiruko rwo muri Diaspora ya Amerika rugira uruhare mu bikorwa bitandukanye biteza imbere igihugu. Mu minsi yashize bakoze ubukangurambaga bwo gushishikariza abantu gushyigikira ihame ry’uburinganire binyuze muri gahunda ya HeForShe, kimwe mu bikorwa byatanze umusaruro bikanatuma u Rwanda rufata umwanya wa mbere ku Isi.

Umuyobozi w'Urubyiruko muri Diaspora ya Amerika, Rutsobe Nsengiyumva, asaba urubyiruko kubyaza umusaruro amahirwe bafite, bakarushaho gukunda igihugu cyabo cy'amavuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244