Kwamamaza

U Rwanda rwitabiriye imurikagurisha ry’indabo mu Buholandi (Amafoto na Video)

Yanditswe kuya 4-11-2016 saa 09:47' na Karirima A. Ngarambe


Bwa mbere, sosiyete Nyarwanda eshatu zihinga zikanacuruza umusaruro w’ibikomoka ku ndabo, zitabiriye imurikagurisha Mpuzamahanga ry’indabo ryabereye mu Mujyi wa Amsterdam mu Buholandi (International Floriculture Trade Fair), bagaragaje umwihariko w’u Rwanda muri iri shoramari.

Iri murikagurisha ry’iminsi itatu ryatangiye tariki ya 2 rirasozwa kuri uyu wa 4 Ugushyingo 2016, ribaye nyuma yaho u Rwanda rwari rumaze gusinyana amasezerano n’abacuruzi bo mu Buholandi ku mikoranire yo kuzajya bakira indabo ziruhingwamo bakazicuruza muri icyo gihugu n’ahandi.

Umwe mu bashoramari baturutse mu Rwanda, Aurore Umubyeyi wari uhagarariye Sosiyete ihinga indabo za roza, Bella Flowers Ltd ikorera i Gishari mu Burasirazuba yashimiye abagize uruhare ndetse bakabatera inkunga yo kwitabira iri murikagurisha.

Yagize ati “Turashimira byimazeyo Ambasade y’u Rwanda mu Buholandi n’Ikigo cy’Igihugu gishinzwe guteza imbere ibyoherezwa mu Mahanga bikomoka ku Buhinzi n’Ubworozi (NAEB) ku bufasha n’inkunga baduhaye kugira ngo tubashe kuza muri iri murikagurisha twerekane ibyo tugezeho. Twishimiye kuryitabira kuko ryadufashije kwagura amarembo y’ibyo dukora mu bice bitandukanye by’Isi ndetse twigira no ku bandi tureba aho bageze kandi tukaganira nabo kuko hari benshi bafite ubunararibonye muri iri shoramari, natwe byadufasha gutera imbere.”

Tariki ya 12 Ugushyingo 2014, nibwo Inama y’Abaminisitiri yemeje ubufatanye bwa Leta y’u Rwanda na Sosiyete Shalimar Flowers Ltd mu gushora imari muri Sosiyete Bella Flowers Ltd mu bijyanye n’ubuhinzi bw’indabo.

Mu bandi bashoramari baturutse mu Rwanda bitabiriye iri murikagurishabarimo harimo Charles Gori Kinsley ushinzwe Iyamamazabikorwa muri Bella Flowers Ltd; Shungo Hudara, Umuyobozi Mukuru muri Bloom Hills Rwanda.

Umuyobozi Mukuru Wungirije w’Ikigo cy’Igihugu gishinzwe guteza imbere ibyoherezwa mu Mahanga bikomoka ku Buhinzi n’Ubworozi (NAEB), Urujeni Sandrine yatangaje ko yishimiye kuba bitabiriye iri murikagurisha.

Yagize ati “Tunejejwe cyane no kuba twarateguye iki gikorwa none kikaba gisohoye, tukaza muri iri murikagurisha bwa mbere. Twazanye n’abashoramari batatu batangiye kohereza indabo zabo hanze. Kwitabira iri murikagurisha byaduhaye kumenya igipimo cyaho tuvuye n’aho tugeze, dufite icyizere rwose ko indabo zacu mu minsi itari mike zizatuzanira amadovize nk’uko tubyifuza kandi tukanakomeza kumenyekana mu ruhando rw’amahanga mu bikorwa nk’ibi ndetse no mu bindi dukora.”

Ambasaderi w’u Rwanda mu Buholandi, Jean Pierre Karabaranga, yatangaje ko ari intambwe ikomeye igihugu giteye yo kohereza sosiyete zitunganya kandi zigacuruza indabo mu imurikagurisha mpuzamahanga ryo kuri uru rwego.

Ati “Ni ibintu by’agaciro cyane kuko biraza gutuma u Rwanda rumenyekana nk’igihugu gishobora guhinga no gucuruza indabo nziza kandi zishobora no kujya mu mapiganwa nk’aya mpuzamahanga.”

Amb. Karabaranga akomeza avuga ko indabo zamuritswe zivuye mu Rwanda zakunzwe cyane kandi ko yizera ko ubutaha, amatsinda azihinga akanazigurisha azarushaho kwiyongera.

Ubuhinzi bw’indabo ni ishoramari ryunguka kandi rimaze guhabwa agaciro mu Rwanda, kuko rishobora kwinjiza amadovize mu gihugu, ndetse n’Abanyarwanda batari bake rikabaha imirimo.

U Rwanda muri gahunda ya EDPRS ya II, mu 2018 rwifuza kohereza indabo zinjiza amadovize agera kuri miliyoni 104 z’amadorali ya Amerika.

Ambasaderi Karabaranga Jean Pierre(uwa gatatu uhereye ibumoso), Urujeni Sandrine (uwa gatatu uturutse iburyo), n'abandi bashoramari baturutse mu Rwanda mu imurikagurisha mpuzamahanga ry'indabo
Stand ya NAEB iri mu zasuwe cyane
Abantu benshi bishimiye indabo za Sosiyete ya Bella Flowers
Aho Bloom Hills Rwanda yamurikiye ibikorwa byayo
Iri murikagurisha ryitabiriwe n'ibihugu bitandukanye birimo na Ethiopia

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved