Kwamamaza

Turikiya: Abanyarwanda n’inshuti zabo bakoze umuganda banizihiza n’umuganura

Yanditswe kuya 31-08-2016 saa 19:05' na Karirima A. Ngarambe


Abanyarwanda n’ishuti z’u Rwanda batuye muri Turukiya, ku cyumweru taliki ya 28 Kanama 2016 bahuriye mu gikorwa cy’umuganda bongera gutera ibiti ahantu umujyi wa Kecioren wo muri Ankara wahaye Abanyarwanda ngo bahatere ibiti, ndetse hanahabwa izina rya Rwanda Park.

Abanyarwanda kandi buhiye ibiti byari byaratewe mbere ndetse bakora n’isuku muri iyo Park yitiriwe u Rwanda.

Iki gikorwa cyayobowe na Williams Nkurunziza, Ambasaderi w’u Rwanda muri Turikiya, ndetse kinitabirwa na Barbaros Kaya, Umuyobozi ushinzwe Ububanyi n’Amahanga mu mujyi wa Kecioren ndetse n’abandi bakozi b’umujyi wa Kecioren.

Igikorwa cyo gutera ibiti muri Turikiya, kiri muri bimwe mu by’ingenzi umuryango w’abanyarwanda (RCT) ubifashijwemo na Ambasade y’u Rwanda, bihaye mu rwego rwo gusangiza inshuti z’u Rwanda bimwe mu bikorwa by’umwimirere by’u Rwanda byafashije mu gukemura bimwe mu bibazo sosiyete Nyarwanda yahuraga na byo.

Atangiza igikorwa cy’umuganda, Ambasaderi Williams Nkurunziza yashimiye umujyi wa Kecioren ku bufatanye bwawo n’umuryango w’abanyarwanda ndetse no kuba barageneye abanyarwanda agace bazajya bateramo ibiti kiswe Rwanda Park.

Ambasaderi Nkurunziza yasabye ko ubu bufatanye bwakomeza gutera imbere ndetse anaboneraho gutumira Umuyobozi w’Umujyi wa Kecioren kuzasura u Rwanda akazatera na we igiti mu Rwanda.

Asobanura akamaro k’umuganda, Ambasaderi Nkurunziza yagize ati "Igikorwa nk’iki cy’umuganda gikorwa n’abanyarwanda buri kwezi, ndetse akaba ari igikorwa gifitiye akamaro igihugu cyacu cy’u Rwanda mu iterambere rusange ariko giha umwanya Abanyarwanda guhura nyuma y’umuganda bakaganira bungurana ibiterezo ku bibazo bibareba, bakabishakira ibisubizo."

Umuyobozi ushizwe Ububanyi n’Amahanga mu mujyi wa Kecioren, Barbaros Kaya, yashimye abanyarwanda batuye muri Turikiya ndetse ashima cyane Ambasade y’u Rwanda ku gikorwa cyo gutera ibiti muri Kecioren no kuba barahisemo kugirana umubano n’umujyi wa Kecioren, ndetse yizeza abanyarwanda ko ububufatanye hagati yabo buzakomeza.

Nyuma y’igikorwa cy’umuganda, abanyarwanda n’ishuti z’u Rwanda, bakomereje mu gikorwa cyo kwizihiza umuganura, cyaranzwe no kwishimira ibyo igihugu cyagezeho hanishimirwa kandi n’ibyo abanyarwanda batuye muri Turikiya bagezeho birimo abanyarwanda 11 barangije amasomo yabo bamwe bakaba baratashye mu Rwanda gufatanya n’abandi kubaka igihugu, abandi bakaba bakora muri Turikiya ndetse hakaba hari n’abakomeje kongera ubumenyi muri Turikiya cyangwa ahandi.

Ambasaderi Nkurunziza yibukije amateka ndetse n’akamaro k’umuganura, aho buri muryango, sosiyite ndetse n’igihugu, bishimira umusaruro wabonetse mu buhinzi, ubworozi, ndetse no mu bindi bice nk’uburezi, ikoranabuhanga n’ibindi.

Abanyarwanda baba mu gihugu cya Turikiya biyemeje koroza no gushakira ubwisungane mu kwivuza bamwe mu banyarwanda batishoboye, aho bemeje ko hazorozwa imiryango 3 hakanatangwa ubwisungane mu kwivuza ku bantu 300.

Bifuje ko iki gikorwa cyo kuremera abatishoboye cyazaba muri bimwe bizishimirwa ko byagezweho mu gihe bazaba bizihiza umuganura w’ubutaha.

Abanyarwanda n’ishuti zabo basabanye ndetse banaha abana amata, ari na ko bafatanya mu gutarama kinyarwanda.

Ambasaderi Williams Nkurunziza yifatanyije n'abanyarwanda bo muri Turukiya mu gutera ibiti
JPEG - 85.8 kb
Abanyarwanda n’inshuti zabo basangiye amafunguro bizihiza Umuganura
Abana bato bahawe amata yo kunywa nka kimwe mu biranga Umuganura
Nyuma yo gusangira bacinye akadiho kinyarwanda

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved