U Burusiya: Abanyarwanda bizihije Umuganura basabwa kutizigama mu guteza imbere igihugu

Yanditswe na Uwishyaka Jean Louis
Kuya 1 Nzeri 2016 saa 08:18
Yasuwe : XX
0

Abanyarwanda batuye mu Burusiya hamwe n’inshuti zabo bizihije umunsi w’Umuganura ku wa 31 Kanama 2016, mu muhango wabereye ku cyicaro cya Ambasade y’u Rwanda muri iki gihugu.

Ambasaderi w’u Rwanda mu Burusiya, Dr. Mujawamariya Jeanne d’Arc yibukije abari bitabiriye ibyo birori amateka y’umunsi w’Umuganura, asobanura ko wabayeho guhera mu kinyejana cya 9, ukaba wari umwe mu migenzo myiza yo gusigasira no kubumbatira umuco w’ubumwe bw’abanyarwanda.

Yagize ati "Umuganura wari umunsi ukomeye haba i Bwami no mu miryango y’abaturarwanda bose. Wari umunsi umwami yamurikirwaga umusaruro w’abanyarwanda bavuye impande zose z’igihugu ku manywa, ku mugoroba akishimana na bo mu gitaramo cyitwaga icy’Umuganura. Wari kandi n’umwanya wo kwishimira umusaruro, gushimira abakoranye ingoga kugira ngo wiyongere, babaye indashyikirwa bakabishimirwa ndetse n’ababaye ba nta mwete bakagawa mu rwego rwo kubahwitura."

Yabibukije ko kwizihiza umuganura ari ubukungu ntagereranywa umuco w’u Rwanda wifitemo bityo abanyarwanda bose bakaba basabwa kuwushingiraho mu gushyira mu bikorwa gahunda zitandukanye z’iterambere, zirimo Girinka, kwihaza, kwigira n’ibindi.

Ambasaderi Dr. Mujawamariya yaboneyeho kandi umwanya wo kwibutsa abari bitabiriye ibyo birori gusubiza amaso inyuma bakareba aho bavuye, basuzuma aho bageze ndetse banazirikana n’icyerekezo cy’u Rwanda, buri wese asuzuma ko imihigo yahize yeshejwe neza, bityo ahagaragaye intege nke hakongerwa imbaraga.

Yavuze ko abanyarwanda bakwiye gushyira hamwe bashaka icyateza igihugu cyabo imbere, bubakira ku ndangagaciro nyarwanda, bigira ku byiza basanze mu gihugu barimo ngo bateze imbere igihugu cyababyaye.

Ati "Imihigo ya buri wese kandi igomba kuba migari kumuruta we ubwe, buri wese akigenga mu gukora igenamigambi, intego ikajyana n’imihigo y’igihugu cyacu, icyo buri wese ashoboye gukora kugira ngo u Rwanda rukomeze rwese imihigo mu ruhando mpuzamahanga ntajijinganye."

"Uwiga yige neza, ukora akore neza kandi vuba, ntitukabe abanebwe bari aho bategereje ko mwarimu adukorera byose, cyangwa ko mwarimu asohoka ngo natwe tugende. Mwarimu hano azi aho igihugu cye kigeze mu iterambere, wowe nanjye tuzi aho igihugu cyacu cy’u Rwanda kigeze cyiteza imbere, ahubwo uruhare mbigiramo ni uruhe?"

Umwe mu nshuti z’u Rwanda wari witabiriye uyu muhango, yashimiye u Rwanda n’abanyarwanda uburyo bakomeje kugaragaza ubudasa mu kubungabunga umuco wabo no gusabana n’inshuti. Yasabye ko abanyarwanda bakomeza gusigasira umuco wabo kuko ari wo muzi w’ubumuntu no kwitwa umunyarwanda.

Muri uyu muhango kandi bagize umwanya wo guha amata abana nka kimwe mu bikorwa biranga umunsi w’umuganura ndetse n’abandi bari aho bakaba basabanye.

Insanganyamatsiko y’Umunsi w’umuganura uyu mwaka, igira iti“Twubakire ku muco, Twiteze imbere”.

Abitabiriye ibi birori bagize umwanya wo gusabana
Amwe mu mafunguro ateguye kinyarwanda yagaragaye mu birori by'umuganura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza