Kwamamaza

Misiri: Abanyarwanda basanze umuganura ukomeje kuba isoko y’ubumwe bwabo

Yanditswe kuya 27-08-2016 saa 17:39' na Ezechiel Mbananabo


Abanyarwanda baba mu Misiri hamwe n’inshuti z’u Rwanda muri icyo gihugu bizihije umunsi w’umuganura bibukiranya ku mateka yawo ndetse n’uruhare ufite mu bumwe bw’Abanyarwanda, mu ijoro rishyira kuri uyu wa Gatandatu.

Uyu muhango wabereye mu icumbi rya Ambasaderi ahitwa Darah Gardens mu majyaruguru y’umujyi wa Cairo.

Ubundi Umuganura wari umunsi mukuru ukomeye mu muco w’Abanayarwanda haba i Bwami no ku baturarwanda, umwami akamurikirwa umusaruro w’abanyarwanda bavuye impande zose z’igihugu,agasangira na bo mu gitaramo.

Uyu muganura ariko wagiraga n’undi mumaro wo kuzirikana umwami nka Nyir’uburumbuke bakamutura urutete rw’imyaka yeze.

Wakomeje gukorwa no mu yindi myaka yakurikiye ubutegetsi bw’umwaduko w’abazungu,ariko wagiye uhindurirwa inyito n’uburyo bwo kuwizihiza.

Ubwo Abanyarwanda baba mu Misiri bizihizaga umuganura ,Ambasaderi w’u Rwanda mu Misiri, Sheikh Habimana Saleh, yatangaje ko nyuma yo kwibukiranya ku mateka yawo, no gusesengura insanganya matsiko y’uyu mwaka, basanze ukomeje kuba isoko y’ubumwe bw’Abanyarwanda .

Insanganyamatsiko y’uyu mwaka igira iti “Twubake Umuco,Twiteze imbere.”
Yagize ati “Nta vangura rikirangwa mu Rwanda, kandi Abanyarwanda babanye neza bitigeze bibaho.”

Ku bijyanye no kuba umuganura ari inkingi yo kwigira, ngo basanze kuba u Rwanda rufite inzu iri mu icumi zihenze muri Afurika kuri bo bishimishije cyane.

Yakomeje agira ati “Umuganura wahuzaga Umwami na rubanda, dushimishwa n’uko Perezida wa Repubulika ahura na rubanda kenshi mu mwaka.”

Ubwo wizihizwaga mu Rwanda uyu mwaka tariki ya 5 Kanama 2016, Minisitiri w’umuco na Siporo, Uwacu Julienne, yavuze ko umuco w’Abanyarwanda uhishe byinshi u Rwanda rwubakiyeho kandi ruzakomeza no kubakiraho mu rugendo rwo kwiteza imbere, kwigira no kwihesha agaciro no kubaka ubunyarwanda buhamye.

Bivugwa ko umuganura watangiye kwizihizwa mu Rwanda ku Ngoma ya Gihanga Ngomijana mu kinyejana cya cyenda , hanyuma uza kongera guhabwa imbaraga na Ruganzu II Ndoli (1510-1543) ubwo yabohoraga u Rwanda nyuma y’imyaka irenga 15 ruri mu maboko y’abanyamahanga (Abanyoro n’Abanyabungo).

Ku rwego rw’Igihugu,Umuganura wayoborwaga n’Umwami afashijwe n’abanyamihango b’umuganura, naho ku rwego rw’umuryango, umukuru w’umuryango akaba ari we wayoboraga iyo mihango.

Ku munsi w’umuganura, abayobozi basabanaga n’abayoborwa mu gitaramo cy’imihigo, abana bagasabana n’ababyeyi.Ni muri icyo gitaramo cy’umuganura hamurikagwa ibikorwa by’indashyikirwa (inka nziza, umusaruro ushimishije…) maze abakoze neza bagashimwa, ibigwari bikagawa.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved