Ku nshuro ya mbere, Abanyarwanda batuye muri Congo bahuriye mu gikorwa cy’umuganda

Yanditswe na IGIHE
Kuya 2 Kanama 2017 saa 09:20
Yasuwe :
0 0

Ambasade y’u Rwanda muri Congo Brazzaville ifatanije na diaspora nyarwanda muri icyo gihugu ndetse n’ubuyobozi bw’umujyi wa Bacongo, bateguye ku nshuro ya mbere igikorwa cy’umuganda.

Muri uyu muganda Ambasaderi w’u Rwanda muri Congo Brazzaville, Habyalimana Jean Baptiste, yongeye kwibutsa abanyarwanda baba muri iki gihugu uruhare rwabo mu kwimakaza umuco mwiza wo guteza igihugu barimo imbere, babasangiza indangagaciro z’ubunyarwanda harimo n’isuku.

Iki gikorwa cyabereye mu gace ka Bacongo, ari nako Ambasade y’u Rwanda iherereyemo, cyateguwe kandi mu rwego rwo kwitegura neza amatora y’umukuru w’igihugu ateganijwe tariki 3 Kanama 2017, hakorwa isuku mu nkengero z’ahazatorerwa.

Umuyobozi wa Bacongo, Dr Simone Loubienga, yavuze ko yishimiye kubona Ambasade y’u Rwanda yegera ubuyobozi ahagarariye, isaba ko hakorerwa umuganda ati "Byaradushimishije kandi nanejejwe no kubona n’abaturage babyumvise, kuko hari abitabiriye ki gikorwa."

Bamwe mu baturage b’Abanyekongo bari bitabiriye iki gikorwa bavuze ko bashimishijwe n’uburyo abanyarwanda bitabiriye iki gikorwa banavuga ko batangajwe no kubona bagikorana umwete ndetse banashyizeho umutima, kandi mu by’ukuri badatuye muri aka gace, bashima umuco abanyarwanda bafite maze biyemeza kuwugira uwabo.

Nyuma y’umuganda, Ambasaderi Habyalimana yashimiye buri wese witabiriye iki gikorwa, anibutsa diaspora nyarwanda uruhare rwayo mu kwitorera umukuru w’igihugu, anabasaba kuzitabira amatora azabera kuri ambasade tariki 3 Kanama 2017.

Iki gikorwa cy’umuganda cyitabiriwe n’abasaga 100 biganjemo diaspora nyarwanda.

Ambasaderi w'u Rwanda muri Congo Brazzaville, Habyalimana Jean Baptiste

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza