Israel: Abanyarwanda n’inshuti z’u Rwanda bifatanyije kwizihiza umunsi wo Kwibohora

Yanditswe na HABIMANA James
Kuya 6 Nyakanga 2019 saa 02:33
Yasuwe :
0 0

Ambasade y’u Rwanda muri Israel yifatanyije n’umuryango w’abanyarwanda baba muri iki gihugu n’inshuti z’u Rwanda, kwizihiza imyaka 25 abanyarwanda bamaze bibohoye.

Iki ni igikorwa cyabereye muri hotel Sheraton iherereye mu murwa mukuru wa Tel Aviv.

Ambasaderi w’u Rwanda muri Israel, Col Joseph Rutabana yashimiye ingabo zahoze ari iza RPF-Inkotanyi zari zirangajwe imbere na Perezida Paul Kagame, kuba zarahagaritse Jenoside yakorerwaga Abatutsi.

Col Rutabana yabwiye abitabiriye uyu muhango amateka yatumye u Rwanda rugera ku iterambere rikomeye mu myaka 25 ishize, byaba mu buryo bw’ubukungu ku buryo u Rwanda ubu ruri mu bihugu birimo gutera imbere cyane ku Isi.

Yababwiye iby’uruzinduko rw’umuyobozi mukuru muri Minisiteri y’Ububanyi n’amahanga muri Israel, Amb. Yuval Rotem aherutsemo mu Rwanda, aho yakiriwe na Perezida Paul Kagame, akanahafungura ambasade y’iki gihugu.

Ambasaderi Rutabana yagaragarije abitabiriye uyu muhango ibyerekeye ingendo z’indege za Rwandair ziva i Kigali- zerekeza Tel Aviv, ashimira Israel uburyo ikomeje gutsura umubano n’u Rwanda.

Minisitiri w’itumanaho muri Israel, David Amsalem yashimye imibanire iri hagati y’ibihugu byombi, avuga ko ibi bigaragarira mu bufatanye buhari nk’ingendo zikorwa n’abayobozi bakuru b’ibi bihugu no hagati y’abaturage.

Yavuze ko ambasade iki gihugu cyafunguye mu Rwanda ariyo ya mbere cyari gifunguye muri Afurika mu myaka 10 ishize, ibi bikaba bigaragaza ikimenyetso n’umumaro Israel ibona mu mibanire n’u Rwanda.

Yagize ati “Kuba Rwandair yaratangije ingendo zigana muri Israel ni uburyo bwo kwagura ubufatanye mu by’ubukungu, ubukerarugendo n’umubano hagati y’abaturage, bikanagaragaza ubufatanye hagati ya Israel n’u Rwanda ko bukomeje kwiyongera.”

Yavuze kandi ko ubufatanye buri hagati y’ibihugu byombi bushingiye ku mateka mabi ibi bihugu byaciyemo, n’uburyo ibi bihugu byahisemo gukomeza kureba imbere no kuva muri ibi bibazo, kubaka ibihugu byabo mu gihe gito ubu bikaba byarabaye intangarugero ku Isi.

U Rwanda na Israël byatangiye imibanire mu 1962 ubwo rwabonaga ubwigenge. Mu 2014 u Rwanda rwabaye igihugu cya mbere muri Afurika cyasinyanye amasezerano y’umubano na Israël ndetse mu 2015 rutangiza ambasade ifite icyicaro i Tel Aviv.

Ambasaderi Col Joseph Rutabana yashimye ubutwari bw'ingabo zari iza FPR Inkotanyi zabohoye u Rwanda
Ambasaderi Rutabana (iburyo) na Minisitiri Amsalem mu busabane ku munsi wo kwibohora
Abanyamahanga bakiranywe urugwiro mu birori byo kwizihiza umunsi wo kwibohora
Ambasaderi Rutabana yagaragarije abitabiriye uyu muhango ibyerekeye ingendo z’indege za Rwandair ziva i Kigali- zerekeza Tel Aviv, ashimira Israel uburyo ikomeje gutsura umubano n’u Rwanda.
Byari ibyishimo hishimirwa umubano mwiza uri hagati ya Israel n'u Rwanda
Wabaye umunsi w'ubusabane ku banyarwanda n'inshuti z'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza