Kwamamaza

Diaspora Nyarwanda irakataje mu kwagura ubucuruzi bw’ibikorerwa mu Rwanda

Yanditswe kuya 6-08-2016 saa 17:53' na Karirima A. Ngarambe


Ibihugu byinshi ku Isi byakungahajwe n’abaturage babyo baba mu mahanga, kubera ubumenyi n’uburyo bagera ku masoko mpuzamahanga bakanahamurika ibyo mu bihugu bakomokamo.

Muri iyi minsi, umuryango w’Abanyarwanda baba mu mahanga ukomeje gutanga ubufasha bwose bugamije kugabanya ubukene mu muryango Nyarwanda, ndetse no ku bukungu rusange bw’igihugu, binyuze mu ishoramari.

Alice Cyusa, Umuyobozi w’ihuriro rya Diaspora nyarwanda yagaragaje uruhare rw’Abanyarwanda baba mu mahanga mu iterambere rusange ry’igihugu.

U Rwanda nk’igihugu kidakora ku nyanja,kizitirwa no kugera ku masoko mpuzamahanga, ndetse n’amahirwe ari mu kwihangira imirimo itandukanye yambukiranya imipaka akagenda aba make.

Iyi ntero isa n’iy’Abanyarwanda baba muri Diaspora Nyarwanda mu bihugu bitandukanye bavuga ko biyemeje kugira uruhare muri gahunda zigamije kurandura ubukene barushaho kwagura ibikorwa by’ishoramari aho bavuka.

Izi Diaspora Nyarwanda zivuga ko byatumye zitekereza uko zabera amahirwe igihugu, hakabaho imikoranire ku masoko mpuzamahanga abanyarwanda babasha kugeraho, bagakangurira abashoramari baho kuza mu Rwanda.

Ibikorwa byo kubyaza umusaruro aya mahirwe byanamaze gutangira, kuko mu biruhuko byo muri Nyakanga uba ari umwanya kuri bamwe wo kugaruka mu gihugu cyabo, bityo binyuze mu Ihuriro ry’Abanyarwanda baba mu mahanga, RDGN (Rwanda Diaspora Global Network) bakora ku buryo batanga umusanzu mu iterambere ry’igihugu.

Iri huriro rivuga ko ryateje imbere ubucuruzi hagati y’u Rwanda n’ibihugu babamo, ndetse ibigo by’ubucuruzi by’imbere mu gihugu bibona amahirwe ashingiye ku mikoranire akomoka kuri Diaspora zo mu bice binyuranye.

Abashinzwe guhugura abandi mu byerekeye ishoramari(Business) muri Diaspora bafatanyije na RDGN batangaza ko basuye inganda zikora ibicuruzwa mu Rwanda, bagamije gusobanikirwa imikorere yazo, kureba imbogamizi zaba zihura nazo mu kogereza ibicuruzwa mu mahanga no kuzibera abaranga ku masoko y’ibihugu babamo n’ibyo bazageramo.

Kuri ubu u Rwanda rufite imiryango ya Diaspora ikomeye ku migabane yose, zose zihurira hamwe mu gihe hari ingingo ikomeye zigiye kwigaho, ndetse abazigize bagira uruhare mu bikorwa bifite ingaruka ku buzima bw’igihugu nk’amatora, iterambere ry’ubukungu n’ibindi.

Uruhare rwa Diaspora mu gufasha abaturage b’ibihugu bakomokamo kwiteza imbere, rugaragarira mu byo boherereza inshuti n’imiryango, ishoramari rikorwa, no kugira uruhare mu gutanga amakuru ku masoko mpuzamahanga banashaka abakiriya b’ibikorerwa mu bihugu bakomokamo.

Mu kwezi gushize ku bufatanye bw’Ihuriro RDGN) na Sosiyete DBI (Diaspora Business Incubator) igamije guteza imbere ubucuruzi n’ishoramari rya Diaspora Nyarwanda, bakoreye urugendoshuri mu Rwanda rugamije guteza imbere no gushyigikira ibicuruzwa bikorerwa mu Rwanda (Made In Rwanda Products).

Ingendoshuri bakoreye mu nganda zitandukanye, harimo urwo bakoreye mu ruganda rukora imashini n’ibindi bikoresho by’ikoranabuhanga rwa Positivo GBH, Sosiyete y’abagore irangura kandi igacuruza ibicuruza ku masoko mpuzamahanga (WIEN - Women Importers and Exporters Network) n’uruganda rukora ifu rwa Kinazi Cassava Plant, ndetse n’uruganda PHARMALAB rukora ibikoresho byo muri Laboratwari.

Izo ngendoshuri zose zari zigamije kurushaho kumenya ibicuruzwa bikorerwa mu Rwanda, bityo bikabafasha gufatanya n’abandi Banyarwanda bose, gukomeza kubimenyekanisha hirya no hino aho batuye.

Mbere yuko basoza icyiruhuko cyabo, Umuyobozi mukuru wa Sosiyete DBI Jabo Butera, yavuze ko iyo sosiyete yatoranyije bimwe mu bicuruzwa bikunze koherezwa mu mahanga, igakora " Diaspora Made-In-Rwanda Promotional Kit" igamije kubimenyekanisha.

Akomeza avuga ko bazakomeza kubyamamaza no gushishikariza abacuruzi b’ibikomoka muri Afurika, bakorera mu bihugu abo bagize Diaspora Nyarwanda babamo.

Alice Kabagire Cyusa, umuyobozi w'ihuriro rya Diaspora Nyarwanda ku isi

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved