Centrafrique: Abari mu butumwa bw’amahoro bwa LONI bizihije umunsi mukuru wo #Kwibohora25

Yanditswe na IGIHE
Kuya 6 Nyakanga 2019 saa 08:32
Yasuwe :
0 0

Tariki ya 04 Nyakanga 2019, Abanyarwanda baba mu gihugu cya Centrafrique, ingabo z’u Rwanda, abapolisi n’abacungagereza bari mu butumwa bwo kubungabunga amahoro muri icyo gihugu bifatanyije n’ Abanyarwanda bose ndetse n’inshuti zabo kwizihiza ku nshuro ya 25 umunsi mukuru wo Kwibohora.

Ibi birori byabereye mu kigo cya Socatel M’poko, ahari icyicaro cy’ingabo z’u Rwanda ziri mu butumwa bwo kubungabunga amahoro n’umutekano mu gihugu cya Centrafrique.

Abitabiriye ibi birori barimo Minisiti w’ingabo w’igihugu cya Centrafrique wari n’umushyitsi mukuru, intumwa yihariye y’umunyamabanga mukuru w’Umuryango w’Abibumbye Mankeur Ndiaye, bamwe mu bagize Inteko Ishinga Amategeko muri iki gihugu n’abandi.

Umuyobozi w’ingabo z’ u Rwanda ziri mu butumwa bwo kubungabunga amahoro muri Centrafrique Lieutenant Colonel Vincent NTAZINDA yagaragarije abitabiriye ibi birori impamvu y’umunsi mukuru wo kwibohora, anabashimira ubushake bagize bwo kwifatanya n’abanyarwanda muri rusange kwizihiza uyu munsi ku nshuro ya 25.

Yavuze ko nyuma yo kwibohora ingoma y’igitugu yagejeje u Rwanda kuri Jenoside yakorerwe abatutsi mu 1994, igihugu cyayobowe mu nzira ikigeza ku mutekano ndetse n’ubumwe n’ubwiyunge by’abanyarwanda ari nabyo shingiro ry’iterambere abaturarwanda bafite uyu munsi.

Yashimangiye ko u Rwanda ruzakomeza gufasha ibihugu birangwamo ibibazo by’umutekano muke ukomoka ku ntambara n’amakimbirane kwiyubaka no kurinda abahutazwa nabyo binyuze mu busabe bw’umuryango w’abibumbye.

Minisitiri w’ingabo muri Centrafrique, Marie Noelle KOYARA, yashimye ubutwari bwaranze ingabo z’u Rwanda, avuga ko ubunyamwuga n’ikinyabupfura biziranga ari urugero rwiza ingabo za Centrafrique zikwiye kwigiraho.

Yagize ati “URwanda rwanyuze mu bihe bikomeye ariko rwabashije kubyikuramo. Ni amateka ajya gusa n’intambara zitandukanye igihugu cyacu cyanyuzemo akaba ari yo mpamvu dukwiye kwigira ku butwari no gukunda igihugu byaranze ingabo zari ziyobowe na Nyakubahwa Perezida w’u Rwanda Paul Kagame kugira ngo natwe tubashe kugera ku mahoro arambye n’ubumwe bw’abaturage bose.”

Ibi birori kandi byizihijwe no muri Sudan y’Epfo aho abanyarwanda bari mu butumwa bwa LONI bugamije kubungabunga amahoro n’umutekano muri iki gihugu (UNMISS) by’umwihariko abari muri Malakal , bifatanyije n’abakozi b’umuryango w’abibumbye, inzego z’ubuyobozi, inshuti z’u Rwanda n’abaturage b’iki gihugu kwizihisa isabukuru y’imyaka 25 u Rwanda rumaze rwibohoye.

Ingabo z’u Rwanda, abapolisi n’abacungagereza bari mu butumwa bwo kubungabunga amahoro muri icyo gihugu bifatanyije n’ Abanyarwanda bose ndetse n’inshuti zabo kwizihiza ku nshuro ya 25 umunsi mukuru wo Kwibohora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza