Berlin: Abanyarwanda bibukiye Jenoside yakorewe Abatutsi ku rwibutso rw’iyakorewe Abayahudi

Yanditswe na Karirima A. Ngarambe
Kuya 13 Mata 2018 saa 04:16
Yasuwe :
0 0

Abanyarwanda n’inshuti zabo mu Budage bitabiriye ibikorwa byo kwibuka Jenoside yakorewe Abatutsi, byabereye ku rwibutso rw’amateka y’iyakorewe Abayahudi ruri i Berlin, Topography of Terror.

Uyu muhango wabaye ku wa 7 Mata 2018 witabiriwe n’abahagarariye ibihugu byabo, abarimu bo muri za kaminuza, abakozi bo mu miryango itegamiye kuri leta n’abandi.

Ambasaderi w’u Rwanda mu Budage, Igor César , yasobanuye ko kwibukira kuri ’Topography of Terror’, urwibutso rugaragaza uburyo Jenoside yakorewe Abayahudi mu Budage yateguwe, ari uburyo bwo gufatanya n’abandi bagize amateka ya jenoside, kurwanya ingengabitekerezo yayo, gupfobya no guhakana bigenda bigaragara henshi; rukaba ari urugamba rureba Isi.

Hashyizwe indabo kuri urwo rwibutso, hanunamirwa abazize Jenoside yakorewe Abatutsi.

Ambasaderi César yashimiye abantu bose bifatanyije n’Abanyarwanda mu kwibuka, igikorwa gifite inyigisho ikomeye ku batuye Isi bose.

Yagize ati “Kwibuka ni ngombwa kuko ari umwanya wo gutekereza ku mateka mabi yabaye bityo tugasubiza agaciro abavukijwe ubuzima kubera ubwoko bwabo no kwifatanya n’abarokotse tukababa hafi muri ibi bihe bikomeye. Mu gihe imyaka 24 irangiye Leta ifatanyije n’abarokotse bagishakisha imibiri yabazize Jenoside yakorewe Abatutsi ngo ishyingurwe mu cyubahiro, ibi bikaba bigaragaza uburyo yateguwe ikanashyirwa mu bikorwa.”

Dr. Thomas Lutz wari uhagarariye urwibutso rwa ’Topography of Terror’ we yagize ati “Twifatanyije n’abanyarwanda mu kwibuka abanyu bazize Jenoside yakorewe Abatutsi, kandi kwibuka ni umurage mwiza utuma amateka adasibangana, akaba ari nayo mpamvu urwibutso rwa Topography of Terror rwubatswe kugira ngo hasigasirwe amateka ya Jenoside yakorewe Abayahudi, abato bashobore kumenya ibyabaye no kwirinda amahano nkayo.”

Mu bindi biganiro, Gakwaya Albert, Umu -Psychologist akaba n’umunyamuryango wa Ibuka-Belgique, yavuze ko kwibuka bivura ibikomere by’ihungabana rya jenoside n’izindi ngaruka zishamikiyeho.

Mu gusigasira amateka, Umubyeyi Jeanne Jansen warokotse Jenoside yakorewe Abatutsi, utuye mu Budage aho yageze afite imyaka 10, yagize ati “ababyeyi banjye n’abo twavukanaga bishwe bose bazira uko bavutse, mu gihe njye nari mfite imyaka umunani ariko aya mateka ntiyamperanye nagerageje kwiyubaka, ubu nkaba narafashe iya mbere mu kuyamenyekanisha, kuko mbona ko nta wundi wabinkorera, ni inshingano kuko hari abandi batagize aya mahirwe ngomba kubera ijwi.”

Ambasaderi César yagarutse ku nsanganyamatsiko y’uyu mwaka igira iti “Twibuke Twiyubaka”, agaragaza ko u Rwanda rwafashe umugambi wo kunga Abanyarwanda, kugarura amahoro n’umutekano himakazwa gushaka ibisubizo bishingiye ku muco n’indangacaciro nyarwanda.

Yanavuze ko u Rwanda rwiyemeje gukomeza guharanira gukurikirana abakoze Jenoside rufatanyije n’ibihugu bibacumbikiye, bagashyikirizwa ubutabera.

Prof. Dr. med. Klaus Püschel, Umwarimu wa kaminuza yitwa “University Medical Center Hamburg”, yatanze ikiganiro kijyanye no kubika ibimenyetso bya jenoside, avuga ko bisaba ko imibiri ibikwa neza mu kurinda ibimenyetso byivugira mu guhangana n’abapfobya cyangwa bahakana Jenoside yakoreye Abatutsi.

Iyi kaminuza ifitanye umushinga na Komisiyo yo kurwanya Jenoide mu kwita ku rwibutso rwa Jenoside rwa Murambi.

Valentin Hategekimana, Umunyamategeko mu bijyanye n’Ikiremwamuntu, akaba ari n’ Umuhuzabikorwa ushinzwe Afurika mu Bunyamabanga bw’Umuryango witwa FAIN International ukorera i Heidelberg mu Budage, yagaragaje ko u Rwanda rwateye intambwe mu kunga no kubanisha Abanyarwanda hashingiwe ku muco n’indangacaciro Nyarwanda.

Ibikorwa byo kwibuka i Berlin byasojwe n’ ijoro ryo kwibuka, hanacanwa urumuri rw’ icyizere, herekanwa amafoto y’imiryango inshuti n’abaturanyi babo bazize Jenoside yakorewe Abatutsi.

Ambasadei w’u Rwanda mu Budage, Igor César na Dr. Thomas Lutz uyobora urwibutso rwa ‘Topography of Terror’ barushyizeho indabo
Amb. Igor César na Dr. Thomas Lutz bafashe n'akanya bazirikana inzirakarengane zazize Jenoside yakorewe Abatutsi
Umubyeyi Jeanne Jansen warokotse Jenoside yakorewe Abatutsi yatanze ubuhamya
Ambasaderi w’u Rwanda mu Budage, Igor Cesar
banyarwanda n'inshuti bitabiriye ari benshi kwibuka ku nshuro ya 24 Jenoside yakorewe Abatutsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza