Amb.Kimonyo yahuje akamaro k’umugore mu iterambere ry’u Rwanda n’urugamba rwo kurubohora

Yanditswe na Jean Pierre Tuyisenge
Kuya 20 Werurwe 2017 saa 12:52
Yasuwe :
0 0

Ambasaderi w’u Rwanda muri Kenya James Kimonyo, yashimye uruhare Umugore w’Umunyarwanda akomeje kugaragaza mu iterambere ry’u Rwanda avuga ko byatangiye mu rugamba rwo kurubohora mu 1990.

Yabitangaje ku wa Gatandatu tariki ya 17 Werurwe, mu muhango wo kwizihiza umunsi mpuzamahanga w’umugore usanzwe wizihizwa ku wa 8 Werurwe wahurije hamwe abanyarwanda baba mu gihugu cya Kenya.

Mu ijambo rye, ambasaderi Kimonyo yavuze ko ubwitabire bw’abagore mu kwiyubakira igihugu binyuze mu bikorwa by’ubukungu byahereye mu myaka ya 1990, aho abagore bagize uruhare mu kubohora urwababyaye.

Yavuze ko abagore bagaragaje imbaraga n’umurava mu mirimo yabo kimwe n’abagabo bikaba ari yo mpamvu bakomeje kujya mu myanya y’ubuyobozi ifata ibyemezo.

Yagize ati “ Itegeko Nshinga ryacu riteganya ko muri buri rwego rwa Leta habamo abagore bagera kuri 30%, bitewe n’imbaraga n’umuhate bakomeje kugaragaza; byanabahaye uburenganzira bwo gukora ibirenze ibyo bemererwa n’Itegeko Nshinga, niyo mpamvu bagize 64% mu Nteko Ishinga Amategeko, na 50% mu zindi nzego zitandukanye.”

Yavuze ko imiyoborere y’u Rwanda itongerera ubushobozi abagore bitewe na gahunda zibisaba, ahubwo ko ari uko abagore bashoboye kimwe n’abagabo.

Ati “ Ubuyobozi bwacu ntibwongerera ubushobozi abagore ku mpamvu z’uburinganire gusa, ahubwo butanga amahirwe ku bagore n’abagabo kuko bwizeye ko ari uburenganzira atari impuhwe baba babagirira, kandi abagore bo mu Rwanda bagaragaje ko bashoboye.”

Abagore b’Abanyarwanda baba muri Kenya bifashishije uwo munsi berekana ibikorwa byabo ndetse banasangiza abandi uburyo babashije guhangana ku isoko rya Kenya.

Valerie Uwimana yasangije abandi uburyo yatangiye ibikorwa byo kudoda mu 2013, agashinga ikompanyi yise Lafontaine Ltd, afite imashini imwe n’umukozi umwe gusa, akomeza kugenda yagura ibikorwa bye kugeza ubwo ubu asigaye akoresha abakozi benshi

Ati “ Natangiranye imashini imwe idoda n’umukozi umwe, ariko ubu nkoresha 31 bafite akazi gahoraho, n’abandi bari hagati ya 20 na 30 bakora nyakabyizi bitewe n’uko akazi kaba kameze, kandi abo bose barimo abanyarwanda 11. Nanabashije kongera imashini ziva kuri imwe none ubu mfite 29.”

Abandi banyarwanda bakorera ibikorwa byabo muri Kenya baboneyeho kwerekana ibikorwa byabo birimo iby’ubugeni, ubukorikori, imyenda, inkweto n’amatapi.

Ambasaderi w’u Rwanda muri Kenya James Kimonyo, yashimye uruhare rw'umugore mu iterambere ry'u Rwanda
Abanyarwanda baba muri Kenya bizihije umunsi w'umugore ku wa 17 Werurwe 2017
Ambasaderi Kimonyo yasuye bimwe mu bikorwa by'ubukorikori Abanyarwanda bakorera muri Kenya
Bimwe mu bikorwa by'iterambere abagore bakora muri Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza