Kwamamaza

Abarokotse Jenoside batangiye kuzenguruka u Bufaransa mu rugendo rugamije kugaragaza ukuri

Yanditswe kuya 5-11-2016 saa 13:25' na Ntakirutimana Deus


Urubyiruko rwacite ku icumu rya Jenoside yakorewe Abatutsi rwo mu miryango ya AERG na GAERG rwatangiye urugendo rw’iminsi 18 mu gihugu cy’u Bufaransa aho rugiye kuzenguruka mu bice bitandukanye by’icyo gihugu ruvuga amateka ya Jenoside yakorewe Abatutsi.

Iyi gahunda yiswe “Tour de France: Imbere Heza” yateguwe n’iyi miryango ku bufatanye n’Umuryango w’Urubyiruko rwo mu bihugu by’i Burayi urwanya ivangura EGAM (European Grassroots Antiracist Movement).

Mu gutangira uru ruzinduko rwabo mu Bufaransa basuye Umujyi (Mairie) wa Gennevilliers mu Mujyi wa Paris aho bahuye n’abayobozi baho barimo Meya Patrice Leclerc wabashimiye kuba bafashe iya mbere bakaza mu Bafaransa kubasangiza amateka banyuzemo muri Jenoside yakorewe Abatutsi.

Uru rubyiruko ruzajya mu mijyi itandukanye irimo Paris, Lyon, Dieulefit, Nancy, Tomblaine, Bordeaux, Dourdan n’ahandi aho bazaba bavuga kuri Jenoside yakorewe Abatutsi, baganira n’abanyeshuri mu mashuri yisumbuye no muri za kaminuza.

Muri urwo ruzinduko bazasura kandi Urwibutso rwa Jenoside yakorewe Abayahudi ruri mu Mujyi wa Paris. Barateganya no kwifatanya n’Abafaransa kwibuka inzirakarengane zaguye mu bitero by’ubwiyahuzi byabaye kuwa 13 Ugushyingo 2015 mu bice bitandukanye by’Umujyi wa Paris.

Uretse ibiganiro bazatanga mu mashuri makuru na kaminuza bazajya no mu rubanza rwa Pascal Simbikangwa wagize uruhare muri Jenoside yakorewe Abatutsi. Nyuma y’aho bazahura n’abasenateri bo mu Bufaransa, bazahura kandi n’abadepite bo mu bihugu by’Umuryango w’Ubumwe bw’u Burayi i Buruseli mu Bubiligi.

Aho bazajya hose bazatanga ubuhamya kuri Jenoside yakorewe Abatutsi bavuga uko yateguwe, uko yashyizwe mu bikorwa, uko yahagaritswe, ingaruka zayo n’uko u Rwanda rwiyubatse mu myaka 22 ishize.

Uretse ibyo, uru rubyiruko ruzanavuga uruhare rw’umuryango mpuzamahanga muri Jenoside yakorewe Abatutsi cyane cyane uruhare rw’u Bufaransa mu gutegura Jenoside, muri Jenoside ndetse na nyuma yayo.

Ku ikubitiro basuye ndetse baganiriza abanyeshuri bo ku ishuri rya Galilée mu Mujyi wa Gennevilliers kuri uyu wa Gatanu tariki ya 4 Ugushyingo 2016 bungurana ibitekerezo.

Perezida wa Egam, Benjamin Abtan yavuze ko muri urwo rugendo rwabo bagamije kubwira ukuri u Bufaransa bucumbikiye abakekwaho kugira uruhare muri Jenoside yakorewe Abatutsi, ndetse no gufasha abacitse ku icumu ndetse n’abatarahigwaga babarinze kwicwa.

Umwe mu bagize iryo tsinda akaba no mu muryango w’Abarokotse Jenoside bahoze biga muri za Kaminuza (GAERG), Habonimana Charles wiciwe umuryango wose mu gihe cya Jenoside, ubwo yari afite imyaka 11, yavuze ko urwo rubyiruko rwo mu Bufaransa usanga rudasobanukiwe neza amateka ya Jenoside yakorewe Abatutsi, kandi baba bashaka kuyumva.

Umwe mu bagize Umuryango w’Abanyeshuri barokotse Jenoside yakorewe Abatutsi biga mu mashuri yisumbuye, amakuru na kaminuza (AERG), Mirindi Jean de Dieu wari ufite imyaka itanu mu 1994, yavuze ko bagiye gusangiza amateka yabo amahanga.

Ati “Turashaka kubasangiza amateka yacu. Jenoside imaze imyaka 22 ibaye ariko usanga hari aho imeze nk’iyibagiranye, ndatekereza ko kuba u Bufaransa bwakwemera uruhare rwabwo muri Jenoside, bitazabutwara igice cy’ikinyejana.”

“Tour de France: Imbere Heza” igamije gushimangira ubufatanye hagati y’urubyiruko rw’Abanyarwanda n’Abafaransa binyuze mu biganiro bitandukanye mu mashuri makuru na za kaminuza ahari urubyiruko rw’Abafaransa rutazi uruhare rw’Igihugu cyabo muri Jenoside yakorewe Abatutsi.

Abari muri urwo ruzinduko barimo Mirindi Jean de Dieu, Ruzindana Rugasaguhunga n’abandi bibumbiye mu miryango ya AERG ihuza abanyeshuri barokotse Jenoside yakorewe Abatutsi biga mu mashuri yisumbuye, amakuru na za kaminuza na GAERG ugizwe n’abahoze ari abanyeshuri.

Kuva mu mwaka wa 2014 Umuryango EGAM ufatanyije na AERG hamwe na GAERG batangije gahunda yo kuvuga no kugaragaza ukuri kuri Jenoside yakorewe Abatutsi mu 1994 yiswe “Génocide contre les Tutsis : la vérité, maintenant!” igamije kumenyekanisha ukuri kuri Jenoside yakorewe Abatutsi no gusaba ko abakoze Jenoside bacyidegembya mu bihugu by’u Burayi cyane cyane u Bufaransa bashyikirizwa inkiko.

U Bufaransa ni igihugu cyakunze gushyirwa mu majwi kenshi ko cyagize uruhare rutaziguye muri Jenoside yakorewe Abatutsi, ingabo zabwo zitoza interahamwe zayikoze, kujya kuri bariyeri ndetse no gutanga amategeko yo kwica Abatutsi mu Bisesero n’ahandi.

Perezida wa Egam, Benjamin Abtan (hagati mu bahagaze) n'itsinda ry'Abanyarwanda batangiye urugendo rugamije kwerekana ukuri kuri Jenoside yakorewe Abatutsi mu 1994
Urugendo ruzenguruka u Bufaransa barutangiye baganira n’abanyeshuri biga mu Kigo cya Galilée muri Gennevilliers
Uwera Beatrice(hagati) asobanura amateka y'u Rwanda mbere ya Jenoside yakorewe Abatutsi
EGAM, AERG na GAERG bagarutse ku ruhare rw'u Bufaransa mbere ya Jenoside, mu gihe cyayo ndetse na nyuma yaho

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved