Kwamamaza

Algeria: Abanyarwandakazi batatu basoje amasomo y’icyiciro cya gatatu muri Kaminuza Nyafurika

Yanditswe kuya 30-10-2016 saa 08:19' na IGIHE


Abanyarwandakazi batatu barimo Nibagwire Nishimwe Clarisse, Nshimiyimana Devotha na Ushizimpumu Clementine basoje amasomo y’icyiciro cya gatatu cya Kaminuza mu Ishami rya Kaminuza Nyafurika yigisha ibijyanye n’Amazi, Ingufu n’Imihindagurikire y’Ikirere (The Pan African Institute for Water and Energy Sciences- PAUWES) rifite icyicaro muri Algeria.

Bigaga mu Ishami ry’ibijyanye n’ingufu, barangirije rimwe na bagenzi babo 23 baturutse mu bihugu 12 muri Afurika.

Mu myaka ibiri bamaze mu masomo, banakoze ingendoshuri zo kwimenyereza umwuga zakorewe mu bihugu bitandukanye birimo Iceland, Maroc, u Budage, Afurika y’Epfo, Ethiopia, Sénégal, Algeria na Kenya.

Umuhango wa mbere wo gutanga impamyabumenyi ku barangije muri iri shuri rimaze imyaka ibiri ritangiye, wabereye muri Kaminuza ya Abou Bekr Belkaid y’i Tlemcen muri Algeria ku wa Kane, tariki ya 27 Ukwakira 2016.

Witabiriwe n’abanyacyubahiro batandukanye barimo Komiseri Mukuru w’Umuryango wa Afurika Yunze Ubumwe (AU) ushinzwe ibijyanye n’Ikiremwamuntu, Siyansi n’Ikoranabuhanga, Dr. Martial De-Paul Ikounga; Umujyanama mu Iterambere ry’Ubukungu muri Ambasade y’u Budage akaba n’Umuyobozi w’Ubutwererane n’Umuryango wa Afurika Yunze Ubumwe, Barbara Schäfer , abahagarariye Ambasade ya Kenya, abayobozi ba Leta ndetse n’Urwego rw’Abikorera, muri Algeria. U Rwanda rwari ruhagarariwe na Nsanzabaganwa Jean Christian ushinzwe ubukungu muri Ambasade y’u Rwanda muri Algeria.

Umuyobozi Mukuru wa Kaminuza ya Tlemcen ikorana na PAUWES , Prof. Mustapha Djafour yashimiye iri shami rya Kaminuza Nyafurika ndetse n’abanyeshuri 26 barangije amasomo yabo.

Yagarutse ku mikoranire n’Umuryango wa Afurika Yunze Ubumwe, Algeria, u Budage nk’umuterankunga w’imena bagize mu iterambere ry’iki kigo ndetse n’iry’uburezi muri Afurika.

Komiseri Mukuru wa AU ushinzwe ibijyanye n’Ikiremwamuntu, Siyansi n’Ikoranabuhanga, Dr. Martial De-Paul Ikounga, yashimangiye abanyeshuri barangije bazashakira umuti ibibazo Afurika ihura nabyo.

Yabibukije ko bagomba gukoresha ubumenyi bahawe mu guhanga imirimo bagaha akazi abandi aho gutegereza ak’imuhana.

Abanyarwanda barangije amasomo bahigiye guteza imbere igihugu

Abanyarwandakazi batatu barangije amasomo yabo batangarije IGIHE ko bungutse ubumenyi mu gihe bamaze muri iki gihugu cyo mu Barabu, by’umwihariko muri iyi Kaminuza bavuga ko baharahuriye indangagaciro Nyafurika zikwiye kubaranga.

Kwigana n’abanyeshuri baturutse mu bice bitandukanye byabafashije kwaguka ndetse bibafungura amaso babona ko muri Afurika hari amahirwe menshi umuntu yabyaza umusaruro.

Nyuma yo kurangiza amasomo, bahigiye gutanga umusanzu wabo mu kubaka igihugu.

Nibagwire Nishimwe Clarisse yagize ati “ Imishinga mfite ni ugukoresha ubumenyi nakuye muri Kaminuza ya PAUWES, ntanga umusanzu wanjye mu guteza imbere igihugu cyanjye na Afurika muri rusange mu kuzamura urwego rw’ibijyanye n’ingufu, gutanga ibitekerezo ku ngamba zo guhangana n’ihindagurika ry’ikirere n’ibiza kuko ari cyo gice nakoreyemo ubushakashatsi.”

Ushizimpumu Clementine yatangaje ko ashaka gufasha abari n’abategarugori kwiteza imbere muri Siyansi.

Yagize ati “ Ndashaka guhangana n’ikibazo cy’ubwiyongere bw’ubushyuhe Isi ikomeje guhura nacyo. Ikindi nzibandaho ni ukongerera uburezi imbaraga mfasha abagore mu bijyanye n’amasomo ya siyansi.”

Nshimiyimana Devotha we yatangaje ko afite gahunda yo gukorana n’ibice by’icyaro, mu bijyanye no gusakaza ingufu mu kubaka iterambere rirambye.

PAUWES ifite imishinga myinshi mu myaka iri imbere

Umuyobozi wa PAUWES, Professor Abdellatif Zerga yatangaje ko bafite intego zo kurushaho kunoza ibyo bakora n’amasomo batanga.

Yagize ati “ Turateganya kuzamura ireme ry’uburezi, ndetse no guhanga udushya, kandi tuzabigeraho ku bufatanye n’Umuryango Nterankunga w’u Budage. Turateganya kubaka Laboratwari zigezweho, zifite ibikoresho bihambaye muri buri cyiciro. Ntidushidikanya ko ku bufatanye na Kaminuza ya Tlemcen tuzabigeraho vuba.”

PAUWES ikorera mu nyubako za Kaminuza ya Abou Bekr Belkaid mu Mujyi wa Tlemcen muri Algeria, yafunguye imiryango muri 2014, imaze kunyuramo abanyeshuri 129.

Ni ishami rimwe muri atanu agize Kaminuza Nyafurika; iyi yatangijwe muri 2008 nyuma y’icyemezo cy’Abakuru b’ibihugu na Guverinoma zigize AU, ritanga uburezi bwisumbuye mu kujyana umugabane mu cyerecyezo gihamye, mu burezi bwigisha imiyoborere myiza, ishoramari, ndetse n’umuco wo guharanira iterambere risangiwe.

U Rwanda muri Algeria ruzwi nk’igihugu gifite imiyoborere myiza, ishingiye ku mateka yanditswe n’Umukuru w’Igihugu, Paul Kagame, bituma n’imiyoborere myiza irushaho gusakara.

Abanyarwanda kandi bazwi nk’abantu barangwa n’urukundo ndetse n’umuco mu byo bakora byose.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved