Abanyarwanda batuye mu bihugu bya Turikiya na Chypre y’Amajyaruguru, nabo ntibasigaye, bawizihije kuri uyu wa Gatandatu basabwa kuba intwari mu rugendo rw’iterambere ry’u Rwanda.

Uyu muhango wabaye binyuze mu ikoranabuhanga wahuje Abanyarwanda basaga 100 bari muri ibi bihugu ku mpamvu zitandukanye zirimo kwiga, gukora ndetse no kuhatura.

Mu ijambo yagejeje kubari bakurikiranye uyu muhango Ushinzwe ibikorwa (Chargé d’Affaires) muri Ambasade y’u Rwanda muri Turikiya, Uwizeye Joël, yabibukije agaciro intwari z’u Rwanda zifite mu mateka yarwo, nabo abasaba kuba intwari mu iterambere ry’u Rwanda.

Yagize ati “U Rwanda ubu ruratekanye rufite ubumwe ndetse ruri kwiyubaka, ubu icyo turi kurwana nacyo ni ukuzamura ubukungu n’iterambere, guhanga udushya no gushyira imbaraga mu gushaka icyaruteza imbere no guhangana n’imbogamizi dufite.”

Muri uyu muhango herekaniwemo filimi mbarankuru ku mateka y’intwari z’u Rwanda, abari bayitabiriye bagaragaza ko intwari z’u Rwanda zibabera urugero mu gukunda igihugu, ubumwe, ubunyangamugayo no kurangwa n’ubumuntu.

Umunsi w’Intwari uri kwizihizwa ku nshuro ya 27, ukaba ufite insanganyamatsiko igira iti “Ubutwari mu Banyarwanda, Agaciro kacu.”

Uyu muhango wabereye ku ikoranabuhanga mu rwego rwo kwirinda Covid 19

Ushinzwe Ibikorwa (Chargé d’Affaires) muri Ambasade y’u Rwanda muri Turikiya, Uwizeye Joël, yasabye Abanyarwanda gufatira urugero ku ntwari z'u Rwanda

Muri uyu muhango herekaniwemo filime mbarankuru ku mateka y'intwari z'u Rwanda