Abanyarwanda baba muri Turikiya bibutse Jenoside yakorewe Abatutsi

Yanditswe na Jean Pierre Tuyisenge
Kuya 15 Mata 2018 saa 12:40
Yasuwe :
1 0

Abanyarwanda n’inshuti z’u Rwanda baba muri Turikiya bahuriye mu muhango wo kwibuka ku nshuro ya 24 Jenoside yakorewe Abatutsi mu 1994.

Ni igikorwa cyabereye mu gace ka Cankaya mu Mujyi wa Ankara mu cyumba cy’inyubako ya Sanatlar Merkezi cyitabirwa n’abantu basaga 350 barimo abayobozi bakuru bo muri Guverinoma ya Turikiya nk’abadepite mu Nteko Ishinga Amategeko y’icyo gihugu barimo Depite Dr. Alim Tunç na Arzu Erdem.

Umuhuzabikorwa w’Amashami y’Umuryango w’Abibumbye muri Turikiya, Irena Vojáčková-Sollorano, yavuze ko igihe cyo kwibuka Jenoside yakorewe Abatutsi kijyana no gutekereza ku kababaro k’abayirokotse berekanye ko ubwiyunge bushoboka nubwo habaye ubwicanyi bumeze butyo.

Yagize ati “ Ni itegeko ko ibihugu byose bigomba gushyira hamwe mu gukumira ko ayo mabi yagira ahandi aba ku Isi ndetse Loni ikwiriye gutanga ubutumwa ku Isi yose ko ababigizemo uruhare bagomba kubibazwa.”

Yasangije abari aho ubutumwa bw’Umunyamabanga Mukuru wa Loni, António Guterres wagize ati “ Mu gutabara abantu bari mu kaga, tugomba kurenga amagambo. Tugomba kugira umwete wo kugira icyo dukora. Tugomba guha agaciro abazize Jenoside n’abayirokotse tukanakora ku buryo nta handi byakongera kuba ku Isi.”

Yavuze ko u Rwanda rwigiye ku mateka yarwo mabi, asaba ko ibihugu byose byiyumvamo inshingano zo kurinda abaturage babyo Jenoside, ibyaha by’intambara, ibishingiye ku moko ndetse n’ibyaha byibasira inyokomuntu.

Ambasaderi w’u Rwanda muri Turikiya, Williams Nkurunziza, yavuze ko bitandukanye n’ibivugwa n’abahakana Jenoside, ngo iyakorewe Abatutsi ntabwo ari ubwicanyi bwatunguranye kuko ngo yari yarateguwe kera, hagamijwe kumaraho umututsi wese mu Rwanda.

Yakomeje avuga ko igihe cyo kwibuka ari umwanya wo guha agaciro no kwibuka ababuriye ubuzima muri Jenoside ariko cyane cyane kwita ku bayirokotse.

Yagize ati “Twibuka kugira ngo twemeze ukuri kw’amateka yacu bikadusubizamo imbaraga zo kubaka ejo hazaza heza, gukora ibyo bishimangira ubumwe bwacu nk’igihugu.”

Yakomeje agira ati “Ukuri kwacu gucecekesha abahakana Jenoside bashaka kugoreka ukuri kugira ngo bahishe ibyaha bakoze muri Jenoside yakorewe Abatutsi. Urumuri rw’ukuri iyo rugeze ku bayihakana rurabagaragaza.”

Ambasaderi Nkurunziza kandi yavuze ko igihe nk’iki cyibutsa umurava ubwitange n’ubutwari by’abasore n’inkumi z’u Rwanda bemeye gufata iya mbere kugira ngo bahagarike Jenoside barangajwe imbere na Perezida Paul Kagame.

Yasoje avuga ko ubu u Rwanda ruri mu mahoro n’umutuzo byashibutse muri politiki ihuriweho aho abana bafite uburenganzira bungana ku burezi, bafite uburenganzira bungana ku buzima, u Rwanda ruri mu bya mbere ku Isi mu guteza imbere abagore, rugira uruhare runini mu kugarura amahoro hirya no hino ku Isi, ubukene bugenda bugabanuka mu gihe icyizere gikomeza kugaruka mu Banyarwanda.

Uyu muhango wo kwibuka Jenoside yakorewe Abatutsi witabiriwe n’abandi bayobozi barimo ba ambasaderi baturuka mu bihugu birimo Repubulika Iharanira Demokarasi ya Congo, u Busuwisi, u Buyapani, Libya, Benin, Sudani, Djibouti, Cuba n’abandi ba dipolomate baturuka muri za ambasade zitandukanye.

Abayobozi batandukanye bacana urumuri rw'icyizere muri uyu muhango
Ambasaderi w’u Rwanda muri Turikiya, Williams Nkurunziza, ageza ijambo ku bitabiriye uyu muhango
Depite Dr. Alim Tunc ari kumwe na Ambasaderi wa Repubulika Iharanira Demokarasi ya Congo muri Turikiya, Marcel Mulumba Tshidimba mu muhango wo kwibuka ku nshuro ya 24 Jenoside yakorewe Abatutsi
Ambasaderi wa Djibouti n’uw’u Buyapani muri Turikiya bari bitabiriye uyu muhango wo kuzirikana inzirakarengane zazize Jenoside yakorewe Abatutsi
Umuhuzabikorwa w’Amashami y’Umuryango w’Abibumbye muri Turikiya, Irena Vojáčková-Sollorano, yashimangiye ko kurwanya jenoside bikwiye kujyana no kugeza imbere y’ubutabera abayigizemo uruhare
Abanyarwanda n’inshuti zabo batuye muri Turikiya bari bitabiriye uyu muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza