Abanyamuryango ba FPR Inkotanyi muri Atlanta bizihije intsinzi ya Perezida Kagame

Yanditswe na IGIHE
Kuya 21 Kanama 2017 saa 07:38
Yasuwe :
0 0

Nyuma y’amatora ya Perezida wa Repubulika y’u Rwanda yabaye tariki ya 3 n’iya 4 Kanama 2017, abanyamuryango ba FPR Inkotanyi batuye mu mujyi wa Atlanta muri leta ya Georgia ho muri Leta Zunze Ubumwe za Amerika, bizihije intsinzi ya Perezida Paul Kagame, watsindiye kongera kuyobora u Rwanda muri manda yimyaka 7 iri imbere akaba yari n’umukandida w’ishyaka babereye abanyamuryango.

Ibi birori byitabiriwe n’abanyarwanda benshi barimo abanyamuryango ba ARC (Atlanta Rwandan Community) n’inshuti zabo, ku wa Gatandatu tariki ya 19 Kanama 2017, bari biganjemo urubyiruko hamwe n’abandi bakuru, bose intero ikaba yari imwe, intsinzi y’umukandida wa FPR Inkotanyi, Paul Kagame.

Ku isaha ya saa kumi n’ebyiri z’umugoroba ku isaha ya Atlanta, ibirori byari bitangiye, biza guhumuza ahagana saa cyenda z’ijoro.

Gusabana no gushimira abanyamuryango ba FPR Inkotanyi n’abanyarwanda muri rusange icyizere bagiriye umukandida wabo n’uburyo bitabiriye amatora muri rusange ni byo byagiye bigarukwaho muri ibi birori.

Bavuga ko bifuje kwizihiza iyi ntsinzi kuri uyu wa Gatandatu mu rwego rwo kubihuza n’irahira rya Perezida Paul Kagame,warahiriye kuzayobora u Rwanda ku wa Gatanu ushize, ngo babonereho umwanya wo kumwifuriza kuzasoza inshingano ze neza ndetse ngo banamwizeza kuzamushyigikira no kumuba hafi mu bikorwa bye na gahunda ateganyiriza u Rwanda muri manda yatangiye y’imyaka irindwi.

Umuyobozi uhagarariye Abanyarwanda baba muri Atlanta (ARC), Leila Gaju Kabanda yagize ati "Uyu munsi turi kumwe twese hamwe twizihiza intsinzi ya Perezida Paul Kagame ntawe uhejwe cyangwa ngo arobanurwe mu bandi, nizera ntashidikanya ko iyo imiryango n’inshuti bishyize hamwe bagamije intego runaka, nta cyabananiza kuyigeraho. Ugushyira hamwe ni ipfundo ry’ iterambere rirambye ku gihugu cyacu. Kandi ubu ubumwe tugaragaje uyu umunsi burahamya ko tuzatahiriza umugozi umwe mu kuba inyuma Perezida Paul Kagame mu gushoza inshingano twamutoroye".

Mu bindi byaganiriweho muri ibyo birori abanyamuryango ba FPR Inkotanyi muri Atlanta biyemeje gukomeza guharanira iterambere mu bikorwa by’umuryango no gushishikariza abandi banyamuryango bo muri Amerika kuzakomeza umurava wo gukorera igihugu cyabo cy’u Rwanda no guharanira gukomeza kwihesha agaciro aho bari hose nk’abanyarwanda baba mu mahanga.

Uwungirije uhagarariye Diaspora nyarwanda muri Atlanta, Raissa Irakoze Cunningham yibukije Abanyarwanda ko aho bari mu mahanga bahora bazirikanga u Rwanda.

Yagize ati "Ibyiza biri imbere, dukomeze twubake igihugu cyacu, twiyubakira kandi tuzirikana ko nubwo tuba mu mahanga intego yacu ni imwe gusa, ni ugukomeza guteza imbere igihugu cyacu nk’abanyamuryango, duharanira gushyira hamwe nk’Abanyarwanda kandi tuzirikana ubunyarwanda bwacu aho turi hose."

Abitabiriye ibi birori bagize n'umwanya wo gusabana
Abanyarwanda batuye i Atlanta babyina bishimira intsinzi ya Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza