USA: Ambasaderi w’u Rwanda yagiranye ibiganiro by’ubufatanye na Leta ya Indiana

Yanditswe na IGIHE
Kuya 29 Ukwakira 2017 saa 07:50
Yasuwe :
0 0

Ambasaderi uhagarariye u Rwanda muri Leta zunze Ubumwe za Amerika , Mukantabana Mathilde yagiriye uruzinduko muri Leta ya Indiana, aho yagiranye ibiganiro n’inzego zinyuranye mu gutsura umubano wihariye hagati y’iyi Leta na Leta y’u Rwanda.

Atangira urwo rugendo, kuwa 26 Ukwakira 2017, Ambasaderi Mukantabana yahuye n’Umuyobozi w’umujyi wa Indianapolis baganira ku butwererane bushingiye ku bucuruzi, ubukerarugendo, umuco na siporo ndetse n’uburezi.

Ambasaderi yanasuye Kaminuza ya Sagamore Institute, ikora ubushakashatsi mu buryo ingamba za leta zishyirwa mu bikorwa.

Muri iryo shuli, Ambasaderi Mukantabana yahatangiye ikiganiro kigaragaza ko nubwo u Rwanda ruvuye mu mateka mabi, ariko rumaze gutera intambwe ishimishije mu nzego zinyuranye.

Yatanze ingero zifatika zigaragaza uko za gahunda za Leta y’u Rwanda zashyizwe mu bikorwa, bikazamura imibereho y’abaturage ndetse ibipimo by’ubukungu bikaba bigaragaraza ko igihugu cyifashe neza mu nzego zitandukanye.

Kuwa 27 Ukwakirwa 2017, Ambasaderi Mukantabana yatanze ikiganiro kuri Kaminuza ya Indianapolis, aganiriza abanyeshuli n’abarimu b’iyo kaminuza ku birebana n’amajyambere u Rwanda rumaze kugeraho ugereranyije n’aho rwari ruri muri 94, ndetse n’urwego ruriho mu karere igihugu giherereyemo.

Yagarutse ku ntambwe u Rwanda rwateye mu bijyanye no guha agaciro umwari n’umutegerugori ndetse n’uruhare bafite mu iterambere ry’igihugu.

Nyuma yagiranye ibiganiro n’abayobozi b’iyi kaminuza ku bufatanye hagati ya Kaminuza ya Indianapolis na Kaminuza y’u Rwanda, cyane cyane mu rwego rw’ikoranabuhanga.

Ambasaderi w’ u Rwanda muri USA, Mukantabana Mathilde muri Kaminuza ya Purdue Indianapolis

Avuye muri iyo kaminuza, Ambasaderi Mukantabana yahuye n’ubuyobozi bushinzwe iby’ubuzima muri Leta ya Indiana, baganira ubufatanye bushoboka hagati y’uru rwego na Minisiteri y’ubuzima mu Rwanda, cyane cyane mu bigendanye n’ubushashakashi.

Uru rwego rw’ubuzima muri Leta ya Indiana rukaba rwarishimiye kugira icyo rwafasha Minisiteri y’ubuzima.

Ku mugoroba wo kuwa gatanu, Ambasaderi Mathilde Mukantabana yanabonanye n’Abanyarwanda baba mu mujyi wa Indianapolis, aho bari bahujwe n’igikorwa cyo gutangiza ishami rya Diaspora y’Abanyarwanda bahatuye.

Uwo muryango batangije bawuhaye izina IRDN-UMUBANO (Indianapolis Rwandan Diaspora Network).

Ruhaya Nxumalo, Umuyobozi wa Diaspora ku rwego rwa Midwest, Indiana iherereyemo, kugira amashami atandukanye kandi yigenga biri mu bituma Abanyarwanda babasha kwiteza imbere aho batuye mu mahanga. Kuri we, byari ibyishimo ko havutse irindi shami kandi rizakorana n’ayandi yari asanzweho muri Amerika ndetse no ku isi.

Rutsobe Nsengiyumva wari uhagarariye Diaspora ya Amerika muri uyu muhango , yahaye ikaze Abanyarwanda bo muri Indiana bishyize hamwe mu gace batuyemo ka Indianapolis abizeza imikoranire myiza no kubaba hafi bishoboka.

IRDN- UMUBANO ije isanga indi miryango 18 imaze gushinga imizi muri Diaspora ya Amerika.

Ambasaderi Mukantabana yabwiye abo banyarwanda ndetse n’inshuti zabo zari zaje kubashyigikira, yabibukije ko aho bari hose bajya bibuka amahirwe bafite yo kugira igihugu, kuko kwitwa umunyarwanda biteye ishema.

Yagize ati “Nanjye nabaye mu miryango itandukanye y’Abanyarwanda hano muri Amerika ariko mu gihe cya mbere hari ubwo byaduteraga ipfunwe kwitwa Abanyarwanda kubera uburyo igihugu cyacu cyari kiyobowemo. Ariko ubu aho umunyarwanda ari hose yishimira uwo ariwe. Ndetse, hari Abanyamerika benshi baza gusaba ubwenegihugu bwacu kuri Ambasade, kuko bamaze kumva ko iwacu hari amahirwe menshi yo gushora imari, kandi bakaba bifuza kugira uburenganzira nk’ubw’abenegihugu. Mwe rero murabusanganywe ni ngombwa ko mububyaza umusaruro, muhereye aho mutuye.”

Ambasaderi yabwiye Abanyarwanda bari aho icyari cyamuzanye muri Indiana, ko byari ugutsura umubano wihariye n’uyu mujyi, anashimira cyane Mussine John Yves wabigizemo uruhare kugira ngo bikunde.

Abanyarwanda batuye muri Indiana banabajije ibibazo Ambasaderi, bifuza kumenya icyo Ambasade yabafasha mu gihe nabo bifuje gushora imari iwabo, ababwira ko amarembo yuguruye ariko anabashishikariza kugana Amabasade ikabasobanurira icyo bashaka cyose.

Ati “ Mwikwitinya Ambasade ni iyanyu, nimutugane hari abakozi ba Ambasade mu nzego zitandukanye bazishimira kubafasha.”

Mussiine John Yves ukuriye Abanyarwanda baba muri Indiana, yashimiye Ambasaderi kuba yabanye nabo muri ibyo birori byo gutangiza ishami rya diaspora, ndetse anashimira Abanyarwanda bandi bitanze kugira ngo uwo muryango ushingwe

Yijeje abari aho ko iyi ntambwe bateye izakurikirwa n’izindi mu rwego rwo kubafasha ku giti cyabo nk’Abanyarwanda ndetse no gutsura umubano n’Abanyamerika batuyemo. Ibyo byose bigakorwa hashyizwe imbere intego yo guhesha u Rwanda isura nziza.

Perezida wa IRDN, Musiine John Yves, yagize ati “Kwibumbira hamwe nizo ngufu zacu n’inkingi y’Agaciro kacu. Nk’abagize Diaspora nyarwanda ya Indianapolis, dufitiye umwenda abarwaniye ubwigenge bwacu, tugira uruhare runini mu iterambere ry’u Rwanda.”

Indianapolis ni umurwa mukuru ukaba n’umujyi munini muri Leta ya Indiana iherereye mu Burengerazuba bwa USA.

Ambasaderi w’ u Rwanda muri USA, Mukantabana Mathilde agaragaza ishusho y'iterambere ry'u Rwanda
mbasaderi w’ u Rwanda muri USA, Mukantabana Mathilde nyuma y'ibiganiro n'Umujyi wa Indianapolis
Ambasaderi w’ u Rwanda muri USA, Mukantabana Mathilde n'Abanyarwanda batuye muri Indianapolis

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza