USA: Abanyarwanda bibukiranyije uruhare rwabo mu iterambere ry’u Rwanda

Yanditswe na Karirima A. Ngarambe
Kuya 12 Nyakanga 2019 saa 08:36
Yasuwe :
0 0

Itsinda ry’abanyarwanda bibumbiye mu ihuriro ryitwa North American Rwanda Convention, rifite icyicaro mu Mujyi wa Dallas muri Leta ya Texas, bateguye igiterane ngarukamwaka kiswe ‘US-Rwanda Convention’.

Intego y’ibiterane bya US-Rwanda Convention, ni uguhuza abanyarwanda n’inshuti z’u Rwanda bakaganira ku iterambere ry’u Rwanda kandi bakigira hamwe uburyo butandukanye buri wese yagira uruhare mu iterambere ry’u Rwanda.

By’umwihariko icy’uyu mwaka cyabaye kuwa 5 Nyakanga 2019, ibiganiro byibanze cyane mu kugaragaza uburyo iterambere rirambye n’isura nziza y’u Rwanda byubakiye ku bintu bitatu by’ingenzi aribyo: Ubutabera, Ubumwe n’ubwiyunge, ubuyobozi bwiza no kugira imitekerereze yagutse mu nzira y’iterambere.

US-Rwanda Convention yitabiriwe na bamwe mu bayobozi bakuru b’u Rwanda nka Minisitiri w’ubutabera Johnston Busingye na Minisitiri w’ubutegetsi bw’igihugu, Prof. Anastase Shyaka.

Hari kandi n’abayobozi baje bahagarariye ibigo bikomeye by’igihugu nk’Ikigo cy’Igihugu cy’Iterambere (RDB), yari ihagarariwe na Louise Kanyonga.

Abandi banyacyubahiro bitahiriye ubutumire harimo Ambasaderi Mathilde Mukantabana uhagarariye u Rwanda muri USA, Marie Rose Mureshyankwano, Aimable Bayingana, abayobozi batandukanye muri Ambasade y’u Rwanda, n’abanyarwanda bavuye impande zose, mu Rwanda, Canada, ndetse no muri leta nyinshi za Amerika.

Abitabiriye iki giterane bishimiye cyane ibiganiro byiza bagejejweho n’abayobozi baje bahagarariye Leta y’u Rwanda.

Minisitiri Johnston Busingye yibukije abitabiriye igiterane intera ishimishije u Rwanda, rwateye mu rwego rw’ubutabera, inzira y’ubumwe n’ubwiyunge nyuma y’amateka y’amacakubiri yagejeje igihugu kuri jenoside yakorewe Abatutsi.

Minisitiri Prof.Anastase Shyaka we yaganirije abitabiriye US-Rwanda Convention ku bijyanye n’ubuyobozi bwiza igihugu kimaze kwimakaza kandi anasobanura uburyo iterambere igihugu kigezeho rishingiye kandi rishyigashyiwe n’ubuyobozi bwiza buha abaturage ijambo n’imbaraga zo kwigira.

Louise Kanyonga wari uhagarariye RDB muri iki giterane yaganirije abakitabiriye ku mitikereze yagutse n’ingamba zikomeye u Rwanda rwafashe mu rwego rwo kuzamura imibereho myiza y’umunyarwanda, aho ababa munsi y’urugero fatizo rw’ubukene bavuye ku ijanisha rya mirongo irindwi bakagera kuri mirongo itatu ku ijana gusa mu myaka mike u Rwanda rumaze rwibohoye.

Habayeho kandi ibiganiro njyanama byahuje bamwe mu bayobozi n’abanyarwanda baba muri Amerika, abikorera bavuye mu Rwanda, abikorera baba muri Amerika n’inshuti z’u Rwanda z’abanyamerika.

Ibiganiro byibanze ku ngingo zitandukanye ariko zihuriye ku ntego yo kwiga uburyo abanyarwanda n’inshuti z’u Rwanda bagira uruhare rwimbitse mu guteza imbere ibikorwa byatuma u Rwanda rurushaho gutera imbere. Ibiganiro kandi byagarutse ku ngamba za leta zafashwe mu rwego rwo kuzamura imibereho y’abanyarwanda no kuzamura isura nziza u Rwanda rufite haba mu banyarwanda ubwabo ndetse no mu banyamahanga.

Zimwe muri izo ngamba harimo; guteza imbere uburinganire, kurwanya no guca ruswa burundu, guha agaciro urubyiruko, no kushora imari mu bushobozi bw’ibanze abanyarwanda (ari ababa mu gihugu cyangwa hanze yacyo) bakubakiraho mu kwiteza imbere no kubaka igihugu.

US-Rwanda convention yasojwe n’igikorwa cyo kwibohora25 cyateguwe na Ambassade y’u Rwanda muri USA.

Ibirori byo kwizihiza Kwibobora25 byitabiriwe n’imbaga y’abanyarwanda biganjemo urubyiruko batuye muri Texas n’abandi baje baturuste muri leta nyinshi za Amerika.

Ibirori byo kwizihiza Kwibohora 25 byaranzwe n’urugwiro, ubusabane n’ibyishimo aho abayobozi bitabiriye ibirori bibukije abanyarwanda ko ubu umuryarwanda uwo ari we wese, aho ari hose yabohowe.

Mu birori byose byabaye mu gihe cy’iminsi ibiri byaranzwe n’imbyino nyarwanda zarushijeho gukumbuza abanyarwanda umuco wabo n’igihugu cyabo cy’u Rwanda.

Ubuyobozi bwa North American Rwanda convention yateguye igiterane cya US-Rwanda Convention bwongeye kandi kuboneraho umwanya wo gushimira byimazeyo abayobozi bakuru bitabiriye ubutumire.

By’umwihariko North American Rwanda Convention ishimira cyane ubufatanye n’imikoranire myiza na Ambassade y’u Rwanda ndetse n’ubuyobozi bwa USRCA (umuryango w’abanyarwanda batuye muri Amerika) batumye iki giterane cya US-Rwanda Convention kiba akarusho.

US-Rwanda Convention yahuje abanyarwanda n'inshuti z'u Rwanda baganira ku iterambere ryarwo
Abanyarwanda baba muri Amerika n'ahandi bibukiranyije uruhare rwabo mu iterambere ry'u Rwanda
Mureshyankwano M.Rose ni umwe mu bitabiriye iki giterane
Minisitiri w'Ubutabera akaba n'Intumwa nkuru ya Leta Busingye Johnson yitabiriye iki giterane
Minisitiri w'Ubutegetsi bw'igihugu Prof.Shyaka ubwo yari akurikiye ibiganiro byarimo gutangwa
Minisitiri Busingye yibukije abitabiriye igiterane intera ishimishije u Rwanda, rwateye mu rwego rw’ubutabera
Louise Kanyonga wari uhagarariye RDB muri iki giterane yaganirije abakitabiriye ku mitikereze yagutse
Minisitiri Prof.Anastase Shyaka we yaganirije abitabiriye US-Rwanda Convention ku bijyanye n’ubuyobozi bwiza igihugu kimaze kwimakaza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza