USA: Abanyarwanda batangije radio izabaruhura kubyuka bumva amakuru aharabika u Rwanda gusa

Yanditswe na Mukaneza M.Ange
Kuya 12 Ukuboza 2017 saa 02:56
Yasuwe :
0 0

Nyuma yo kubona ko hanze y’u Rwanda hari ibitangazamakuru bitandukanye byagiye bitangizwa hagamijwe gutangaza amakuru y’ibinyoma agamije guharabika u Rwanda, Abanyarwanda batuye muri Leta Zunze Ubumwe za Amerika batangije Radio izajya itangaza ukuri nyako ku bibera mu Rwanda.

Iyi radio yitwa ONR (One Nation Radio), yatangiye gukora umwaka ushize, mu rwego rwo gushyigikira ubumwe n’ubwiyunge bw’Abanyarwanda baba mu mahanga, gukunda igihugu no kwigira.

Mu kiganiro na IGIHE, Umuyobozi Mukuru wa One Nation Radio, Rutsobe Nsengiyumva, yavuze ko iki gitekerezo yakigize mu 2011, nyuma yo kubona ko atari we wenyine urambiwe guhora yumva amakuru ahabanye n’ukuri kw’ibibera mu Rwanda.

Ati “Igitekerezo ahanini cyaje nyuma yo kubona hari Radio zikorera mu mahanga cyane ku mugabane w’u Burayi na Amerika zisebya igihugu, zitangaza amakuru ahabanye cyane n’ukuri kw’ibibera mu gihugu cyacu cy’u Rwanda.”

Yakomeje avuga ko nyuma yo kubiganiriza abandi bantu bahise bafata umwanzuro wo gushinga radio, bagamije guha Abanyarwanda batuye hanze amahirwe yo kwihitiramo kumva amakuru y’ukuri, no kugira umuyoboro bacishamo ibitekerezo bituma barushaho kunga ubumwe no kubaka igihugu cyabo.

Ati “Nk’Abanyarwanda baba mu mahanga twumva ko ari inshingano yacu gutanga umusanzu mu iterambere ry’igihugu. Ntawe dusigana mu kubaka igihugu duhuza Abanyarwanda kugira ngo intero yacu ibe imwe mu kubaka igihugu cyacu, aho gutuma ducikamo ibice nk’uko bikorwa na radio z’abarwanya leta.”

Rutsobe akomeza avuga ko bafite ibiganiro byihariye, aho nka buri cyumweru batumira umuyobozi ukomeye n’abandi bazwi bagasobanura ibirebana n’u Rwanda, ibi bigatuma bizera ko intego ya ONR yo guhuza Abanyarwanda baba hanze izagerwaho.

Ati “Tuganiriza Abanyarwanda mu mpande zose, haba mu makuru, ubukungu, umuco, iyobokamana, imyidagaduro n’ibindi. Ntabwo twibanda kuri politiki gusa. Ikindi kandi nubwo radio ifite icyicaro muri Amerika, ibiganiro byacu bigera ku isi yose.”

Mu biganiro bikomeye imaze gutambutsa harimo icyavugaga ku matora y’Umukuru w’Igihugu, n’ikindi bagiranye na Mukarumongi Dafroza Gauthier uherutse guhabwa impeta y’ishimwe na Perezida Paul Kagame, kubera uruhare we n’umugabo we bagira mu gutuma abakoze Jenoside bakidebyembya mu Bufaransa bagezwa imbere y’ubutabera.

Mu gihe gito iyi radio imaze itangiye gutambutsa ibiganiro, Rutsobe ahamya ko hari umusanzu ugaragara imaze gutanga, ibi akabishingira ku bwiyongere bw’abayanyotewe no kuyumva, ndetse n’ibitekerezo bitandukanye bahabwa binyuze ku mbuga nkoranyambaga, usanga bibashishikariza kudacika intege mu kazi keza bakora.

Buri minsi ibiri habarurwa abantu bari hagati 3000- 10000 baba bakurikiye One Nation Radio, ibintu bigaragaza inyota Abanyarwanda bafitiye ibiganiro bitambuka kuri radio ya Diaspora.

One Nation Radio itambutsa ibiganiro byayo mu Kinyarwanda, ikorera ku murongo wa Internet wa www.onenationradio.org, intego ikaba ari uko yagira umurongo wa FM yumvikaniraho ndetse na Televiziyo.

Rutsobe Nsengiyumva uyobora One Nation Radio akaba n'umwe mu bagize igitekerezo cyo kuyishinga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza