Ubuzima burusha imbaraga akababaro: Ubuhamya bwa Munyakazi Lenualda wiciwe umuryango wose muri Jenoside

Yanditswe na Karirima A. Ngarambe
Kuya 28 Mata 2021 saa 10:41
Yasuwe :
0 0

Munyakazi Marie Lenualda atuye mu Mujyi wa Paris mu Bufaransa yavuze ko kubaho k’uwarokotse Jenoside yakorewe Abatutsi aribyo bifite imbaraga kurusha guheranwa n’agahinda nyuma y’imyaka 27 Jenoside yakorewe Abatutsi ikozwe.

Ni ubuhamya bwe bugaragara no mu gitabo ‘Rwanda 1994: Paroles de Rescapés – témoignages du génocide perpétré contre les Tutsi’ yafatanyije n’abandi barokotse Jenoside barimo Beata Uzayisenga, Anita Cyabakanga, Marie Claire Kabagwira, Hope Nyabyenda, Théodore Uwamariya, Pierre Mahano, Clotilde Mukamugema, Agnes Byukunsenge na Solange Umulisa,

Munyakazi ukora ibijyanye n’ubunyamabanga mu bigo by’amashuri, yavukiye i Kibungo mu 1961, arokokera i Kigali mu Rugunga, akaba yaravukaga mu muryango w’abana 8, babiri bitabye Imana bakiri bato, batanu basigaye bicwa muri Jenoside harokoka we wenyine mu muryango.

Hejuru y’abo bava inda imwe, Munyakazi Marie Lenualda muri Jenoside yakorewe Abatutsi, yiciwe abana batatu aribo Gisèle Niwemfura wishwe afite imyaka 9, Émeline Niwemwari wari ufite imyaka 8 na Jessica Stéphanie Niwemugabe wari ufite imyaka ibiri n’amezi atandatu.

Ati “Guhera 1961 na 1963 mu bwicanyi bwibasiye Abatutsi mu Rwanda, icyo gihe ababyeyi banjye bararokotse ariko benshi mu muryango wanjye mugari barahashiriye, amazu aratwikwa n’amatungo yabo aranyagwa biza kugera no mu 1990, umuryango wanjye wabayeho nabi ucunaguzwa, bikomera cyane ubwo Jenoside yatangiraga gushyirwa mu bikorwa byeruye mu 1994.”

Muri iki gitabo no mu buhamya yatanze mu kiganiro na IGIHE, Munyakazi yagarutse kuri musaza we witwa Jean Chrisostome Munyakazi, wari urangije Kaminuza y’u Rwanda i Ruhande, afite impamyabumenyi y’icyiciro cya kabiri mu bumenyi bw’isi n’amateka (Géohistoire). Yishwe mu 1990 nyuma yo gufatwa agafungwa yitwa icyitso cy’Inkotanyi.

Munyakazi Marie Lenualda yavuze ko muri iki gihe cyo kwibuka Jenoside yakorewe Abatutsi, yibuka cyane abe bose bishwe bazira uko bavutse.

Ati “ Ndibuka abana banjye Gisèle Niwemfura, Émeline Niwemwari, Jessica Stéphanie Niwemugabe, musaza wanjye Munyakazi Bernard, murumuna wanjye Marie Goretti Munayakazi n’umugabo we Nemeye Michel n’abana be Diane Nemeye na Didie Nemeye. Ndunamira musaza wanjye Jean Chrisostome Munyakazi, murumuna wanjye Marie Celestine Munyakazi n’umwana we Ngabo Maurice, Thomas d’Aquin Munyakazi n’umugore we Saverine Munyakazi n’abana babo Patricque Munyakazi na Eric Munyakazi. Ndumva nezerewe kubavuga amazina.”

Ibyo Munyakazi Marie Lenualda yatanzemo ubuhamya yanabishyize mu gitabo “Rwanda 1994 - Paroles de réscapés Témoignages du génocide perpétré contre les Tutsi” cyaturutse mu biganiro biba hagati y’abagize ishyirahamwe (association) Tubeho Family yashinze.

Iryo shyirahamwe rikaba mbere na mbere rigamije gufasha abacitse ku icumu rya Jenoside yakorewe Abatutsi baba mu Bufaransa, gukurikirwa mu buryo bwo gukira ibikomere batewe n’ingaruka z’ubugome ndengakamere bahuye nabwo mu buto bwabo.

Ni ishyirahamwe kandi rigamije guhozanya ngo badaheranwa n’agahinda kugira ngo bakomeze kwiyubaka.

Nyuma yo kuganira no kumenyana bagasangizanya ubuhamya bw’ibyo banyuzemo muri Jenoside, nibwo bagize igitekerezo cyo kwandika igitabo.

Buri wese uko ari icumi yagiye aha inyito ubuhamya bwe muri icyo gitabo, Munyakazi Marie Lenualda, ubuhamya bwe mu gitabo yabwise “La Survivante de la famille” cyangwa se “Uwarokotse mu muryango.”

Nubwo inkovu z’ibikomere by’amateka zigihari, Munyakazi Marie Lenualda na bagenzi be bavuze ko bitabaye intandaro yo guheranwa n’agahinda.

Bagize bati “Nubwo hashize imyaka 27, ni myinshi kuko habayemo ibintu byinshi mu buzima bwacu, ariko ni mike cyane kuko ububabare buracyari bwose kubera amateka mabi yadukorewe n’imiryango yacu muri jenoside yakorewe Abatutsi mu Rwanda.”

Bakomeje bagira bati “Nubwo ibikomere bisiga inkovu zikomeye, umunsi ku wundi ubuzima burusha imbaraga akababaro. Ntabwo abatwiciye aribo bagombaga kutuvugira ijambo rya nyuma, turiho ngo twivugire amateka, twararokotse”.

Mu bandi batanze ubuhamya bwanditswe muri iki gitabo harimo Béata Uzayisenga, wavukiye i Cyangugu. Ubuhamya bwe yabuhaye inyito igira iti “Seul celui qui a connu la nuit peut la raconter” cyangwa se ‘ijoro ribara uwariraye.’

Uzayisenga yanditse mu ntangiriro y’amateka ye ko akiri umwana iwabo mu rugo atigeze amenya ko hariho amacakubiri y’amoko kuko atabitojwe. Yaje kubimenya neza ubwo yari afite imyaka 13, indege ya Habyarimana imaze kuraswa kuko ababyeyi be batangiye kwihisha.

Harimo kandi Anita Cyabakanga wiciwe abe afite imyaka 11 y’amavuko. Inyito y’ubuhamya bwe ni “Tous avaient de grandes ambitions” bivuze ngo “Bose bari bafite imishinga ikomeye bifuza kugeraho.”

Marie Claire Kabagwira muri Jenoside yari afite imyaka 24 atuye i Nyamirambo, atwite inda y’amezi umunani. Ubuhamya bwe yabwise “Les douleurs de l’enfantement par temps de détresse”.

Hope Nyabyenda (izina ryo mu gitabo ritari iryo mu buzima busanzwe) , ubuhamya bwe yabwise “Le jour le plus long”. Yabwise atyo kubera uburyo yababaye cyane muri jenoside yicirwa abe, ariko mu kurokoka yaje kwipimisha nyuma asanga yarandujwe Sida. Avuga ko mu buzima bwe butamworoheye kenshi yifuje kwiyahura ariko aza gusanga kubaho biruta byose.

Théodore Uwamariya, ubuhamya bwe yabwise “N’aie pas peur cyangwa se ngo Wigira ubwoba”. Ni umukobwa wa Rudasingwa Jean Marie Vianney na Mukeshimana Philomène, muri jenoside yari afite imyaka 8, batuye i Gitarama.

Pierre Mahano ( izina ryo mu gitabo ritari iryo mu buzima busanzwe), ubuhamya bwe yabwise “Mon calvaire à moi cyangwa inzira y’inzitane yanjye.” Jenoside yabaye afite imyaka icyenda we n’umuryango we batuye i Kayonza.

Mu gitabo kandi harimo ubuhamya bwa Clotilde Mukamugema aho ubuhamya bwe yabwise “Revenir de loin ce n’est pas mourir » cyangwa Kugera kure siko gupfa”. Jenoside yabaye afite imyaka icumi.

Hari kandi Agnes Byukunsenge, ubuhamya bwe yabwise “A celle qui a été tuée à ma place , ni ukuvuga ngo Kuri wowe wishwe mu mwanya wanjye”. Mukamugema Jenoside yakorewe Abatutsi yakozwe afite imyaka ine.

Yagize ati “ Byinshi mvuga ni uko nagize amahirwe nkaganira na Musaza wanjye Niyitegeka Jean Bosco, kuko jye nari muto cyane. Byatumye ntabona umwanya wo kumenya data Byukunsenge na mama Karumagabo na Adrienne Mukeshimana, n’abandi benshi bo mu muryango wanjye wa hafi cyangwa wa kure.”

Solange Umulisa Ikitegetse we ubuhamya bwe yabwise “L’ennemi vous prépare une tombe pendant que Dieu vous aménage une échappatoire, cyangwa se ngo Umwanzi agucira akobo Imana igucira Icyanzu”.

Solange Umukiza, ni mwene Modeste Muhizi Kayihura na Jessica Kagaju . Yavukiye ku musozi wa Muhanga muri Gitarama. Muri Jenoside yari afite imyaka 8, akaba yari ageze mu mwaka wa kabiri w’Amashuri abanza.

Abatanze ubuhamya bwabo muri iki gitabo bashimira abantu babaye hafi mu gihe bandikaga icyo gitabo barimo Karene Fredj, Claudine Salamon, Fabrice Teicher, André Twahirwa, Ester Mujawayo, Ibuka-France, Maurice Dorés n’abandi.

Iki gitabo wakibona unyuze aha: RWANDA 1994 PAROLES DE RESCAPÉS

Ikiganiro n’ubuhamya bwa Munyakazi Marie Lenualda yagiranye na IGIHE

Munyakazi Marie Lenualda yiciwe abe bose muri Jenoside arokoka wenyine
Abo mu muryango wa Munyakazi Marie Lenualda bishwe muri Jenoside yakorewe Abatutsi
Clotilde Mukamugema yarokotse Jenoside afite imyaka icumi
Théodore Uwamariya, ubuhamya bwe yabwise 'N’aie pas peur' cyangwa 'Wigira ubwoba'
Marie Claire Barakagwira muri jenoside yari afite imyaka 24 atwite inda y’amezi umunani
Beata Uzayisenga, wavukiye i Cyangugu ubuhamya bwe yabuhaye inyito igira iti "Seul celui qui a connu la nuit peut la raconter" cyangwa ijoro ribara uwariraye
Agnes Byukunsenge ubuhamya bwe yabwise 'A celle qui a été tuée à ma place cyangwa se ngo 'Kuri wowe wishwe mu mwanya wanjye'
Solange Umulisa Icyitegetse we ubuhamya bwe yabwise “L’ennemi vous prépare une tombe pendant que Dieu vous aménage une échappatoire, cyangwa se ngo Umwanzi agucira akobo Imana igucira Icyanzu”.
Anita Cyabakanga wiciwe abe afite imyaka 11 y’amavuko. Inyito y’ubuhamya bwe yagize ati "Tous avaient de grandes ambitions"
Munyakazi Marie Lenualda mu kiganiro n'umunyamakuru wa IGIHE

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .