U Rwanda rwatewe amacumu atari make ariko rugakomeza ruhagaze-Perezida Kagame

Yanditswe na Twarabanye Venuste
Kuya 5 Ukwakira 2019 saa 08:06
Yasuwe :
0 0

Perezida wa Repubulika, Paul Kagame yavuze ko mu nzira yo kwiyubaka, u Rwanda rwagiye ruterwa amacumu atari make hirya no hino amwe rukayizibukira ayandi akarufata rugakomereka ariko rugakomeza ruhagaze, gusa uko imyaka ishira niko ababigeragezaga bibagora.

Yabigarutseho mu ijambo yavugiye muri Rwanda Day yabereye mu mujyi wa Bonn mu Budage ahari hateraniye abasaga 3500.

Perezida Kagame yavuze ko kubona umwanya wo kuganira ku banyarwanda aho bari hose bifite aho bishingira kuko u Rwanda ari igihugu cyiyubaka kandi kiva kure.

Agaruka ku byabaye muri 1994 ubwo habaga Jenoside yakorewe Abatutsi, yavuze ko igihugu cyasenyutse kitariho, ibyabaye kwari uguhuhura.

Yavuze ko muri uko gusenyuka u Rwanda rwanyuze muri byinshi bigamije kuruhungabanya ariko rukabicamo neza.

Ati “Hari ubwo njya nibaza iyo twahuye dutya n’ikindi gihe kuko ibyo u Rwanda rumaze kunyuramo muri uko gusenyuka ruterwa amacumu atari make hirya no hino, amwe u Rwanda rukayizibukira ayandi akarufata rugakomereka ariko rugakomeza ruhagaze. Naho ruguye ntiruhere hasi rugahaguruka.”

Nubwo ibyo byabaye muri urwo rugendo, yavuze ko “Imyaka 25 ishize ibyo byagiye bigabanyuka ntabwo bikiri nkuko byari bimeze…abarukoreraga ibyo uko imyaka yagendaga ihita niko bibagora.”

Kuba bitakiri nkuko byari bimeze mu myaka 10 cyangwa 20 ishize, Perezida Kagame yavuze ko bigaragaza kwiyubaka.

Ati “Ntabwo mbuvuga kugira ngi nirate, ndabivugira kuko ari ukuri. Ni ukuri kwigaragaza.”

Yavuze ko ababangamira u Rwanda bameze nk’imiyaga iba ishaka gusubiza indege inyuma ariko ikanga ikagera iyo ijya.

Ati “Iyo igenda ihura n’imiyaga y’ubwoko bubiri. Hari uturuka imbere usa n’uyisubiza inyuma, hari n’uturuka inyuma ugasa n’uyisunika. Twe twagiye duhura n’ituruka imbere gusa ariko icyo nshaka kuvuga, iyo ndege kubera imbaraga iba ikoresha ngo ijye imbere nubwo hari iyo miyaga iragenda ikagera iyo ijya. Nuko tugenda natwe, ni nk’indege. Imiyaga iduturutse imbere ikadusunika tuyinyuramo tukagenda.”

Ku bundi buryo hari (imiyaga) iduturuka inyuma idusunika, ni mwebwe. Nimwe musunika u Rwanda mwanga ko hari ikirubuza gukomeza ngo rugere aho rwajyaga.

Ibyo bigaragarira mu iterambere ry’u Rwanda kuko buri mwaka rutera imbere muri buri rwego; harimo ubucuruzi, ubuhinzi, inganda n’izindi.

Yabwiye abitabiriye Rwanda Day ko ari bo mbaraga zisunika u Rwanda rukanyura mu bibazo byose rwahura nabyo.

Kagame yashishikarije abanyarwanda bari mu mahanga guhoza igihugu cyabo ku mutima, bakagifasha gutera imbere.

Rwanda Day ni umunsi umaze kumenyekana cyane kandi wagize uruhare runini mu gukangurira abanyarwanda baba mu mahanga kugira uruhare mu iterambere ry’igihugu cyabo. Uyu mwaka ibaye ku nshuro ya cumi.

Perezida Kagame yavuze ko kubona umwanya wo kuganira ku banyarwanda aho bari hose bifite aho bishingira kuko u Rwanda ari igihugu cyiyubaka kandi kiva kure

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza