U Bufaransa: Bernard Patureau wari umwe mu bayobozi ba Ibuka yitabye Imana

Yanditswe na Karirima A. Ngarambe
Kuya 13 Nzeri 2017 saa 03:39
Yasuwe :
0 0

Umuryango urengera inyungu z’abarokotse Jenoside yakorewe Abatutsi (Ibuka), ishami rikorera mu Bufaransa ryatangaje ko mu gitodo cyo kuri uyu wa Gatatu tariki ya 13 Nzeri 2017 ryamenye ko Bernard Patureau wari umwe mu bayobozi b’uyu muryango yitabye Imana.

Nk’uko Ibuka yabitangaje, Bernard Patureau wayoboraga ishami ry’uyu muryango i Chalette yaguye mu Bitaro bya Paul-Brousse i Paris.

Bernard Patureau n’umugore we Gahongayire Espérance batuye mu karere ka Loiret ahitwa Chalette sur Loing, akaba ari ho bashinze umuryango w’ishami rya Ibuka bise "Cellule Locale du Ibuka" mu 2007 .

Bamaze gushinga iri shami rya Ibuka muri ako gace, bagiye bakora ibikorwa byo gufasha abacitse ku icumu rya Jenoside yakorewe Abatutsi bari mu Rwanda.

Mu kiganiro IGIHE yagiranye na Gahongayire mu mpera za 2016, yagize ati "Kuva twatangira, twohereje ibikoresho byo kurema ingingo no gufasha abari babikeneye nk’imbago, amagare y’abafite ubumuga n’ibindi, mu bitaro bya AVEGA i Rwamagana. Twohereza kandi ibikinisho, ibitabo, DVDs, n’ibindi bintu bikenerwa mu mashuri y’ibanze (crèche) muri AVEGA Kigali."

Yakomeje agira ati "Imishani zo kudoda n’ibindi bikoresho byari bigamije gutangira uruganda rwo kudoda i Mbazi bigenewe imfubyi za Jenoside yakorewe Abatutsi, twubakiye kandi inzu umupfakazi utari wishoboye, tugurira ihene abapfakazi bagera kuri 50 i Huye, n’ibindi."

Umunyamabanga Nshingwabikorwa wa Komisiyo ishinzwe kurwanya Jenoside (CNLG), Dr.Jean Damascene Bizmana, yatangaje ko urupfu rwa Bernard Patureau ari « inkuru babaje cyane kuko yari umugabo witonda, ukomeye mu rugamba rwo kumenyekanisha Jenoside yakorewe Abatutsi, gufasha abacitse ku icumu, guhangana n’abajenosideri n’ibindi bikorwa by’ubutwari bitari bike »

Bernard Patureau wari umwe mu bashinze Ibuka mu Bufaransa yari umuntu ukora akazi gakomeye mu gushyira amakuru ku rubuga rwa internet rwa Ibuka France ku buryo yahoraga ifite amakuru ari ku gihe kandi ya ngombwa.

Dr Bizimana yagize ati “Ibuka France by’umwihariko ibuze umugabo w’Imena… Bernard uruhukire mu mahoro. Abo mwafatanyaga urugamba tuzahora tukwibuka kandi twubakira ku rugero watweretse."

Igihe cyo gusezeraho bwa nyuma Bernard Patureau ntikiratangazwa.

Bernard Patureau witabye Imana aha yari kumwe n’umugore we Gahongayire Espérance

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza