U Budage: Abanyarwanda bizihije Umunsi Mpuzamahanga w’Abagore hakomozwa ku ruhare rwabo mu iterambere

Yanditswe na Muhonzire Sylvine
Kuya 23 Werurwe 2021 saa 10:25
Yasuwe :
0 0

Ambasade y’u Rwanda mu Budage iherereye i Berlin yizihije Umunsi Mpuzamahanga w’Abagore mu muhango witabiriwe n’ingeri zitandukanye, harimo abadepite, abahanzi n’Abanyarwanda batuye mu Rwanda no mu Budage.

Ubusanzwe uyu munsi wizihizwa ku tariki 8 werurwe, ariko Abanyarwanda baba mu Budage bawizihije tariki 20 Werurwe 2021. Ni umuhango wabaye hifashishijwe ikoranabuhanga nk’imwe muri gahunda zashyizweho mu rwego rwo kwirinda ikwirakwira rya Coronavirus.

Umujyanama wa mbere muri Ambasade y’u Rwanda i Berlin, wari uhagarariye Ambasaderi, Nshimiyimana Benedicto, yavuze ko agaciro k’umugore mu Rwanda no ku Isi muri rusange kamaze kugera ku ntambwe ishimishije ariko hakwiye kongerwamo ingufu abagore bakagaragara mu nzego z’ubuyobozi ari benshi.

Ati “N’ubwo intambwe yatewe ishimishije, dushingiye ku ngero z’inkuru ebyiri zivugwa kuri ubu muri politiki, ari zo kuba Amerika yishimira kubona Visi Perezida w’umugore nyuma y’imyaka 245 y’ubwigenge na Tanzania bishimira kubona Perezida w’umugore nyuma y’imyaka 59 y’ubwigenge. Dukwiye kwihutisha ingamba zatuma uburinganire n’ubwuzuzanye bigerwaho mu gihe cya vuba.“

Mukangango Marie uhagarariye itsinda ry’abari n’abategarugori muri Diaspora y’u Rwanda mu Budage we yagarutse ku ruhare Abanyarwandakazi bahatuye bagira mu iterambere ry’u Rwanda.

Yagize ati “ Hari umushinga wakozwe n’abari n’abategarugori uherutse gutahwa mu Rwanda mu kwezi kwa gatatu uyu mwaka. Icyo gihe hakusanyijwe Miliyoni icyenda z’amafaranga y’u Rwanda yagenewe Koperative Igisubizo Gitara iri mu Karere ka Nyaruguru. Uyu mushinga ukaba ugenewe gutera inkunga ubworozi bw’amatungo magufi ku miryango 90 iri mu Kagari ka Coko, Umurenge wa Cyahinda.”

Ni umuhango witabiriwe kandi n’Umudepite uhagarariye abagore mu Nteko Ishinga Amategeko y’u Rwanda, Uwineza Beline, wavuze ku ntambwe igihugu cyateye mu kubahiriza ihame ry’uburinganire n’ubwuzuzanye.

Ati “Umugore yahawe uburenganzira n’uruhare ku mutungo, nk’ubutaka n’ibindi, hemejwe uburinganire bw’ibitsina byombi mu nzego zose, ndetse hemezwa ko kuri 30% mu nzego zose z’ubuyobozi bw’igihugu hakwiye kugaragaramo Abanyarwandakazi. ”

“Ingamba igihugu cyafashe mu kurushaho guteza imbere uburinganire n’ubwuzuzanye mu Rwanda tuzikesha ubuyobozi bw’igihugu bwiza no kubongerera ubushobozi mu kwitinyuka kuko bashoboye.”

Uyu muhango witabiriwe n’abahanzikazi b’Abanyarwanda barimo Audia Intore, uririmba indirimbo gakondo, Sonia Singh Mwumvaneza na Donatha Kankindi wavuze umuvugo utaka ubwiza, umutima mugari, inkingi y’umuryango utekanye n’ubutwari bw’umutegarugori.

Abanyarwanda baba mu Budage bizihije Umunsi Mpuzamahanga w’Abagore hakomozwa ku ruhare rwabo mu iterambere
Uyu muhango wabaye hifashishijwe ikoranabuhanga
Aba ni bamwe mu batumirwa bakuru bari bitabiriye umuhango wo kwizihiza Umunsi Mpuzamahanga w'abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .