00:00:00 IGIHE NETWORK KN KINYARWANDA EN ENGLISH FR FRANCAIS

U Bubiligi: Imyuzure yahitanye benshi, abandi bari mu kaga; Abanyarwanda bahumurijwe

Yanditswe na Karirima A. Ngarambe
Kuya 16 Nyakanga 2021 saa 11:53
Yasuwe :
0 0

Abaturage barenga 120 bahitanywe n’imyuzure yatewe n’imvura yaguye mu bihugu bitandukanye byo ku Mugabane w’u Burayi, kuri uyu wa Gatanu tariki ya 16 Nyakanga.

Guverinoma y’u Bubiligi yatangaje ko uyu munsi habaruwe abaturage bagera kuri 20 bahitanywe n’umwuzure mu gace ka Liège.

Uyu munsi kandi Umwami n’umwamikazi n’abayobozi bakuru mu Bubiligi bagiye gusura abaturage ba Liège ngo babahumurize kuri ibyo byago bagize.

Imvura yateye imyuzure mu Burayi imaze guhitana abantu bagera kuri 120. Mu Budage ho haravugwa ko hari benshi baburiwe irengero kubera uyu mwuzure n’ingaruka zawo.

Uburengerazuba bw’uBudage ni bwo bakozweho cyane kuko hamaze kubarurwa abantu bapfuye 103 kuri uyu wa Gatanu.

Mu bihugu by’u Bubiligi, u Budage, u Buholandi, Luxembourg n’u Busuwisi havuzwe ko ari ubwa mbere bahuye n’ibibazo by’ingutu nk’ibi nyuma y’intambara zose zabayeho muri aka gace k’u Burayi.

Uturere twagezweho n’ibi biza twagize igihombo kuko usibye ubuzima bw’abo byahitanye, byanangije ibikorwaremezo bitandukanye birimo imvura yatwaye ibintu birimo imodoka, irengera inzu n’ibindi. Amatungo menshi yapfuye kubera kurohama mu mazi, ibintu byo mu nzu z’abantu byose birangirika, umuriro n’amazi na gaz byose birahagarara ku buryo ubuzima busa n’ubwahagaze.

Nyuma y’ibi biza, mu Bubiligi hashyizweho ibigo bishinzwe kwakira abantu bagahabwa ubufasha guhera ku myambaro, icyo bafungura, aho baryama n’ibindi byafasha abantu kuramuka.

Mu kiganiro na IGIHE, Umuyobozi wa Diaspora Nyarwanda mu gace ka Liège, Eric Twagirimana, yavuze ko nta Munyarwanda waburiye ubuzima bwe muri iyi myuzure.

Yagize ati ‘‘Turi mu bihe bikomeye cyane, maze imyaka 27 muri Liège ariko ni ubwa mbere mbona ibintu nk’ibi by’amakuba adasanzwe. Nta Munyarwanda kugeza ubu wabuze ubuzima uretse abagize ibibazo byo kurengerwa n’amazi yabasanze mu nzu nkuko bimeze hirya no hino muri uyu mujyi n’uwo bitaranye wa Wallonie.’’

Yashimye Abanyarwanda batuye Liège batangiye kwishyira hamwe kugira no gutanga ubufasha uko bashoboye.

Ati ‘‘Ndashimira cyane Abanyarwanda batuye Liege kuko batangiye hari abatanga amashuka, ibiringiti n’ibindi bikoresho by’ibanze ku babikeneye. Ibi biza mbimazemo iminsi ibiri ariko kubibona n’amaso birakomeye. Nkomeje Abanyarwanda n’abandi baturanyi bacu bose muri ibi bihe bitoroshye kuko njye nagize amahirwe nari narateguye ibiruhuko n’umuryango wanjye, twageze i Kigali mu gitondo.

Mu Bubiligi abantu bamwe baburiwe irengero ndetse abaturage 21.000 babuze umuriro kubera ingaruka z’ibiza. Igisirikare cyiyambajwe kugira ngo gitange ubutabazi bw’ibanze mu ntara enye mu icumi zagizweho ingaruka.

Inzu nyinshi zarengewe kubera imyuzure
Imodoka nyinshi zateruwe n'amazi, zimwe arazijyana
Abana bato barwanyweho mu kurokora ubuzima bwabo
Hagati y’u Budage n’u Bubiligi, inkangu zatwaye inzu ziragenda, imihanda nayo irariduka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .