Kwamamaza

U Bubiligi:Ikiganiro na Kayiganwa wubatse amashuri i Nyamasheke aho yarerewe

Yanditswe kuya 19-08-2016 saa 14:26' na Karirima A. Ngarambe


Kaïga Kayiganwa ni umunyarwandakazi umaze imyaka 52 atuye mu Bubiligi, aho yageze muri 1964; avuga ko nubwo yabaye mu mahanga igihugu cye cyamugumye mu bitekerezo byatumye akigarukamo akaboneraho no kubaka ishuri i Nyamasheke aho yakuriye.

Kayiganwa yagiye mu Bubiligi ahunze amateka mabi yatotezaga Abatutsi muri iyo myaka nk’uko yabitangarije IGIHE.

Avuga ko n’ubwo yari impunzi, igihugu cy’u Rwanda cyamugumye mu bitekerezo, aho muri 1980 yongeye kugerageza kukigarukamo bigoranye.

Ati "Nigeze kubabazwa cyane n’aho Ambasade y’u rwanda mu Bubiligi icyo gihe yanyimye Visa, kuko nagenderaga kuri pasiporo Mbiligi, ariko bakarenga bakayiha umugabo wanjye w’Umubiligi, umugabo wanjye biramutangaza ukuntu umunyarwanda w’inkomoko yimwa visa we ufite inkomoko y’Ububiligi akayihabwa, nibwo bahisemo gukoresha ubundi buryo kugeza ubwo ninjiye mu gihugu bigoranye."

Kayiganwa akomeza avuga ko yagiye ahura n’ibindi bintu bibabaje aho yavanwaga mu modoka inshuro nyinshi we na bagenzi be yari yagiye gusura, bikamubabaza impamvu icyo gihe bari bagikorerwa ivangura, niko kubwira inshuti ze ati ’uru Rwanda jye sinzarugarukamo, ndusezeyeho.’

Icyakora ngo ku bw ‘inshingano se yari yaramuhaye zo gukurikirana amasambu yari yarasize i Nyamasheke byatumye yongera kwiyemeza kugaruka mu Rwanda nyuma ya Jenoside yakorewe Abatutsi.

Yagize ati « Mbere yo gusaza data yari yarampaye ubutware bw’umuryango, anansaba ko nazakurikirana ibintu bye birimo isambu ye yari i Mwezi muri Nyamasheke, ibi bikaba bimwe mu byatumye numvira data koko, numva ko igihe bizashobokera nzajya mu Rwanda nkabikurikirana.Nibwo naje gusubirayo nyuma y’aho Inkotanyi zigaruriye amahoro mu Rwanda, zimaze guhagarika jenoside yakorewe Abatutsi. »

« Ngeze i Nyamasheke, nasanze isambu ya data barayituyemo, nanga kujya mu manza, mbasaba ko ubwabo bumvikana bakampa aho nanjye nzajya njya nkumva ndi iwacu, niko byagenze koko, abayituyemo, bishyize hamwe barahampa. »

Kayiganwa akomeza avuga ko icyo gihe yasanze amashuri yo muri ako karere yarangiritse cyane, afata icyemezo cyo kuyubaka ariko abanza gukoresha n’umuhanda ujyayo.

Yubatse amashuri abanza i Mwezi mu Murenge wa Karengera mu Karere ka Nyamasheke, hakaba hamaze kuzura ibyumba bitandatu bifite agaciro ka miliyoni 150 z’amafaranga y’u Rwanda muri miliyoni 300 zizagenda ku byumba byose biteganyijwe.

Yagize ati «Aya mashuri ubu ayuzuye arakira abana bagera ku 1500, biga mu gitondo na nimugoroba, akaba aba afite agaciro ka miliyoni 300 y’amanyarwanda, amafaranga amaze kuyagendaho angana na miliyoni 150, hakaba hasigaye gushaka izindi miliyoni 150 z’amanyarwanda, ariko nyuma utwubakira yagabanyijeho miliyoni 30, ubu umuntu yavuga ko asigaye ari miliyoni 130. Ndizera ko abandi banyarwanda bafite umutima wo gufasha nibumva iki gikorwa bazaza tugafatanya ibisigaye kuko n’ubundi iri shuri aho rigeze ry’ubatswe n’abantu batandukanye bishyize hamwe bagaterateranya amafaranga ubu tukaba dufite aho tugejeje igikorwa."

Kayiganwa ashimira cyane abana n’umugabo we kuko ari bo babimburiye abandi mu gutangiza agaseke k’inkunga nyuma aza kwitabaza inshuti ze z’inkoramutima harimo Abasuwisi, Ababiligi, Abayapani, Abafaransa n’abandi.

Muri iki kiganiro, Kayiganwa yanze kwiyumanganya adashimiye Inkotanyi zagaruye amahoro mu Rwanda ubu akaba asubira iwabo yemye kandi akibonera n’amaso ibikorwa by’indashyikirwa igihugu kigenda kigeraho.

Ati « Mbere igihe habaga jenoside yakorewe Abatutsi, numvaga ntashaka kwerekana ko ndi umunyarwanda, ariko ubu numva nagenda mbibwira n’utabimbajije wese.Ndashimira Perezida Kagame cyane. Najyaga numva ibiganiro bye, nkumva ndakomeye. Jye mbona adasanzwe akora nk’umuntu twahawe n’Imana. »

Kayiganwa mu kiganiro n'umunyamakuru wa IGIHE-Belgique
Kayiganwa iwe mu rugo
Igice kimwe cy'aya mashuri cyaruzuye gitangira no gukorerwamo
Abanyeshuri bafite aho bidagadurira bakaba bakwandika no ku kibaho bari hanze

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved