U Bubiligi: Harimo kumurikwa amateka yihariye ku Rwanda binyuze mu gikorwa cyiswe RwandAfrica

Yanditswe na Karirima A. Ngarambe
Kuya 30 Ugushyingo 2019 saa 05:16
Yasuwe :
0 0

Guhera ku wa 29 Ugushyingo kugera ku wa 7 Ukuboza 2019, mu nzu ndangamuco ‘Theatre le Varia’ iherereye i Bruxelles mu Bubiligi, itsinda Ishyo Arts Centre rirakora igikorwa cy’ubuhanzi cyibanda ku muco n’amateka, by’umwihariko agaruka ku Rwanda mbere mu gihe na nyuma ya Jenoside.

Iki gikorwa kizwi nka “RwandAfrica” kizaba kirimo n’imikino y’ikinamico kizanashyirwa mu bikorwa n’iryo tsinda riyobowe n’umunyarwanda Carole Karemera, afatanyije n’umuhanzi Denis Mpunga, umwe mu banyafurika bakunze kugaragara ku rwego mpuzamahanga muri sinema n’amakinamico.

Mu kiganiro IGIHE yagiranye n’aba bahanzi ku wa 28 Ugushyingo 2019, bari mu Bubiligi, bagarutse ku buryo iki gikorwa bagiteguye n’uburyo kizafasha benshi kumenya amateka yihariye y’u Rwanda.

Karemera yagize ati “Iyi gahunda igamije kwerekana amateka y’u Rwanda rw’ejo hashize, uyu munsi n’ejo hazaza haba mu bugome bwakozwe igihe hakorwaga Jenoside yakorewe Abatutsi n’uko u Rwanda rwagiye rubisohokamo nyuma yayo, rukiyubaka n’imbere rwifuriza urubyiruko.”

Karemera avuga ko nk’umuntu wavukiye mu Bubiligi akanahakurira, yahisemo kujyana ubumenyi mu gihugu kavukire cy’ababyeyi, kugira ngo agire icyo akora mu muganda wo kubaka igihugu cyari cyaragizwe umuyonga.

Yavuze ko RwandAfrica ari gahunda ireba cyane urubyiruko rwaba urwo mu Rwanda cyangwa i Burayi kuko ibyakozwe muri Jenoside bitibagirana kandi ‘Bitanagomba kuduherana’.

Ati “Tugomba kubirenga tugakorera hamwe, ari abana bavuka kubishe bababazwa n’ibyo ababyeyi babo bakoze, ari abana biciwe ababo bose bakeneye kubaho neza, ubuhanzi rero n’imwe mu ntwaro zo kubafasha kubimenya no kubiganiraho mu buryo budahutaza uwariwe wese.”

Karemera yasobanuye ko imikino izerekanwa itandukanye, buri wose wihariye kandi ujyanye n’ibihe bitandukanye. Hari uwitwa ‘Hier, aujourd’hui, Demain’ cyangwa se Ejo heza, uyu munsi, Ejo hazaza ugenekeje mu Kinyarwanda na filimi yitwa ‘We call it love’ yanditswe na Felwine Sarr uyobowe na Denis Mpunga.

Hari kandi uwitwa ‘La Cathédrale sonore’ wanditswe na Cécilia Kankonda afatanyije na Carole Karemera, ‘Les enfants d’Amazi’ ugenewe cyane urubyiruko, wanditswe na Rivardo Niyénizigiye uyobowe na Bernard Chemin, Denis Mpunga na Carole Karemera.

Ni igikorwa kizamara iminsi icyenda izarangwa n’imigoroba ihuza abantu kugira ngo bongere baganire aho u Rwanda ruvuye, aho rugeze n’aho rwifuza kugana mu buryo bwo gusangira ibihangano ku banyaburayi n’Abanya-Afurika baba i Bruxelles.

Ku wa 7 Ukuboza uzaba ari umunsi udasanzwe mu gusoza, aho hazaba igitaramo kizatangira saa kumi n’ebyiri kikageza mu gitondo saa mbiri, kizitabirwa n’abahanzi barenga 50 bagize itsinda RwandAfrica baririmba, bivuga, babyina, bavuga ibisigo basoma interuro zimwe zo mu bitabo.

Hazaba n’ibiganiro byatumiwemo Félicité Lyamukuru uyobora Ibuka Mémoire &Justice-Belgique, Martine Beckers uharanira ko abakoze Jenoside yakorewe Abatutsi babihanirwa mu Bubiligi n’ahandi.

Hari kand Me Michèle Hirsch umwunganizi w’abiciwe muri Jenoside yakorewe Abatutsi mu manza zitandukanye ziri kubera mu Bubiligi, Jacques Delcuvellerie Uyobora ubuhanzi muri Groupov, wanayoboye Théatre Rwanda 94.

Mpunga yavuze ko ikintu cyose cyakoze ku mutima w’umuntu kidasaza ariko kandi kitagomba kumubera inzitizi ku buzima buri imbere.

Ati “Nibyo turimo dukora kugira ngo amateka u Rwanda n’abandi bagize ingorane nkarwo muri Afurika n’ahandi ibibazo bye kuba icyuho ahubwo ubuhanzi bube igikoresho kimeze nk’iteme ryo kwambukiraho tugana mu buzima butubereye.”

Mpunga yavuze ko Karemera akora kugira ngo ibijyanye n’umuco ntibibe gusa igikoresho cy’ubukungu n’iterambere ahubwo bibe n’uburyo bw’imibereho myiza y’abaturage, kuko nta gahugu katagira umuco.

Ati “Ibikorwa bye mu bihe bitari cyera bizavugwa mu mateka y’u Rwanda kuko arimo arabiba iteme rizahuza ibice byose by’u Rwanda kugira ngo urubyiruko rwibone mu ndorerwamo y’umunyarwanda koko.”

Yavuze ko mu kazi k’ubuhanzi bakora icyiza ari uko buri wese afite umwanya wo kuvuga icyo atekereza mu buryo bw’ubuhanzi bigahita ntawe bihutaje, kuko ikinamico rivuga rikina ariko rivuga ukuri buri wese akumva akibonamo akibaza cyangwa akisubiza.

Carole Karemera mu kiganiro na IGIHE mu Bubiligi
Carole Karemera yitegura kujya gukina
Cécilia Kakonda ari gutegura
Denis Mpunga mu kiganiro na Karirima Ngarambe wa IGIHE
Denis Mpunga na Carole Karemera baganira n'abo bafatanyije iki gikorwa muri Théatre Varia i Bruxelles
Herve Twahirwa aganira na Judo Kanobana ibijyanye n'itegura ry'iki gikorwa barimo
Ibinyamakuru byo mu Bubiligi birimo birandika kuri iki gikorwa
Ifoto ya bamwe bagize Itsinda rya RwandAfrica, uwicaye ahabanza iburyo ni Herve Twahirwa, Judo Kanobana, Abahagaze uhereye ibumoso ni Carole Karemera, Cécilia Kakonda na Denis Mpunga wicaye iburyo
Igihe biteguraga kwerekana umukino wa Rwanda 94 et La cantante de Bisesero
Jessica Rutayisire asura aho berekanira amateka y'ibyakozwe muri jenoside yakorewe Abatutsi
Judo na Herve Twahirwa baganira ku kazi barimo k'ubuhanzi bwa RwandAfrica mu Bubiligi
Kanobana Judo hagati na Carole Karemera baganira na Herve Twahirwa
Twahirwa Herve na Carole Karemera mu gutegura
Uherereye ibumoso ni Clotilde Kabale na Carole Karemera hagati n'itsinda ry'Ababirigi bakinana bari gukina mu gihe cyo kwitoza
Uhereye ibumoso ni Herve Twahirwa Judo Kanobana Carole Karemera na Denis Mpunga
Umunyamakuru wa IGIHE mu Burayi mu kiganiro na Carole Karemera ari kumwe na Denis Mpunga
Abantu binjira mu cyumba cyabereyemo igikorwa
Bashimira abaje kubareba no kubumva ari benshi
Carole Karemera aganira ni umwe mu baje kureba Rwanda 94 et la Cantate de Bisesero
Igihe Urubyiruko rwinshi rwari ruje kwitabira iyi gahunda ku munsi wa mbere tariki ya 29 Ugushyingo 2019
Igihe basuraga amafoto yerekana ubwicanyi bwakozwe muri jenoside yakorewe Abatutsi mu 1994 mu Rwanda
Igihe itsinda rya Rwanda 94 et la Cantate de Bisesero ryari risoje
Icyumba cyari cyuzuye Abanyaburayi benshi baje kumva amateka y'u Rwanda rwo muri 1994

Amafoto: Jessica Rutayisire


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza