U Bubiligi: Café Resto ya Keza yabaye ihuriro ry’Abanyarwanda basangira iby’iwabo

Yanditswe na Karirima A. Ngarambe
Kuya 26 Nzeri 2017 saa 09:52
Yasuwe :
0 0

U Bubiligi ni kimwe mu bihugu by’i Burayi usanga bituwe n’abimukira benshi bitewe n’amateka yacyo uturuka mu gihe cya gikoloni.

Muri abo bimukira usangamo harimo Abanyarwanda, Abarundi, Abanyekongo n’abandi.

Mu bihe by’ubukonje i Burayi (Hiver), akenshi abantu ntibasohoka ku buryo buboroheye. Ariko usanga abanyaburayi bafite umuco wo guhurira muri za Café, Taverne cyangwa Restaurant, bagahashya ubukonje basangira ibiganiro n’icyo kunywa, bagahuza urugwiro. Abandi baba bisomera ibinyamakuru, barebera televiziyo.

Buri gace kaba gafite inzu abahatuye bahuriramo, ugasanga baziranye.

Abanyarwanda n’abandi banyafurika batuye mu Bubiligi, ukurikije uburyo bakunda amateka n’iby’iwabo na bo havamo bamwe bagashinga inzu bahuriramo, wageramo ukumva biganirira mu ndimi z’iwabo, basangira ibinyobwa n’indyo by’iwabo.

Mu mugi wa Bruxelles, hari inzu nk’izo yakira Abanyarwanda, Abarundi n’abandi banyafurika benshi. Iyo IGIHE yasuye yitwa Café Resto « Archipel » iyoborwa na Kaze Nadine. Ukiyinjiramo ku mugoroba, wakirwa n’abanyafurika banyuranyuranamo iyo bacitse imirimo.

Abanyarwanda bahatuye n’abari mu ngendo, barahahurira bakaganira. Kimwe n’abandi Banyafurika baba baganira iby’iwabo, amakuru yiriwe kuri internet, gahunda z’amashyirahamwe bahuriramwo, inama runaka izaba, umuziki mwiza wo mu bihugu bavukamo, indyo bifuza ikabageraho, brochettes n’igitoki bakimara ipfa.

Abashyitsi baturutse kure bashaka kwiyibutsa ibyo muri Afurika imiryango basuye niho ibakirira.

Keza Nadine yabwiye IGIHE ko ashimishwa no kwakira Abanyafurika biganjemo Abanyarwanda baturuka hirya no hino muri Amerika, Afurika n’ahandi kandi bose bakishimira serivisi bahabwa.

Yagize ati "Ndashimira by’umwihariko Diaspora nyarwanda iritanga, dukorana neza .... N’abantu bose baje hano bisanga nko mu rugo"

Akomeza avuga ko ababagana bose bishimira amafunguro.

Iyi Café-Resto « Archipel » iri mu gace bita « Matonge », kamwe mu duce twiganjemo ubucuruzi bw’ingeri zose kazwi cyane muri Komine ya Ixelles muri Bruxelles-Capitale, hafi y’amarembo bita "Porte de Namur" azwi mu mateka y’Umujyi wa Bruxelles, yubatswe mu kinyejana cya 19.

Iherereye kandi ku gasozi bita ‘Waerenbergh’, hagati ya Chaussée d’Ixelles, Chaussée de Wavre n’umuhanda bita Rue de la Paix n’utundi duhanda twinshi dushamikiyeho duhurira ahantu hazwi mu bucuruzi buhakorerwa nk’amaduka ari mu nzu ngari bita ‘Galerie d’Ixelles, Quartier Saint-Boniface’.

Amateka y’aka gace ahera kuri “Maison Africaine’’ yahurirwagamo n’Abanyafurika benshi, ikaba n’icumbi ry’abanyeshuri bo muri kaminuza baturukaga muri Repubulika iharanira Demokarasi ya Congo, bahawe buruse n’u Bubiligi ahagana mu myaka ya 1950.

Nyuma haje kwiyongeraho abaturuka mu Rwanda n’u Burundi, kugeza aho uyu munsi Matonge ihuza abaturage baturuka mu bihugu bisaga 45 bya Afurika.

Nyuma y’ubwigenge bwa Repubulika Iharanira Demokarasi ya Congo, abimukira bariyongereye, amaduka atangira gufungurwa muri ako gace acuruza ibintu by’iwabo, utubari, amaresitora, aho bogoshera, ahacururizwa ibitenge, ahacururizwa imirimbo n’ibindi.

Bijyanye n’ubwigenge bw’ibindi bihugu byo mu Biyaga bigari birimo u Rwanda n’u Burundi, Matonge yakomeje gukorerwamo n’abimukira benshi baturukaga muri Afurika yo hagati, haba ahantu hakomeye kandi hakunzwe ku Banyafurika n’Ababiligi ndetse n’abandi banyaburayi baza kuhahahira.

Mu myaka ya 1990, Matonge yari igizwe ahanini n’Abanye-Congo, nyuma haza Abanyarwanda, Abarundi, Abanya-Senegal, Abanya-Mali, Abahinde n’abandi.

Aka gace kandi ugasangamo izindi nzu zafunguwe n’Abanyarwanda zizwi ku mazina ya « Umbrella, Boule Bleu », abahagenda bose bakagira aho babika imodoka zabo, nko muri Parking chez Jean Pierre Rugero, hakaba ibikorwa bitandukanye birimo Rwandacash & Africash ku bashaka kohereza no kwakira amafaranga n’ibindi bikorwa by’abakorera Business mu Bubiligi n’ahandi. Izo serivise zitandukanye zigakurura Abanyarwanda.

Keza Nadine uyobora Café Resto « Archipel » iganwa n'Abanyarwanda benshi i Bruxelles
Keza Nadine ashimira Diaspora nyarwanda uburyo imugana cyane
Uretse Abanyarwanda n'abandi Banyafurika bagana Café-Resto « Archipel »
Hategurirwa amafunguro menshi ya kinyafurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza