00:00:00 IGIHE NETWORK KN KINYARWANDA EN ENGLISH FR FRANCAIS

U Bubiligi bwarekuye Pierre Basabose ukekwaho uruhare muri Jenoside

Yanditswe na Umwali Zhuri
Kuya 17 Mata 2021 saa 11:50
Yasuwe :
0 0

Ubutabera bw’u Bubiligi bwafashe umwanzuro wo kuba burekuye Pierre Basabose wari ukurikiranyweho ibyaha bya Jenoside wari watawe muri yombi ku wa 30 Nzeri umwaka ushize.

Umunyamategeko we Jean Flamme niwe watangaje ko Basabose yarekuwe mu gihe urubanza rwe rutaratangira mu mizi nk’uko inkuru dukesha RTL ibivuga.

Basabose mu 2020 ubwo yafatatwaga, yafatiwe umunsi umwe n’abandi bagabo babiri aribo Séraphin Twahirwa na Christophe Ndangali. Uyu mugabo yafatiwe muri Komine Hainaut.

Ashinjwa ko ari umwe mu bari bagize “Akazu”, agatsiko k’abantu bari aba hafi ba Perezida Habyarimana, bashinjwa ko bagize uruhare muri Jenoside yakorewe Abatutsi.

Ubushinjacyaha bw’u Bubiligi bwatangiye iperereza ku ruhare rwe muri Jenoside cyo kimwe n’urwa bagenzi be bafatiwe umunsi umwe, Twahirwa na Ndangali. Bashinjwa ko bagize uruhare mu bwicanyi bw’Abatutsi bwakorewe mu Mujyi wa Kigali i Gikondo na Kacyiru.

Twahirwa yahoze ari umukozi wa Minisiteri y’imirimo ya Leta (Minitrape), akekwaho bwicanyi bwakorewe mu bice bya Gatenga cyane ko ari we wari ukuriye Interahamwe zaho.

Bivugwa ko Ndangali we ari mu ntiti zikomoka i Byumba no mu Ruhengeri zasinye inyandiko yo gushishikariza Abahutu bo mu Majyaruguru kwica Abatutsi bise ‘Impuruza y’abakomoka mu duce twugarijwe twa Ruhengeri na Byumba’.

Abari mu iperereza ku ruhare rwabo bakoze urugendo mu Rwanda mu gushaka ibimenyetso bishinja abaregwa no kumva abatangabuhamya.

U Bubiligi bumaze gutegura imanza eshanu zifite aho zihuriye na Jenoside yakorewe Abatutsi mu 1994 (muri 2001, 2005, 2007, 2009 na 2019), zatumye abantu icyenda bakatirwa.

Mu mpera z’umwaka ushize wa 2019, Fabien Neretse yakatiwe igifungo cy’imyaka 25 nyuma yo guhamywa icyaha cya Jenoside n’ibyaha by’intambara. Abandi bantu bane bategereje kuburanishwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .