U Bubiligi: Abanyarwanda bateguye igitambo cya misa yo gusabira Musenyeri Ngirabanyiginya

Yanditswe na Ishimwe Israel
Kuya 28 Ukwakira 2016 saa 08:56
43 29

Abanyarwanda baba mu Bubiligi barezwe na Musenyeri Ngirabanyiginya Dominiko witabye Imana mu kwezi gushize, bateguye igitambo cya Misa yo kumusabira, kizakurikirwa n’ubuhamya buzatangwa na bamwe mu babanye nawe ndetse n’abapadiri bakoranye ivugabutumwa.

Iki gikorwa giteganyijwe tariki ya 13 Ugushyingo 2016 saa munani n’igice z’amanywa, kizabera muri Kiliziya ya Saint Charles i Bruxelles mu Bubiligi nk’uko byatangajwe na François Lucien Hitimana umwe mu bari gutegura uyu muhango.

Yagize ati “Twateguye igikorwa cyo gusabira Musenyeri Dominiko Ngirabanyiginya wari Musenyeri w’icyubahiro muri Diyosezi ya Nyundo. Ni umuntu wabaye intangarugero mu kazi ke k’ubusaseridoti mu myaka 49 yamaze mu burezi cyane muri Diyoseze ya Nyundo, ndetse n’uruhare yagize mu guteza imbere umuziki w’umwimerere mu Rwanda.”

Hitimana avuga ko bateganya kuzahura n’Abanyarwanda baturutse mu mpande zitandukanye z’u Bubiligi, ndetse no hanze y’iki gihugu.

Ati “Turifuza ko hatagira uwaba yaramumenye wacikanwa n’uwo munsi wo kumuha icyubahiro no kumwibuka uzabera hano mu Bubiligi kuko yareze benshi bari mu nzego zitandukanye no mu gihugu imbere.

Iki gitambo cya misa giteganyijwe kuyoborwa n’abapadiri barenga 10, bazatanga inyigisho ndetse n’ibiganiro bigaruka ku bikorwa byamuranze.

Musenyeri Dominiko Ngirabanyiginya yitabye Imana afite imyaka 79, mu ijoro ryo kuwa 7 Nzeri 2016, azize uburwayi.

Yavukiye muri Paruwasi ya Kabgayi mu 1937, atangira amashuri abanza mu 1947, ay’isumbuye ayatangira kuya 15 Gashyantare 1954, ahava akomereza mu Iseminari Nto ya Nyundo. Mu 1959 yatangiye Iseminari Nkuru, mu 1961 yize Tewolojiya i Roma ahabwa ubupadiri mu wa 1964.

Yatangiye ubutumwa muri Paruwasi ya Mibirizi ari Padiri wungirije,mu 1967 ahabwa ubutumwa bwo kuba umurezi mu Iseminari Nto ya Nyundo, naho mu wa 1973 agirwa umuyobozi w’Iseminari yitiriwe Mutagatifu Piyo X yo ku Nyundo. Mu mwaka wa 1989 yizihije Yubile y’imyaka 25 abaye Umusaseridoti.

Inkuru bifitanye isano: Musenyeri Ngirabanyiginya yitabye Imana

Musenyeri Dominiko Nyirabanyiginya yitabye Imana afite imyaka 79
Abanyarwanda baba mu Bubiligi bateguriye Musenyeri Dominiko Nyirabanyiginya igitambo cya Misa yo kumusabira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE