U Bubiligi: Abanyarwanda basezeyeho Amb. Nduhungirehe wishimira ibikorwa bikomeye byagezweho (Amafoto)

Yanditswe na Karirima A. Ngarambe
Kuya 4 Ukwakira 2017 saa 10:11
Yasuwe :
0 0

Mu mpera z’icyumweru gishize, Ambasade y’u Rwanda mu Bubiligi yateguye ibirori byihariye byo gusezeraho Ambasaderi Nduhungirehe Olivier uheruka kugirwa Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba.

Amb. Nduhungirehe yashimye Abadipolomate na Diaspora Nyarwanda bakoranye neza mu mezi 20 ari Ambasaderi w’u Rwanda mu Bubiligi ariko akanashimira by’umwihariko Perezida Kagame wamugiriye icyizere akamuha izindi nshingano.

Mu kiganiro na IGIHE, Amb. Nduhungirehe wanyuzwe n’urugwiro Abanyarwanda bamugaragarije, yavuze ko mu gihe yamaze muri iyo Ambasade hari ibikorwa bikomeye byakozwe Abanyarwanda bakabigiramo uruhare.

Yashimiye imiryango n’amashyirahamwe y’abarokotse Jenoside yakorewe Abatutsi ati “Twakoranye neza mu gukomeza akazi ko kugira ngo Jenoside yakorewe Abatutsi yabaye mu Rwanda itakwibagirana kandi igakomeza kwibukwa hano mu Bubiligi.”

Yavuze ko hagiye hongerwa ibikorwa byo kwibuka, anibutsa ko hanashyizweho inzibutso ebyiri za Jenoside mu mujyi wa Buruseli n’uwa Charleroi.

Yagize ati “Urwibutso rwa hano i Buruseli Woluwe-Saint-Pierre rwari rwarashyizweho mu myaka irenga 10 ariko rwari rwaranditswe nabi ku buryo abahakana cyangwa abapfobya Jenoside bazaga gukomeza ibikorwa byabo byo kuyipfobya. Ku itariki ya 6 Mata, ku bufatanye bwa Minisitiri w’Ububanyi n’Amahanga w’u Bubiligi na Burugumesitiri wa St Pierre n’amahanga hakaba harashyizweho ikimenyetso gisobanura neza ko ari Jenoside yakorewe Abatutsi.”

Izo nzibutso zose zikaba zizafasha Abanyarwanda n’Ababiligi kwibuka Jenoside n’amateka yayo nyakuri.

Yanibukije ko ubu umushinga w’itegeko rihana abahakana n’abapfobya Jenoside yakorewe Abatutsi wamaze gushyikirizwa Inteko Ishinga Amategeko y’u Bubiligi.

Uretse ibirebana na Jenoside, Amb. Nduhungirehe yavuze ko yibukije Abanyarwanda gukomeza guteza imbere Umuryango Nyarwanda, bakanagira ibikorwa bitandukanye byaba iby’ubucuruzi, umuco na Siporo no gushishikariza urubyiruko kwitabira ibikorwa bya Diaspora Nyarwanda kuko byagaragaye ko batitabiraga cyane.

Yanashimiye by’umwihariko ubwitabire bw’Abanyarwanda mu kwakira Perezida Kagame ubwo aheruka mu Bubiligi yitabiriye inama yateguwe n’Umuryango w’Ubumwe bw’u Burayi yiga ku iterambere, bakanitabira ari benshi Rwanda Day yakurikiyeho nyamara barayimenye mu minsi mike.

Bigeze mu gihe cy’amatora y’Umukuru w’Igihugu, Ambasaderi avuga ko bitabiriye ari benshi barenga 2000, bikubye inshuro ebyiri abatoye mu gihe cya Referendum mu 2015.

Amb. Nduhungirehe Olivier uheruka kugirwa Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba
Nyinawase Pulcherie uyobora Diaspora Nyarwanda mu Bubiligi, DRB Rugali
Ambasade y’u Rwanda mu Bubiligi yateguye ibirori byihariye byo gusezeraho Ambasaderi Nduhungirehe Olivier
Musare Faustin, Umujyanama wa mbere muri Ambasade y'u Rwanda mu Bubiligi
Nyinawase Pulcherie uyobora DRB Rugali ashyikiriza impano Amb.Nduhungirehe
Impano yagenewe na Diaspora Nyarwanda imushimira ko bakoranye neza ari Ambasaderi w'u Rwanda mu Bubiligi

Amafoto: Jessica Rutayisire


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza