00:00:00 IGIHE NETWORK KN KINYARWANDA EN ENGLISH FR FRANCAIS

Steve Nkusi yasezeweho bwa nyuma

Yanditswe na Iradukunda Serge
Kuya 26 Kanama 2021 saa 09:31
Yasuwe :
0 0

Inshuti n’abavandimwe b’umusore w’Umunyarwanda, Steve Nkusi uherutse kwitaba Imana arohamye muri Canada, bakoze umuhango wo kumusezeraho bwa nyuma.

Kuva Steve Nkusi wari ufite imyaka 24 yarohama ku wa Gatandatu tariki 21 Kanama 2021, ibikorwa byo kumushakisha byahise bitangira. ku wa 25 Kanama 2021 nibwo Polisi yo muri Canada yatangaje ko yabonye umurambo w’umusore bikekwa ko ari we.

Uyu murambo wahise ujyanwa ku ishami rya polisi rishinzwe umutekano wo mu mazi riherereye i St Catherines, aho umuryango wa Steve Nkusi wawusanze bemeza koko ko ari umwana wabo.

Amakuru dukesha CBC avuga ko umurambo wa Steve Nkusi wabonetse ku wa Gatatu tariki 25 Kanama 2021 mu bilometero bigera kuri bine uvuye ku bunigo bwa Welland. Ngo wari muri metero 500 uvuye ku nkombe, aho wabonywe n’umuntu wari utwaye ubwato ahita ahamagara polisi.

Uyu murambo wahise ujyanwa muri laboratwari kugira ngo hafatwe ibimenyetso. Nyuma yo kuboneka ku murambo wa Steve Nkusi, inshuti n’abavandimwe be bahise bategura umuhango wo kumusezeraho wabereye ku nkombe z’aya mazi yarohamyemo ahazwi nka Sunset Beach mu Mujyi wa St. Catharines wo muri Niagara.

Steve Nkusi yarohamye ku wa Gatandatu nyuma yo gusohokana n’inshuti ze bari kwishimisha mu bwato, hanyuma aza gusimbuka agiye koga.

Ageze mu mazi ngo bamubonye amerewe nabi, yananiwe koga, bagerageza kumuvanamo ariko biranga. Kuva iki gihe ibikorwa byo kumushakisha byahise bitangira ariko aza kuboneka ku wa 24 Kanama 2021 yashizemo umwuka.

Nkusi Steve yari umusore umenyerewe mu mukino wo gusimbuka uzwi nka ‘Jump high’ gusa kubera imvune ntiyari agikina nk’uwabigize umwuga ahubwo yari amaze igihe gito atangiye urugendo rwo kumurika imideli binyuze ‘Angie’s models’ ikorera Ottawa.

Uyu mwaka yitabyemo Imana ni na wo yari arangijemo amashuri ye ya kaminuza mu bijyanye n’icungamutungo.

Steve Nkusi yasezeweho bwa nyuma
Inshuti n'abavandimwe ba Steve Nkusi bagiye kumusezeraho bwa nyuma ku mazi y'aho yarohamiye
Steve Nkusi yahagarariye Canada mu 2015 muri 'Junior Pan American Games'
Steve Nkusi yaje guhagarika uyu mukino wo gusimbuka nyuma yo kuvunika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .