Col Rutabana yatanze kopi z’inyandiko zimwemerera guhagararira u Rwanda muri Uganda

Yanditswe na IGIHE
Kuya 25 Werurwe 2021 saa 09:06
Yasuwe :
0 0

Ambasaderi w’u Rwanda muri Uganda Col Joseph Rutabana yatanze kopi z’impapuro zimwemerera guhagararira u Rwanda muri icyo gihugu.

Izo kopi zashyikirijwe Minisitiri w’Ububanyi n’amahanga wa Uganda, Sam Kutesa kuri uyu wa Kane nkuko Ambasade y’u Rwanda muri icyo gihugu yabitangaje ibinyujije kuri Twitter.

Muri Nzeri umwaka ushize nibwo Inama y’Abaminisitiri yagize Col Rutabana Joseph Ambasaderi w’u Rwanda muri Uganda asimbuye Gen Maj (Rtd) Frank Mugambage wari umaze imyaka 11 ari ambasaderi w’u Rwanda muri icyo gihugu.

Ambasaderi Rutabana yari asanzwe ari ambasaderi w’u Rwanda muri Israel

Guhera mu 2017 umubano w’u Rwanda watangiye kuzamo agatotsi ubwo abanyarwanda batangiraga gutotezwa muri Uganda bikozwe n’inzego zaho z’umutekano, bamwe bagafungwa cyangwa bagatoteza binyuranyije n’amategeko.

Kuva icyo gihe ni nabwo u Rwanda rwatangiye gushinja Uganda gukorana n’abashaka kuruhungabanyiriza umutekano, bahabwa rugari muri icyo gihugu n’ububasha bwo kugirira nabi abanyarwanda badashyigikiye ibyo bikorwa.

Umubano w’ibihugu byombi wakomeje kuzamba kugeza ubwo muri Kanama 2019 ku buhuza bwa Angola na Repubulika Iharanira Demokarasi ya Congo, ibihugu byombi byasinye amasezerano agamije kubyutsa umubano no guhosha ibibazo byari bimaze iminsi hagati y’ibihugu byombi.

Muri Kamena na Nyakanga 2020, Uganda yagiye yoherereza u Rwanda bamwe mu baturage barwo bari bamaze igihe bafungiwe muri icyo gihugu mu buryo bunyuranyije n’amategeko, mu mugambi wo gukomeza guhosha ibibazo bihari.

Nubwo gutabwa muri yombi mu gihiriri ku banyarwanda bari muri icyo gihugu byagabanyutse, biracyakorwa ndetse hari abakijugunywa ku mupaka nyuma y’igihe bafunzwe mu buryo bunyuranyije n’amategeko muri Uganda.

Mbere y’umwaka wa 2017 umubano w’u Rwanda na Uganda wagaragariraga cyane mu bucuruzi hagati y’ibihugu byombi bwiyongeraga umunsi ku munsi. Imibare ya Banki Nkuru y’Igihugu yo mu mezi atandatu ya mbere ya 2016, igaragaza ko ubucuruzi bw’ibihugu byombi bwari bwiyongereye ku kigero cya 26.9%, ugereranyije n’amezi atandatu ya mbere ya 2015.

Ambasaderi Rutabana yashyikirije kopi z'inyandiko zimwemerera guhagararira u Rwanda muri Uganda
Col Rutabana yagiranye ibiganiro na Minisitiri Kutesa ku mubano w'ibihugu byombi
Col Rutabana yagizwe ambasaderi w'u Rwanda muri Uganda guhera muri Nzeri umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .