Canada: Icyo Abanyarwanda bavuga ku kwemererwa gukoresha indangamuntu binjira mu Rwanda

Yanditswe na IGIHE
Kuya 17 Ugushyingo 2017 saa 10:44
Yasuwe :
0 0

Ikigo cy’Igihugu gishinzwe Abinjira n’Abasohoka, cyatangaje ko guhera mu mwaka utaha wa 2018, abanyarwanda baba mu mahanga bafite ubwenegihugu bubiri, bazajya bakoresha indangamuntu zabo igihe bashaka kwinjira mu Rwanda.

Iki cyemezo cyakiranwe ibyishimo n’abanyarwanda baba mu mahanga bakunze gusaba ko bakurirwaho ibyo kuriha Viza igihe bashaka kwinjira mu Rwanda kandi ari abenegihugu.

Mu nama y’Umushyikirano iheruka, Umunyarwanda uba muri Canada, John Kijuli, yavuze ko basabwa kuriha Viza y’u Rwanda nyamara bafite indangamuntu, asaba Perezida wa Repubulika ko bakurirwaho kwishyura viza.

Yagize ati “Twashimye uburyo abantu bose basura u Rwanda benshi bakava Kenya bakerekana indangamuntu, ariko twebwe tuvuye muri Canada dufite indangamuntu y’u Rwanda, ni twebwe twenyine turiha Viza abandi bose ntibariha viza y’u Rwanda. Twagira ngo tubasabe kubona ubufasha nk’ubw’abandi babona twe kujya turiha viza.”

Mu kiganiro IGIHE yagiranye na Kijuli kuri uyu wa Gatanu, yavuze ko nk’abanyarwanda bafite n’ubwenegihugu bwa Canada bishimiye ko bazajya binjira mu Rwanda bakoresheje indangamuntu y’u Rwanda nkuko babisabye.

Yagize ati “Hano muri Canada, twasubijwe icyifuzo twatangiye mu mushyikirano. Hari ubwo wabaga ugomba gutabara byihutirwa uri hano ntushobore gusohoka utarabona Viza. Bikaba ari mu mpera z’icyumweru (Week-End) ukagira umuhangayiko w’ibyago ukagira n’uwa Viza.”

Yongeraho ko wasangaga abana b’abanyarwanda bakuriye muri Canada cyangwa n’ahandi bagira ubunebwe bwo gushaka Viza bigatuma batajya gusura igihugu cyabo cy’inkomoko.

Ikigo cy’Igihugu gishinzwe Abinjira n’Abasohoka, cyanatangaje ko abagenzi baturutse mu bihugu byose byo ku isi, bazajya bahabwa viza y’iminsi 30 bageze aho binjirira mu Rwanda bitagombye kubanza kuyisaba nkuko byari bisanzwe ku bihugu bimwe na bimwe.

Kijuli avuga ko iki cyemezo nacyo ari igisubizo ku Banya-Canada bifuzaga gusura u Rwanda ariko bikababera imvune kubanza guhamagara cyangwa kuvugana na Ambasade.
Ati “Twabyishimiye cyane, twabifashe rero nk’icyemezo cy’ubuyobozi buzi kureba kure, dore ko ibyitwa imipaka ari abantu babishyizeho. Twemera ko iyi si dutuye twakagombye kuyigendamo nta nzitizi. Ni igikorwa cy’imbonekarimwe kizazamura ubukerarugendo igihugu cyacu kikabona amadevize.”

Ikindi kandi hakuweho amafaranga yishyurwaga viza ku banyarwanda bagendera kuri pasiporo z’amahanga ariko bafite indangamuntu z’u Rwanda ku bihugu byemera ubwenegihugu bubiri. Abanyamahanga baba mu Rwanda, igihe bagiye hanze, nibashaka kugaruka mu gihugu, bazajya bakoresha icyangombwa kibemerera gutura mu gihugu.

REBA KU MUNOTA WA 21 UKO KIJULI YASOBANURAGA IKIBAZO CYE MU MUSHYIKIRAHO UHERUTSE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza