Kwamamaza

Canada: Abacuruzi batatu b’ibiyobyabwenge bakurikiranyweho kwica Umunyarwanda

Yanditswe kuya 22-09-2016 saa 10:43' na Rabbi Malo Umucunguzi


Abagabo babiri bo muri Canada baragezwa imbere y’urukiko kuri uyu wa Kane bashinjwa urupfu rw’Umunyarwanda witwa Gilbert Nshimiyumukiza, mu gihe uwa gatatu we agishakishwa n’ubu ataratabwa muri yombi na polisi y’icyo gihugu.

Nshimiyumukiza yageze muri Canada mu Mujyi wa Montreal mu 2009 ubwo yari afite imyaka 22, yizeye gutangira ubuzima bushya nyuma y’amateka ya Jenoside yari yaramugizeho ingaruka.

Ubwo yari afite imyaka itandatu gusa, nibwo yabonye ababyeyi be bicwa barashwe muri jenoside yakorewe abatutsi mu 1994, nyuma yiyemeza kujya muri Canada ndetse nyuma y’umwaka umwe bamwemerera ubuhunzi.

Ikinyamakuru Montreal Gazette kivuga ko mbere yo kujya muri Canada, Nshimyumukiza ngo yatanze ubuhamya bwatumye abantu bagera kuri 20 bafungwa bazira kuba barishe se na bagenzi be.

Muri Canada ngo yaje gufashwa n’inshuti hamwe n’urusengero rumwe mu Mujyi wa Mount Royal, yiyemeza gukora akazi ko gufasha abaganga mu bitaro, afite intego y’uko abavandimwe be bazamusangayo.

Nyuma ngo bitewe n’ubuzima bwamushaririye kuva mu buto bwe, yaje kwinjira mu bikorwa bibi byatumye kuwa Mbere Gicurasi, apfira mu bitaro byitiriwe Umutima Utagira inenge byo mu mujyi wa Montréal, Hôpital du Sacré-Cœur de Montréal, nyuma y’umunsi umwe arashwe mu mutwe ari mu nzu yabagamo.

Muri Nyakanga, uwitwa Nikita Hunt w’imyaka 27 na Jermaine Gero uba mu Mujyi wa Laval batawe muri yombi bashinjwa kwica Nshimyumukiza wari ugize imyaka 30, ariko uwitwa Shamora Robertson w’imyaka 29 we ntiyafatwa n’ubu aracyashakishwa.

Inshuti ze zaguye mu kantu zibaza uko Nshimiyumukiza yapfuye, kuko batumvaga uko yava ku muntu uri gukorera ahazaza he akaba umuntu wicwa n’abantu batatu b’abacuruzi bazwi b’ibiyobyabwenge.

Hunt yari mu mirimo nsimburagifungo nyuma yo gufatanwa cocaine ayicuruza, mu gihe Gero we yamaze imyaka umunani kuva mu 1996, nyuma yo guhamwa no kugirira nabi ndetse no kwiba umushoferi wa tagisi mu Mujyi wa Lachine.

Umwe mu batanze amakuru ariko ntashake ko amazina ye atangazwa, yavuze ko Nshimiyumukiza yahoze ari umuntu ukeneye akazi ariko nyuma aza kubabwira ko “yabonye uburyo bwo kubona amafaranga.’’

Ati “Kuva muri ibyo biganiro, namenye ko Nshimyumukiza ari mu bibazo… Nyuma yaje kuburirwa irengero. Nta nimero ya telefoni yari agifite. Guhamagarana nawe byahise bihagarara. Nta bwo tuzi uko byaba byaragenze nyuma. Yari umuhungu witonda.”

Mu 2010 ubwo yari amaze umwaka muri Canada, yabwiye Montreal Gazette ko agifite ibibazo muri we kuva mu bwana bwe.

Nyuma y’igihe yajyanwe mu ivuriro ngo abaganga bamwiteho, aza gusezererwa ariko ntiyagira gikurikirana ku buryo atari yiteguye guhangana n’ibibazo yanyuzemo, aza gutangira kwivura yifashishije ibiyobyabwenge.

Umwe mu nshuti ze avuga ko mu mwaka ushize yari amaze guhindura imyitwarire, ku buryo atari acyitaye no ku bavandimwe be.

Mu mpeshyi ya 2014 ngo Nshimyumukiza yaje gutabwa muri yombi ashinjwa ubujura n’ubugizi bwa nabi bworoheje, ndetse icyaha kiramuhama afungwa iminsi itanu.

Mu minsi yakurikiye, ngo yemeye ko ari mu bantu babi yifuza kuvamo ndetse aza no kubwira inshuti ze za hafi ko nazo ziri mu byago.

Gilbert Nshimiyumukiza na mugenzi we Mukiza Jean-Baptiste, i Montreal mu 2010

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved