Kwamamaza

Bwa mbere, Abanyarwanda batuye mu Burusiya bazitabira Rwanda Day

Yanditswe kuya 17-09-2015 saa 22:20' na Karirima Ngarambe


Nyuma y’imyaka ibiri Ambasade y’u Rwanda ifunguwe mu Burusiya, Abanyarwanda batuye muri iki gihugu bazitabira ku nshuro ya mbere Rwanda Day, igikorwa gihuza Abanyarwanda bakaganira ku ruhare rwabo mu iterambere ry’igihugu.

Mu kiganiro IGIHE yagiranye n’abahagarariye u Rwanda mu bihugu bitandukanye byo ku mugabane w’ u Burayi harimo u Burusiya, Turukiya, u Bwongereza, n’u Busuwisi batangaje ko Abanyarwanda muri ibyo bihugu biteguye guhura na Perezida Kagame bakamugaragariza uruhare rwabo mu guteza imbere u Rwanda.

Mu Burusiya, Abanyarwanda 20 bahatuye bacyereye kwitabira Rwanda Day byemezwa na Ambasaderi Dr Mujawamariya Jeanne d’Arc uhagarariyeyo u Rwanda.

Yagize ati "Abanyarwanda 20 batuye mu Burusiya bazitabira bwa mbere igikorwa cya Rwanda Day, nyuma y’inama twagiranye nabo, bafite inyota, urugwiro rwinshi rwo kuganira na Perezida Paul Kagame ku mugabane w’u Burayi."

Amb. Mujawamaliya ashimangira ko Abanyarwanda batuye mu Burusiya bihesha agaciro, aho usanga u Rwanda rwarabaye urugero muri iki gihugu ku bandi.

Yagize ati "Batumirwa mu bikorwa byinshi bitandukanye ngo batange ubuhamya bw’aho u Rwanda ruvuye naho rugeze, aho usanga abaturage bo mu Burusiya batangazwa n’uko u Rwanda ruzamuka mu guteza imbere ishoramari bati turifuza kugera ku bipimo bya doing business, tuzamuka dufatiye urugero n’urugero ku Rwanda nk’igihugu kizamuka ku buryo bushimishije."

Mubyo Abarusiya baheraho bashima iterambere ry’u Rwanda, harimo isuku, guca ikoreshwa ry’amashashi ahantu hose n’ibindi.

Aba banyarwanda baba mu Burusiya biyemeje kuziyishyurira itike y’indege bajya gutanga ibitekerezo byubaka ngo u Rwanda rugere ku cyerekezo rwihaye.

Ambasaderi Lt Gen. Caesar Kayizari, uhagarariye u Rwanda muri Turukiya yagize ati "Abanyarwanda benshi baba muri Turukiya 98% ni abanyeshuri usanga bahesha ishema u Rwanda mu bikorwa byabo bya buri munsi, ariko nubwo bamwe bari mu biruhuko mu Rwanda, abahari bagera kuri 13, bishyize hamwe mu nama bagirana na Ambasade yo gutegura iki gikorwa cya Rwanda Day, aho bashishikariye rwose kuzajya kuganira na Perezida Paul Kagame."

Umuhate n’urukundo rwo gutanga umusanzu wabo mu iterambere ry’u Rwanda, watumye aba banyeshuri biyemeza kwiyishyurira amatike y’indege, bakerekeza mu Buholandi aho bazahurira na Perezida Kagame bakaganira.

Ambasaderi Lt Gen. Caesar Kayizari, uhagarariye u Rwanda muri Turukiya

Amb. Kayizari yagize ati "Twe icyo tubafasha ubu ni ukubashakira Visa muri Ambasade y’u Buholandi hano muri Turikiya, no kubaha amakuru yose bifuza arebana n’imyiteguro ijyanye na Rwanda Day mu Buholandi."

Mu Bwongereza, Ambasaderi William Nkurunziza, mu kiganiro na IGIHE yatangaje ko mu Bwongereza bari mu myiteguro ikomeye yo kujya mu Buholandi ati "Harateganywa kuza abantu bagera kuri 300."

Ambasaderi William Nkurunziza uhagarariye u Rwanda mu Bwongereza

Ambasaderi François Xavier Ngarambe uhagarariye u Rwanda mu Busuwisi, we yagize ati “Abanyarwanda bo mu Busuwisi babukereye kwitabira Rwanda Day mu Buholandi. Banyotewe cyane no guhura n’abandi banyarwanda, kuganira kuri gahunda zo kubaka no guteza imbere igihugu, ariko cyane cyane bashishikajwe no kuganira na Perezida wa Repubulika bakamushimira uburyo ayoboye u Rwanda n’ibyo yagejeje ku Banyarwanda; ndetse bifuza ko Itegeko Nshinga rihinduka maze agakomeza kutuyobora nkuko benshi mu banyarwanda bakomeje kubimusaba.”

Abanyarwanda bazaturuka mu Busuwisi barakabakaba 200, nkuko Ambasaderi Ngarambe yabitangaje.

Ambasaderi François Xavier Ngarambe uhagarariye u Rwanda mu Busuwisi

Kuva mu mwaka wa 2011, Rwanda Day imaze kubera i Chicago, Boston na Atlanta muri USA, i Paris mu Bufaransa, i Toronto muri Canada, n’i Londres mu Bwongereza.

Inkuru bifitanye isano kanda hano

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 September 2016
Copyright © 2009 -2014 - IGIHE Ltd - All Rights Reserved