Brazzaville : Abanyarwanda biyemeje kwegera bagenzi babo basaga ibihumbi umunani bambuwe ubuhunzi

Yanditswe na IGIHE
Kuya 9 Gashyantare 2018 saa 04:40
Yasuwe :
0 0

Abanyarwanda baba muri Congo Brazzaville bizihije umunsi w’Intwari z’u Rwanda, umunsi ngarukamwaka wizihizwa tariki ya 01 Gashyantare mu Rwanda biyemeza kwegera bagenzi babo batakaje ubwenegihugu.

Ni umuhango wari uyobowe na Ambasaderi w’u Rwanda muri Congo Brazaville, Dr. Jean Baptiste Habyalimana hamwe na Perezida wa Diaspora Dr. Richard Mihigo ku wa 02 Gashyantare 2018.

Ambasaderi Habyalimana yashimiye Abanyarwanda bitabiriye uyu munsi w’Intwari abibutsa ko ubutwari ari indangagaciro nyarwanda, butozwa kandi buharanirwa binyuze mu muryango buri wese abarizwamo, akaba ari yo mpamvu u Rwanda rukora ibishoboka byose ngo n’Abanyarwanda baba mu mahanga bakomeze gutozwa uwo muco mwiza.

Nyuma yo kwibukiranya ibyiciro by’Intwari ndetse n’ibikorwa byagiye biziranga, Abanyarwanda bo muri Diaspora bafatanyije n’ubuyobozi bwa Ambassade, bihaye ingamba zo gukomeza kubaka indangagaciro z’ubutwari nk’Abanyarwanda mu buzima bwabo bwa buri munsi ndetse no kwegera Abanyarwanda bagera 8 640 batakaje ubuhungiro kuva tariki ya 31 Ukuboza 2017, bakabakangurira kwiyubakamo ubunyarwanda no gukunda igihugu cyabo.

Muri urwo rwego Ambassaderi Habyalimana yaboneyeho gusaba Abanyarwanda babaye impunzi muri Congo Brazzaville kugana Ambassade kugira ngo ibafashe kubona ibyangombwa by’u Rwanda bibafasha gukomeza kuba muri Congo bakora imirimo itandukanye.

Yabibukije ko badashobora gukomeza kuba muri Congo nta byangombwa bafite, kuva ku itariki ya 31 ukuboza 2017, ubwo HCR yahagarikaga gufasha abari impunzi bagera Kuri 8640.

Mu rwego rwo gukomeza kwizihiza umunsi w’Intwari, Abakozi ba Ambassade, Diaspora Nyarwanda ndetse n’urubyiruko rw’abenegihugu bakoze umuganda ku wa Gatandatu tariki ya 3 Gashyantare 2018 imbere mu kigo cy’ubuyobozi bw’amashuri abanza n’amashuri y’imyuga.

Barangije umuganda, Ambasaderi yashimiye ubuyobozi bwa Bacongo n’urubyiruko rugize ishyirahamwe “La chaine de la Charité”, abasaba gukomeza ubutwari bafite bwo gukora ibikorwa by’isuku buri wa gatandatu wa mbere w’ukwezi bita “Samedi Citoyen”.

Abanyarwanda bari bitabiriye ibiganiro no gusabana ku munsi w’Intwari
Ishyirahamwe “La chaine de la charité” bari mu muganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza