Ambasaderi Nduhungirehe yasabye Abanyarwanda baba mu Buholandi kurangwa n’ubutwari

Yanditswe na Karirima A. Ngarambe
Kuya 1 Gashyantare 2021 saa 06:01
Yasuwe :
0 0

Ambasaderi w’u Rwanda mu Buholandi, Nduhungirehe Olivier, yasabye Abanyarwanda baba muri iki gihugu kurangwa n’ubutwari mu byo bakora no gukomeza kwimakaza ibikorwa byubaka igihugu n’abagituye.

Tariki ya 1 Gashyantare 2021 ni bwo u Rwanda rwizihizaho Umunsi w’Intwari mu kuzirikana ibikorwa byaziranze bikanatuma igihugu n’abagituye babaho mu mahoro n’ubwisanzure.

Uyu munsi ngarukamwaka ugiye kuba ku nshuro ya 27, ufite insanganyamatsiko igira iti “Ubutwari mu Banyarwanda, Agaciro kacu”.

Mu kiganiro cya mbere yagiranye n’Abanyarwanda batuye n’abiga mu Buholandi, ku wa 30 Mutarama 2021, Ambasaderi Olivier Nduhungirehe, yabasabye gukomeza kurangwa n’ubutwari mu byo bakora.

Iki kiganiro cyakozwe hifashishijwe ikoranabuhanga mu kwirinda icyorezo cya COVID-19 cyugarije Isi; cyayobowe n’Umunyamabanga wa Mbere muri Ambasade y’u Rwanda mu Buholandi, Hubert Ndahiro mu gihe abacyitabiriye barimo Umunyamabanga muri Ambasade, Jean Hugues Mukama.

Ambasaderi Nduhungirehe yashimiye abitabiriye ubutumire bugamije kuganirira hamwe ku cyabateza imbere nubwo batashoboye guhura imbonankubone kubera COVID-19.

Ati “Mboneyeho n’umwanya wo kubifuriza Umwaka mushya Muhire wa 2021, muzawugiremo amahirwe menshi n’ubuzima buzira umuze. Twizeye ko uyu mwaka uzarangira tumaze gutsinda iki cyorezo no kugaruka mu buzima busanzwe.’’

"Muri iyi minsi ariko byaragaragaye ko COVID-19 yafashe indi ntera, imibare y’abanduye n’abapfuye ikaba izamuka buri munsi, haba hano mu Buholandi, mu Rwanda n’ahandi ku Isi. Niyo mpamvu nagira ngo mbasabe gukomeza kubahiriza amabwiriza yashyizweho na Guverinoma y’u Buholandi agamije kwirinda Coronavirus mu gihe tugitegereje ko urukingo ruzadufasha gutsinda iki cyorezo.’’

Ambasaderi Nduhungirehe ku wa 13 Ukuboza 2020, ni bwo yabonanye n’abahagarariye Abanyarwanda bagize Komite ya RCA-NL bumvikana ko hazategurwa inama ku buryo bw’ikoranabuhanga.

Yashimiye Amb. Jean Pierre Karabaranga yasimbuye mu Buholandi aho yari amaze imyaka irindwi ari Ambasaderi w’u Rwanda muri icyo gihugu.

Ati “Ndashimira komite yanyu twaganiriye ukwezi gushize, ikaba yaragaragaje ibikorwa bigaragara mu myaka ibiri ishize. Ndabashimira ubwitange mudahwema kugaragaza, mwubaka umuryango Nyarwanda mu Buholandi, mufatanya n’abandi Banyarwanda kubaka igihugu, kandi munarwanya abagamije guha igihugu cyacu isura mbi ndetse n’abakwirakwiza ingengabitekerezo ya Jenoside.’’

Ambasaderi Nduhungireho yavuze ko umwaka wa 2021 ari uwa mbere nyuma y’icyerekezo 2020.

Yakomeje ati “Twimirije imbere Icyerekezo gishya cya 2050. Kugira ngo tukigereho, tugomba gukomeza gushyira mu bikorwa Gahunda ya Guverinoma y’imyaka irindwi irimo ingingo nyinshi Abanyarwanda batuye mu mahanga bagomba kugiramo uruhare.’’

Iyi nama yabaye mu gihe u Rwanda rwiteguraga kwizihiza Umunsi Mukuru w’Intwari.

Ambasaderi Nduhungirehe yavuze ko hari ingingo esheshatu yifuza ko zaranga Abanyarwanda batuye mu Buholandi.

Ati “Kugira ubukangurambaga burebana n’ibikorwa byubaka u Rwanda n’Abanyarwanda, kongera ubumenyi n’ubushobozi, no gukunda igihugu bituganisha ku butwari. Ubutwari ni imwe mu ndangagaciro dusanga mu muco. Abanyarwanda bafite umuco w’ubutwari bakomora ku bakurambere babo tugomba gusigasira kuko ari wo utugize.’’

Mu Rwanda rwa mbere y’ubukoloni, ubutwari bwari indangagaciro yashingirwagaho cyane mu mibereho y’Abanyarwanda. Ubutwari bwatorezwaga mu muryango no mu Itorero, bukagaragarira cyane mu bijyanye n’urugamba rwo kurinda igihugu cyangwa kucyagura.

Ku mwaduko w’abakoloni, ibyarangaga imiyoborere, imyumvire n’imyemerere y’abakurambere byarasenyutse ndetse n’abayobozi ba Repubulika ya Mbere n’iya Kabiri bakomeza imyumvire n’imyitwarire yigishijwe n’abakoloni ku byerekeye gusuzugura no kudaha agaciro umurage w’abakurambere.

Nyuma ya Jenoside yakorewe Abatutsi mu 1994, ubutwari bwongeye guhabwa agaciro ndetse kuri ubu u Rwanda rwizihiza Intwari z’Imanzi nk’umusirikare utazwi ndetse na Maj Gen Fred Gisa Rwigema; Intwari z’Imena nk’Umwami Mutara Rudahigwa, Rwagasana Michel, Uwilingiyimana Agatha, Félicité Niyitegeka n’abanyeshuri b’i Nyange ndetse n’Intwari z’Ingenzi, icyiciro kitarabona abakijyamo.

Ambasaderi Nduhungirehe yasabye abakuru n’abato kurangwa n’ubutwari mu gihe u Rwanda rwizihiza Umunsi Mukuru w’Intwari.

Yakomeje ati “Ubutwari bugomba kuturanga ni ugukomeza kwigira ku bakurambere b’intwari n’abandi bantu bakoze cyangwa bakora ibikorwa by’ingirakamaro; gusigasira ibyagezweho no kubyongera mu bwinshi no mu bwiza, kwitoza iteka gukora icyiza no kwanga ikibi, harimo kurwanya Jenoside n’ingengabitekerezo yayo, kugira ubumenyi n’ubushobozi bukenewe mu gihe turimo n’ikiri imbere, gukunda umuco wacu, kurangwa n’indangagaciro z’umuco nyarwanda, gukunda uririmi rwacu no kwitwararika kirazira dusanga mu muco.’’

Umuyobozi w’Ihuriro ry’Abanyarwanda mu Buholandi (RCA-NL), Ndabarasa Claude, yahaye ikaze Ambasaderi Nduhungirehe wari uganiriye bwa mbere n’Abanyarwanda baba muri iki gihugu kuva ahawe inshingano zo guhagararirayo u Rwanda.

Ati “Ni umwanya mwiza wo guha ikaze Ambasaderi Nduhungirehe, murisanga, tubijeje kandi kuzafatanya muri byose mu rwego rwo gukorana mu kwerekana isura nziza y’u Rwanda rw’uyu munsi no kuba abambasaderi beza nkuko bigomba.’’

Yerekanye ibikorwa byagezweho mu myaka yashize byakozwe n’Abanyarwanda bo mu Buholandi, anavuga ku byo bifuza kuzageraho.

Yashimiye Abanyarwanda babashije kwitabira ikiganiro cyateguwe na Ambasade y’u Rwanda mu Buholandi kugira ngo barusheho kumenyana no kuganira ku Munsi w’Intwari.

Umuyobozi w’Abanyarwanda batuye mu Mahanga muri Minisiteri y’Ububanyi n’Amahanga n’Ubutwererane, Sandrine Uwimbabazi Maziyateke, wari umutumirwa yashimye ibikorwa byagezweho n’abagize RCA-NL, birebana no gusubiza amaso bakibuka aho bakomoka bafatanya n’abavandimwe babo bari mu gihugu haba mu bihe byiza n’ibigoye.

Yagize ati “Natwe muri Minisiteri tuzabahora hafi mu bufatanye muri byose.’’

Ambasaderi Nduhungirehe yijeje Abanyarwanda ko we na Ambasade y’u Rwanda bazafatanya ku ngingo zose ziganisha ku iterambere.

Ati “Muzatwiyambaze igihe cyose mubyifuza, kugira ngo dukomeze twese kwiteza imbere nk’Abanyarwanda, ari nako dukomeza guteza imbere igihugu cyacu. Inzira niziba nyabagendwa, nzafata umwanya wo kubasura mu ntara no mu mijyi mutuyemo ngo dukomeze kungurana ibitekerezo.’’

-  Ijambo rya Ambasaderi Nduhungirehe

Ambasaderi w'u Rwanda mu Buholandi, Nduhungirehe Olivier, yasabye Abanyarwanda baba mu Buholandi kurangwa n’ubutwari
Umuyobozi w’Abanyarwanda batuye mu Mahanga muri Minisiteri y’Ububanyi n’Amahanga n’Ubutwererane, Sandrine Uwimbabazi Maziyateke, yashimye ibikorwa byagezweho n’abagize RCA-NL
Umunyamabanga wa Mbere muri Ambasade y'u Rwanda mu Buholandi, Ndahiro Hubert, ni we wayoboye ibiganiro
Umunyamabanga muri Ambasade, Jean Hugues Mukama
Umuyobozi w’Ihuriro ry’Abanyarwanda mu Buholandi (RCA-NL), Ndabarasa Claude, yahaye ikaze Ambasaderi Nduhungirehe Olivier
Ibi biganiro byabaye hifashishijwe ikoranabuhanga
Abanyarwanda basabwe kurangwa n'ubutwari

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .