Ambasaderi Karega yasabye Abanyarwanda muri RDC kurushaho gukomera ku muco w’ubumwe no gukunda igihugu

Yanditswe na Uwimana Abraham
Kuya 3 Gashyantare 2021 saa 10:17
Yasuwe :
0 0

Ambasaderi w’u Rwanda muri Repubulika Iharanira Demokarasi ya Congo, Vincent Karega, yasabye Abanyarwanda baba muri icyo gihugu kurushaho gukomera ku muco w’ubumwe no gukunda igihugu, mu rwego rwo kurushaho guha agaciro impamvu intwari z’u Rwanda zatanze ubuzima bwazo.

Ibi ni bimwe mu bikubiye mu butumwa Ambasaderi Karega yageneye Abanyarwanda baba muri Repubulika Iharanira Demokarasi ya Congo, mu kwizihiza umunsi w’Intwari wizihizwa ku wa 1 Gashyantare.

Ambasaderi Karega yavuze ko Umunsi w’Intwari ari umunsi ukomeye ku gihugu wo gusubiza amaso inyuma no kongera kwisuzuma, hazirikanwa intwari zibukwa zatanze ubuzima bwazo, avuga ko hakenewe kongerwa imbaraga mu byatuma igihugu kirushaho kuba ubukombe nk’uko intwari zabiharaniye.

Ati “Uyu ni umwanya ukomeye wo guhesha agaciro impamvu intwari zatanze ubuzima bwazo. Ubumwe no gukunda igihugu nibyo bikenewe kugira ngo twubake igihugu gikomeye kandi gikungahaye kuri bose.”

Yongeyeho ati “Imbaraga zishyize hamwe z’abayobozi n’abayoborwa, abakozi batandukanye, abashoramari, sosiyete sivile n’abandi, ni ingenzi cyane. Aho turi hose dukwiye gushyigikira umuco wacu, ubumwe bwacu, ndetse n’igihugu cyacu kikaba kibereye ba mukerarugendo n’ishoramari ritandukanye.”

Amb Karega kandi yakomeje asaba Abanyarwanda baba muri RDC gukomera ku bumwe no gushishikarira gukorera igihugu, ati “Turi kumwe, dukomere ku bumwe bw’Abanyarwanda, dukorere igihugu cyacu aho turi hose mu bufatanye, kizabe ubukombe.”

Ku wa 1 Gashyantare 2021 hizihizwaga Umunsi w’Intwari ku nshuro ya 27, ukaba wari ufite insanganyamatsiko igira iti “Ubutwari mu Banyarwanda, agaciro kacu.” Ukaba ari umunsi wizihijwe abantu bari mu ngo zabo mu rwego rwo kubahiriza amabwiriza yo kwirinda COVID-19, ariko abayobozi batandukanye bagiye bafata umwanya bagenera ubutumwa abaturage, mu rwego rwo gufatanya guhimbaza uwo munsi.

Intwari z’u Rwanda kugeza ubu ziri mu byiciro bitatu, ari byo Imanzi igizwe n’Umusirikare utazwi ndetse na General Major Fred Gisa Rwigema, Imena zirimo Umwami Mutara Rudahigwa, Rwagasana Michel, Agathe Uwiringiyimana, Niyitegeka Félicité n’Abanyeshuri b’Inyange, naho icyiciro cya gatatu cy’Ingenzi nta ntwari n’imwe irashyirwamo.

Ambasaderi w'u Rwanda muri RDC, Vincent Karega, yasabye Abanyarwanda baba muri icyo gihugu gukomera ku bumwe no gukunda igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .