Ambasaderi Habyalimana yatanze impapuro zimwemerera guhagararira u Rwanda muri Tchad

Yanditswe na IGIHE
Kuya 20 Mata 2018 saa 01:37
Yasuwe :
0 0

Ambasaderi Habyalimana Jean Baptiste yashyikirije Perezida wa Tchad, Idriss Déby Itno impapuro zimwemerera guhagararira u Rwanda muri iki gihugu, mu muhango wabereye mu Ngoro y’Umukuru w’Igihugu i N’Djamena, ku wa 19 Mata 2018.

Ambasaderi Habyalimana yashyikirije Perezida Idriss Déby ubutumwa yahawe na Perezida Paul Kagame. Yatangaje ko yishimiye guhagararira u Rwanda muri Tchad, yizeza ko azakomeza gushimangira umubano mwiza no kunoza ubufatanye hagati y’impande zombi.

Perezida Idriss Deby yashimiye Umukuru w’Igihugu Paul Kagame urangaje imbere iterambere ry’igihugu n’iry’umugabane wa Afurika muri rusange.

Yagize ati “ Nishimira umubano n’ubucuti u Rwanda na Tchad bifitanye, nishimira kandi uruhare rwa Nyakubahwa Paul Kagame mu guteza u Rwanda imbere ndetse n’umurava we mu guharanira icyateza imbere Afurika Yunze Ubumwe n’Umuryango w’Ubukungu bw’Ibihugu byo muri Afurika yo hagati (CEEAC).

U Rwanda rwigeze kuva muri CEEAC ruza gusubiramo ku wa 17 Kanama 2016. CEEAC yashinzwe mu Ukwakira 1983, igizwe n’ibihugu 11 ari byo u Rwanda, Angola, u Burundi, Cameroun, Centrafrique, Repubulika Iharanira Demokarasi ya Congo, Gabon, Guinée Équatoriale, Congo Brazzaville, Sao Tomé Principe na Tchad.

Abayobozi bombi bemeranyije ko ku bufatanye na Minisiteri y’Ububanyi n’Amahanga ya Tchad, umubano uzarushaho kungura abaturage mu bijyanye n’ubuhahirane, ubukerarugendo n’ibindi bikorwa by’iterambere.

Ambasaderi Habyalimana wemerewe guhagararira u Rwanda muri Tchad asanzwe areberera inyungu zarwo mu bihugu birimo Repubulika ya Congo, Centrafrique, Gabon na Guinée Equatorial.

Ambasaderi Habyalimana Jean Baptiste (ibumoso) na Perezida Idriss Déby Itno uyobora Tchad kuva mu 1990
Ambasaderi Habyalimana Jean Baptiste ashyikiriza Perezida wa Tchad, Idriss Déby Itno impapuro zimwemerera guhagararira u Rwanda
Ambasaderi Habyalimana Jean Baptiste na Perezida wa Tchad, Idriss Déby Itno nyuma yo gutanga impapuro zimwemerera guhagararira u Rwanda muri iki gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza