00:00:00 IGIHE NETWORK KN KINYARWANDA EN ENGLISH FR FRANCAIS

Amb. Sebashongore yerekanye akamaro k’ubuhamya bw’abarokotse Jenoside mu guhashya abayipfobya n’abayihakana

Yanditswe na Karirima A. Ngarambe
Kuya 18 Mata 2021 saa 10:07
Yasuwe :
0 0

Ambasaderi w’u Rwanda mu Bubiligi, Dr Sebashongore Dieudonné yatangaje ko ubuhamya bw’abarokotse ari ibimenyetso simusiga n’intwaro ikomeye yo guhashya abapfobya n’abahakana Jenoside yakorewe Abatutsi aho bari hose.

Guhera Tariki ya 7 Mata 2021 Ambasade y’u Rwanda mu Bubiligi ifatanyije na Ibuka-Belgique batangije igikorwa cyo kwibuka ku nshuro ya 27 jenoside yakorewe Abatutsi mu Rwanda mu 1994. Nk’uko bisanzwe bigenda mu Bubiligi iyi gahunda itangira tariki ya 7 Mata igakomeza mu turere dutandukanye two mu Bubiligi nka Bruxelles, Liège, Charleroi, Brabant Wallon, Flandres, Mons n’ahandi kugera mu mpera za Gicurasi.

Aha hose Ambasade na Ibuka baratumirwa bakifatanya n’abategura igikorwa cyo kwibuka. Muri ibi bihe by’icyorezo cya Covid-19 birakorwa mu buryo bwo kuyirinda hakoreshejwe umuyoboro w’ikoranabuhanga, n’abantu bake bakajya gushyira indabo ahari ibimenyetso cyangwa urwibutso rwa jenoside yakorewe Abatutsi mu Bubiligi.

Tariki ya 7 Mata 2021, habayeho umuhango Ambasade yari ifatanyije na Ibuka-Mémoire & Justice Belgique hashyirwa indabo ku rwibutso rwa jenoside yakorewe Abatutsi ruherereye mu mujyi wa Bruxelles muri Komine ya Woluwe Saint Pierre, nimugoroba hakaba harabaye umugoroba wo kwibuka wateguwe na Ibuka-Mémoire & Justice Belgique iyobowe na Felicite Lyamukuru.

Hari n’ikiganiro cyateguwe tariki ya 29 Werurwe mu rwego rwo kwibuka ku nshuro ya 27 Jenoside yakorewe Abatutsi cyiswe “La lutte contre le négationnisme et l’urgence déduquer » cyateguwe na Ibuka-Mémoire & Justice Belgique.

Ambasaderi uhagarariye u Rwanda mu Bubiligi, Luxembourg n’Umuryango w’ubumwe bw’Ibihugu bw’i Burayi (EU) no muri ACP, (Groupe des Etats d’Afrique, des Caraïbe et du Pacifique), Sebashongore Dieudonne mu ijambo yavugiye i Louvain la Neuve mu ntara ya Brabant Wallon, ahari Kaminuza Gatolika ya Louvain la Neuve, yagarutse ku bukana Jenoside yakoranywe.

Yagize ati “Turibuka ko nyuma y’icyumweru kimwe gusa jenoside yakorerwaga Abatutsi yari imaze kugera mu mpande zose z’Igihugu. Urugero mu Kiliziya ya Nyamata no mu nkengero zaho hari hamaze kwicwa Abatutsi barenga ibihumbi 45 mu gihe buri munsi bari bakomeje kwicwa Isi yose yaduteye umugongo.”

Sebashongore yakomeje avuga ko abanyapolitiki batavugaga rumwe n’abicanyi bishwe hanajyaho Guverinoma yari yiyemeje gukomeza ubwicanyi bwo kumara Abatutsi, bikaba ari ibintu byari byarizwe barateguwe neza n’intiti zari zaramunzwe n’ubugome burimo ingengabitekerezo y’urwango.

Ati “Abo twita ko bari abanyabwenge mu bihe byashize bari muri abo bagize uruhare rukomeye mu gutegura no kuyishyira mu bikorwa biga n’uburyo bazayipfobya bakanayikana rwose. Benshi muri bo rero bize hano mu Bubiligi yemwe na hano muri iyi kaminuza twita Université Catholique de Louvain.”

Amb. Sebashongore akomeza agira ati “Hashize imyaka 27 umunsi ku wundi Abarimu n’Abanyeshuri benshi bishwe muri Kaminuza nk’iyi i Butare mu Rwanda bishwe kubera ko bavutse ari Abatutsi, mu gihe ku Batutsi benshi ubuhungiro n’amizero yo kubaho byari bisigaye muri Butare gusa, bumva ariho bakwihisha, bahungira cyangwa bakahaca bahunga bagana i Burundi ariko abateguye ubwicanyi bibukije abatuye ako karere ko bagomba ‘Gukora’ kwica nk’uko ahandi byakozwe.”

Yagarutse ku bantu bishwe ku ikubitiro muri Butare barimo Perefe Jean Baptiste Habyarimana, Umwamikazi Gicanda Rosalie, abakozi batandukanye bari bahatuye bishwe n’abasirikare n’Interahamwe ziturutse hirya no hino mu gihugu

Ambasaderi Sebashongore ati “Ibi byose byabaye kubera ijambo rya Perezida Théodore Sindikubwabo, ibi bikaba byarabaye intsinzi kuri Guverinoma y’Abicanyi kuko byari muri gahunda biyemeje yo kwica Abatutsi hose mu gihugu, bikanerekana ubwenge bakoresheje n’uko babiteguye ngo habeho akavuyo mu gihugu.”

Amb. Sebashongore yavuze ko umujyi wa Louvain-La-Neuve wabaye ubuhungiro ku bakoze jenoside, nubwo bamwe bagiye bafatwa bakagezwa mu butabera, asaba n’ibindi bihugu gukomeza uwo murongo.

Yavuze ko ari nako bizakomeza kugenda ku bandi bihishe ariko baragize uruhare muri Jenoside, atanga urugero rwa Béatrice Munyenyezi uherutse kugezwa mu Rwanda avuye muri Leta Zunze Ubumwe za Amerika.

Ati “Ni ibintu tugomba gukomeza gukoranaho n’ibihugu bibafite bakoherezwa ari benshi.”

Ambasaderi Sebashongore yavuze no ku bahakana n’abapfobya Jenoside yakorewe Abatutsi, ashimangira ko intwaro ikomeye yo kubarwanya ari ugukomeza kuvuga no kwandika ukuri kw’amateka abarokotse babayemo.

Ati “Ubuhamya bwanyu abacitse ku icumu rya Jenoside yakorewe Abatutsi burakomeye cyane, ni ndakorwaho, ntibugibwaho impaka. Ubuhamya butuma abatarabaye muri Jenoside bamenya neza ibyabayeho mu buryo bwimbitse tukamenya imiryango yanyu mwakundaga, natwe tukabaha umwanya w’icyubahiro no kubavuga mu mazina. Mukomeze mube intwari ntimuzahweme kuvuga ukuri ku mateka mabi ya jenoside yakorewe Abatutsi.”

Yijeje abarokotse Jenoside ko Leta y’u Rwanda izakomeza kubaba hafi, asaba n’abandi gukomeza kuba hafi y’abarokotse Jenoside muri ibi bihe bikomeye byo kwibuka.

Ambasaderi Dieudonné Sebashongore yavuze ko kuvuga no kwandika amateka y’abarokotse Jenoside yakorewe Abatutsi ari uburyo bwiza bwo guhashya abayihakana
Amb. Sebashongore ubwo yashyiraga Louvain la Neuve indabo mu gikorwa cyo kwibuka ku nshuro ya 27 jenoside yakorewe Abatutsi, mu ntara ya Brabant Wallon, ahari Kaminuza Gatolika ya Louvain la Neuve
Providence Rwayitare hagati ari kumwe n’abo bafatanyije gutegura igikorwa cyo kwibuka ku nshuro ya 27 jenoside yakorewe Abatutsi. Aha bashyiraga indabo i Louvain la Neuve mu ntara ya Brabant Wallon, ahari Kaminuza Gatolika ya Louvain la Neuve
Ambasaderi Dieudonné Sebashongore ubwo yashyiraga indabo ku rwibutso ruri mu mujyi wa Bruxelles tariki ya 7 Mata 2021
Lyamukuru Félicité uyobora Ibuka-Mémoire & Justice Belgique, ubwo yashyiraga indabo ku rwibutso ruri mu mujyi wa Bruxelles tariki ya 7 Mata
Uhereye ibumoso: Uyobora Komite y’abambasaderi bagize umuryango ACP,(Groupe des Etats d’Afrique, des Caraïbe et du Pacifique) mu Bubiligi, Grace Nyinawumuntu, Umujyanama wa mbere muri Ambasade y'u Rwanda mu Bubiligi
Uhereye ibumoso hari uyobora Komine ya Woluwe Sait Pierre iherereyemo urwibutso rwa jenoside yakorewe Abatutsi, hagati ni Amb. Sebashongore hagakurikiraho Umunyamabanga wa Leta André Flahaut, hagaheruka Intumwa ya Perezida EU, Charles Michel
Uwari uhagarariye Minisitiri w'ububanyi n'amahanga w'u Bubiligi, Stephane Deppagne
Benoit Cerexhe, uyobora Komine ya Woluwe Sait Pierre ubwo yashyiraga indabo ku rwibutso rwa jenoside yakorewe Abatutsi ruri muri Komine abereye umuyobozi
Kwibuka jenoside yakorewe Abatutsi ku nshuro ya 27, muri Louvain la Neuve mu ntara ya Brabant Wallon, ahari Kaminuza Gatolika ya Louvain la Neuve, urubyiruko rwahawe umwanya
Amb. Sebashongore na Lyamukuru uyobora Ibuka-Belgique bacana urumuri rw'icyizere ubwo hatangizwaga igikorwa cyo kwibuka tariki ya 7 Mata 2021
Amb. Sebashongore ubwo yavugaga ijambo hatangizwa igikorwa cyo kwibuka, tariki ya 7 Mata 2021 muri Rwanda House, mu cyumba cy’ibiganiro mbwirwaruhame cya Ambasade y'u Rwanda i Bruxelles
Félicité Lyamukuru uyobora Ibuka-Belgique ubwo yavugaga ijambo hatangizwa igikorwa cyo kwibuka, tariki ya 7 Mata 2021 muri Rwanda House, mu cyumba cy’ibiganiro mbwirwaruhame cya Ambasade y'u Rwanda i Bruxelles
Amb. Sebashongore ubwo yavugaga ijambo hatangizwa igikorwa cyo kwibuka, tariki ya 7 Mata 2021 muri Rwanda House, mu cyumba cy’ibiganiro mbwirwaruhame cya Ambasade y'u Rwanda i Bruxelles
Ubwo Amb. Sebashongore yari yatumiwe mu gushyira indabo mu kigo cya ba Paras Commandos mu mujyi wa Flawinne ahari urwibutso rw'Abasirikare 10 b'Ababiligi biciwe muri Kigali tariki ya 7 Mata mu 1994
Umunyamabanga Mukuru w'Umuryango muri ACP, (Groupe des Etats d’Afrique, des Caraïbe et du Pacifique) Georges Rebelo Chikoti yunamira inzirakarengane za Jenoside yakorewe Abatutsi mu 1994

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .