Kwamamaza

Amb. Nduhungirehe mu biganiro byo gusasa inzobe n’abanyarwanda baba i Charleroi

Yanditswe kuya 16-10-2016 saa 18:53' na Karirima A. Ngarambe


Ambasaderi w’u Rwanda mu Bubiligi, Olivier Nduhungirehe, yakomeje ingendo mu turere dutandukanye tw’u Bubiligi aganira n’Abanyarwanda bahatuye ku iterambere bamaze kugeraho n’imbogamizi bahura nazo.

Izi ngendo Ambasaderi Nduhungirehe yazitangiye tariki ya 1 Ukwakira 2016, i Mons, mu Ntara ya Hainaut, kuri uyu wa Gatandatu yazikomereje mu Mujyi wa Charleroi.

Ambasaderi Nduhungirehe yatangaje ko izi ngendo zigamije kuganira n’Abanyarwanda akumva ibyo bamaze kugeraho, impungenge n’imbogamizi baba bafite zibabuza kugera ku byo bifuza.

Yerekanye ko Abanyarwanda bo Muri Diaspora bifitemo ubukungu bwinshi bashobora gukoresha bakiteza imbere kandi banateza imbere igihugu cyabo.

Ibiganiro mu Mujyi wa Charleroi byibanze ku ngingo zitandukanye zirimo kwita ku bukungu mu gushora imari mu gihugu, gukora imishinga ibyara inyungu, gushyiraho amatsinda y’ishoramari, sosiyete y’ubucuruzi n’ibindi bikorwa bihuriweho n’abishyize hamwe bikabyazwa umusaruro rusange.

Hagarutswe kandi ku bibazo byagiye bigaragara mu Karere ka Charleroi mu bihe byo kwibuka jenoside yakorewe Abatutsi kuko hari impande ebyiri zabikoraga ugasanga Ambasade n’Ubuyobozi bw’Umujyi wa Charleroi babura aho bahera ngo babigiremo uruhare.

Aha Amb. Nduhungirehe yatangaje ko guhera ubu Ambasade y’u Rwanda n’ubuyobozi bw’Umujyi wa Charleroi biyemeje kurebera hamwe uburyo iki gikorwa gikomeye bagikora neza kurusha uko byari bisanzwe.

Ati “Nahuye n’abayobozi b’uyu mujyi tubiganiraho ku buryo ibyo twiyemeje tuzabishyira mu bikorwa.”

Abanyarwanda bari bitabiriye ibi biganiro bashimishijwe n’uburyo bunguranye ibitekerezo kuri iyi ngingo yari imaze imyaka itatu yaraburiwe igisubizo.

Mu byifuzo byashyikirijwe Ambasaderi Nduhungirehe n’ikipe ayoboye harimo ko serivise itangwa muri Ambasade yarushaho kunozwa kuko basanga bishobora kuba biterwa n’ubwinshi bw’abantu bagana Amabasade y’u Rwanda mu Bubiligi, hibazwa niba uko abantu biyongera basaba serivisi ariko n’abakozi babakira bahagije kugira ngo akazi kagende neza.

Amb. Nduhungirehe yatangaje ko yifuza ko mu Bubiligi hazaba mu minsi iri imbere ikiswe “Youth’s Rwanda Day” mu rwego rwo kwereka urubyiruko birambuye aho u Rwanda rugeze naho rwifuza kugana kuko aribo Rwanda rw’ejo.

Amb. Nduhungirehe kandi yasabye ko kugira ngo ibikorwa bigerweho neza habaho Imihigo. Ati “Mu Bubiligi habarizwa Abanyarwanda barenga ibihumbi 35, turi benshi twari dukwiye rwose kujyana n’ibikorwa by’intangarugero ku rusha izindi Diaspora ziri hano, mubimfashemo twubake izina rikomeye nk’Abanyarwanda.”

“Ku bijyanye n’umuco wacu twigishe kandi dukomere ku rurimi, tubwire abana amateka y’u Rwanda. Mwime amatwi ababa bashaka kubacengezamo amatwara y’urwango ndetse no kubangisha ubuyobozi.”

Nyuma yo gusura Umujyi wa Mons, Charleroi; Ambasaderi Nduhungirehe azakurikizaho gusura abanyarwanda batuye muri Luxembourg tariki ya 19 Ukwakira, Gand tariki ya 22 Ukwakira, Liège tariki ya 29 Ukwakira, Namur tariki ya 26 Ugushyingo na Leuven kuya 3 Ukuboza.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved